ክንታንትካውሳ ምዝጋቤ ቤዴራማ ካስጝፅጝ ክንታንትካስ ፋይፃውሳ ግባቶ ዋኽትጝፅጝስ፣ ክንቲውሳ እክዶ ቴርስጝስስታ ክንታንትካውሳ ንቫሮ ክችክቺስ ቴርሳማ እሚጝስ እርዳታው ያኹስ 2019 ክንቲው ዝቤንዳ ክንታንትካዋ ሜዜጌብጙ ካስት ካስጛማጊ አግስቴ:: አዊ ብሄረሰቡ ቺፅጝፂዳ አግስታንኩ ክንቲ ጝንካ ክንታንትካዋ ሜዜጌብጙሳ ቴግባሮ አኮሜችካማጊ አግስታና:: ጉዋንጊ ወረዳው ክንቲው ፅፌት ጝና ወረዳዳ አግስታንኩ 63 እምፕላንቲ አችስታ 5 ላጛንቲ አች ክንቲ ጝንካዳ ክንታንትካውሳ ምዝጋቤ ካስጝፃማጊ አኽⶓ ወረዳው ክንቲ ፅፌት ጝናሱ ትክትሊ አላፊ ነብዩ መራዊ ጌሌፅካ:: ክንቲ ጝንካ ክንታንትካስ አሜችኹ ያኻታ ፄውጝስ ችኹ ዎክትዳ ሚንችካ ቴግባርካ እክድስ እምስትካማ አኮሜችስትካማጊ አኽⶓ ቶኬምካ:: ችኹ ዎክትዳ ክንቲ ጝናስኩ ጛርካ እክዶ አኬዳንታ ፄውስታማ ወረዳታ ግምጋሜ ካስጝፁኒዴስ ፋሌንጋ ውላ ክንቲ ጝንካ ፌሬስኹሳ እፄ አዴስጝስ፣ ፌሬስኹሳ ክንቲ ጝናሳ ግቢትጝስ፣ እስካዌ ክንትፄ ቤኖ ግቢትጝስስታ ክንቲ ጝናሱሳ ካቤ ዙርፅጙሳ እንፅኼ ዉላ ክንቲ ጝንካዳ እንፃኽስስትⶓ ዙሜካ::
እንፃኽስስትኹሳ እንፅኼ ስራ ፄዋማ ግምግሚ ፄውስትⶓስታ ክንቲ ጝንካዳ ይጉንኩ እንፅኽካ እምፕልታቑ ቲቢቢርጚስ እንፃኽስታታ ፄውስትⶓ ዲብስካ::ችኹ ዎክትዳ ክንቲ ጝንካዳ እንፃኽስስቱንኩ ቴግባርካ ክቻዴስ ውላ ክንቲ ጝናስኩ ካቫኻዳ ችግኝ ቴኬልስታታ ፄውስትⶓ ቶኬምካማ ሊሊትጙንኩ ቴክልኩ አይኔትካ ክንቲ ጝናስኩ ካቫኻዳ ቴኬልስትⶓ ጉሽካ::
እንስኪላ 13 ሻይ 6 ሊኻዴስ ጃላ ቴክልካ ክንቲ ጝናሱ ካቫኻዳ ቴኬልስትⶓ ቶኬምካ:: ክንትፃንትካውሳ ፉሪፄ ጝኖ አዴስጝ፣ክንታንትካውሳ ቻኺ ጝናሳ ቴጌንጝ ክንቲ ጝናሱሳ ካቬ ፃንኩፅጝስታ ክንቲ ጝናሱሳ ካቬ ክንታንትካስ አሜችኹ ያኻታ ፄውጝስ ወረዳዴስ አመራርካ ሜዴብስትጝስ ሲፋሲፍጚ ፄውስትⶓ ጌሌፅካ:: ወረዳታ ክንታንትካው ምዝጋቢ እንኩርስትኹ ጊዙ እክዱ ስሬትስ ካስጝጛማጊ አኽⶓ ቶኬምካማ ቤዴራ ሜዴቤንካዴስ ጄሜራማ ላጛንቲ አች ክንቲ ክንቲ ጝንካዳጊ ውላ ክንቲ ጝንካዳ ካስጝጛማጊ አኽⶓ ዙሜካ:: ክንታንትካው ቾ ታብልስ ብሽታንዳ ድኹስታማ ጄርካዋ ሜዜጌብፃንታ ፄውስትⶓ ጉሽካ::ክንታንትካው ምዝጋቢ ዉላውሳ ቲቢቢርጜ ካሴው አኽጝስ ጄርካዋ ክንቲ ጝና ካፃካማ ሜዜጌብፅጝስ እምፕልታቕ ቲቢቢርጜ ፄዋንታ እቑዌ ፌያፌይጝፄካ:: ፂሪጊ አባላምቲስታ ክቻክቺ አቹ ክንቲ ጝናሱ ጛሪ ያረጋል ታደለ 2019 ክንቲው ዝቤንዳ ክንታንትካዋ ሜዜጌብጙሳ ካስቶ ካስጝፄካማጊ አግስታንኩ አኽⶓ ዲብስካ::ችኽዳ አኮሜችስታኩ ቴግባርካዋ እክዱ ስሬት እንፃኽስትⶓ ቶኬምካማ እስካዌ ክንትፂ ቤኖ ግቢትጝስ፣ እፄ ቴጌንጝስ አብጂሌስታ ዎንቤሮ ፄጌንጝስ ክንቲ ጝናሳ ፃንኩፅጝስ ክንትጝ ክንትፅጙ ካስትስ ቴርሴካማጊ አግስታንኩ አኽⶓ ዙሜካ:: አክም እላቲኩ ክንታንትካስ ያኻውሳ ዴብተርስታ ኮቤ ሊሊትጙንኩ ጛርት አቕዴስ እርዳቲስ ኩፕናማጊ አግስታው አኽⶓ ጉሽካ::
አክም እላቲንኩ ክንታንትካዋ ጎሌልጝስ ክንታንትካ ክንቴ ጄሜራኒ እይስታው አኽⶓ ቶኬምካ:: ፂሪጊ ኬቤሊው ዝኩዋንቲ ችሎ መለሰ ክንትጝ ክንትፅጙ ካስት ጄሜርጝዴስ ቤዴራ ክንቲ ጝናሳ አዴስጝስስታ ክንታንትካስ አሜችኹ ያኻታ ፄውጝስ እምፕልታቕ ግርብስ እርዳቴ ፄዌካማጊ አግስታንኩ አኽⶓ ዙሜካ:: አዊ ብሄረሰቡ ቺፅጝፂው ክንቲ ሜምሪው ትክትሊ አላፊ አቶ ወንድማኝ ማኔ 2019 ክንቲው ዝቤንዳ ክንቲ ጝንካዋ ችቒዴስ ህንፂሾ ኪስጝ ቺፅጝፂታ ትኩት እይስታማ እንፃኽስትⶓ ጌሌፅካ:: ክንታንትካዋ ይስጝፅጝስ፣ ክንትፃንትካውሳ ውማዮ ኬፍፅጝስ፣ ስልታኔ እይጝስ፣ ክንቲውሳ አመራርካዋ ሴሌቴንፅጝስ፣ሜፃፍካዋ ክንታንትካስ ዋኽትጝፅጝስ፣ ክንቲ ጝንካዋ ግዲስጝስ ኬፍንኹሳ ትኩት እይስታማ አኮሜችስትኹ እንፅኺስ አኽⶓ አቶ ወንድማገኝ ቶኬምካ:: 2019 ክንቲው ዝቤንስ ክንታንትካው ምዝጋቢ ናሲ 18/2018 ም.አ ጄሜራማ አኮሜችስታማጊ አኽⶓ ጌሌፅካ:: ክንቴ ሳኪትጙኹ ዳድስ ጄሜርፅጝስ እሳንካ ቤዴራ ቴርቱ እንፅኽካ አኮሜችስትⶓ ቶኬምካማ ችኹ ዎክትዳ እንፃኽስስትኹ እንፅኺስ 11 ሻይዴስ ጃላ ክንትፂ ቤንካ ፄጌንስጝ፤ 1 ሻይ 900ዴስ ጃላ እስካውካ ቤንካ ጊቢትስትⶓስታእምፕሎ ዴርዜኖ እምፕል ክንታንቲስ ናው ልቕልቕቲስ አክም እላቲንኩ ክንታንትካስ ዴብቴር ኩፓማጊያኽ አኽⶓ ጌሌፅካ:: ብሄረሰቡ ቺፅጝፂታ 2019 ክንቲው ዝቤንዳ 476 ሻይ 588 ክንታንትካዋ ሜዜጌብጝስ አኬድስትⶓ ክንቲው ሜምሪው ንባር ቶኬሜ:: ክልልታ ዴሜካ 7 ትኩሚ 6 ሚሊዮን ክንታንትካዋ ሜዜጌብጝስ አኬድስታ:: ሜስኬሩም 05/2019 ም.አ ክንትጝ ክንትፅጙ እንፅኺ ይፋስ ጄሜርስታው አኽⶓ አማኻሪ ክልሉ ክንቲው ቢሩ አቕፃ::
ታደለ አጋጄ