ይኮኖሚው ሙሲሲኒ

ቤርቤር ይቶፒያዳ አማኻሪ፣ ኦሮሚያስታ ደቡብ ክልልካዳ ኬፍቲኒ ሜቴንስ አሜሬትስቴ:: ቤርቤር ኬፍቲኔ ሚፄ አግፅፃው ክሜሙ ምርትዴስ እምፕልያኽ። አጌራኻሱኪ ያኻ ባርኾቼው ጌቤልስ ፋይስታንት ዝኩክ ክሜሙ ምርትዳኪለ ሜዴብስቴ:: እንዴስ ድምክና ቤርቤር ባርኾቼው ጌቤልስ አሜርትስታንኩ ፋብሪኪኩ ዋይምካዋ አሜሬትጝስ እሼው ቹዋ አክኺ ያኻማ አጌላጌሌ::

ቤርቤር ይቶፒያዳ ኬፍቲኒ ጌቤሉ ዋይሚስታ እሳንስ ምግብስ እሼው ክሜሙ ሴብል ያኹስ አሜትስ 250ሻይዴስ 300 ሻይ ሜትሪክ ቶንዴስ ጃላ ካጊ ቤርቤር አሜሬትስቴ። እንጚኪላ ምስራክ አፍሪካዴስ ቤዴራ ቤርቤሮ አሜሬታንታ አጌራ ፄዌ።

“አዋዋኾዳ ውላ ዋኹኽዳ

ባንጂ አንኪሺዳ ስምኪ ዋጋውዳ

ጓዋጉሲ ሽኩዳድዳ ስንዳይ ዋጋውዳ

አዚኒ ዚጋሚዳ ቤርቤር ጊሌውዳ

ዳንግሊስ ድቑዋን ጛርጌጊ ዲግሳ

አጂሰስ ድቑዋን ቲልቪስ ዱኒዜ ዲግሳ

ንኾ ጃዊዳ ሰሊት ዋኹኽዳ

ካርጛ ጋቲውዳ

ውላ እንካናውዳ”

ናማጊ ጋዚቲኒስታ ጅማንቲ ምንይችል

እንግዳ ጅማይኹ ጅሚ አዋኾ ናኪኒ ወክትስ ግዴው ሴብሉ ምርትስ ዋርቓማ ካንትስታውስታ ምርትስ አቕስታው ዙራሙሪ አኽⶓ ኩልችፃማ ካንትፃዊያኽ።

ጅሚዳ ቶኬምስትኹ ቤርቤሩ ምርት አዋኾሱ ሊሊቲ አቕፂያኽ።

ጅምስታይኒ ድኹስታይኒ ጌሌፃው ካል እንፃው ቤርቤሬኪላ አዋኾዳ አግስቴ።

አማኻሪ ክልሉ ግብርኒ ምርምሪው

ፅናት ካንትፃውስታጊ ምርት እያው አግልግሎቲ ኬፍቲኒ ፋይስታንት ዝኩኽስታጊ ምርት ኩፅኒ ኔኬታታ ፄዋንኩ ሊሊትጙንኩ ፅንጋኽካ ዝኩና:: እኒጛዴስ ወክት ቺፋ ኬሴትስታው ቑንዚስታ ቤርቤር ቴኬልስቱስ፣ አሬምስቱስስታ ሴብል ታምባኒ ኩፕኑስ ኬፍቲኔ አቒውሳ አይሎ ካሴው አኽጝስያኽ። እንቲታኪ ወክቶ ማንዳማ እምፕላኒስ አሜሬትስታው አኽጝ እንጚስኪላ ሜጋዚንዳ አቤሌሽታውላ ፋይስታውሳ ጊዞ እጄታ ፄዋው እንፃኽስትጚ እላቲው አኽጝ ቤርቤሩ ምርቱ ፍታኒ አኽⶓ አዴት ግብርኒው ምርምሪ ፍሽኹ ፅናት ቶኬሜ::

አሬሳቻንትካ እሳንስ ቤርቤሮ አሜሬታኑ ዙራሙሪዴስ ዚጋሚ ወረዳ አግስቴ:: ዚጋሚው አሬሳቻንትካ ድሚ ወርክ ንካማ እቑዌኑ ስምኪላ እንፁሲያኽ። ቤርቤር ዚጋሚው ዝኩዋንትካስ ዝኩዊኒው ብሪው ስሪያኽ።

“ሴሜፃው አንኪ ጋይቲዴስ አቕስቴ” እስታውስታጊ ዚጋሚው ቤርቤር ካንቲስ ሴሜፃው፣ ግድስ ሊሊቲ ፄዌንትስ ልኺትጛንቲ እላቲው እስታማ ምስክርቶ አግፁኹያኽ።

ቤርቤር አሬሳቻንትካውላዳ ታፋ ኽይፂ እስትጝስ አቕስቴ። እንጚኪላ ልቓ ብቲዳ ሚንቾ ጌንዜቦ አግፅጝስ ስሩሳ ፋዮ ዋኽትጝፅጝስ ካላኑ አኽጝስያኽ።

19 አሜታዴስ ቤዴራ ክምካው ክይስ ይቪቺስ ቴኬምስታሺኑ ብቲዳ ቤርቤሮ ቴኬልⶓ ጄሜሩንኩ ዚጋሚ ወረዳ አባራች ዛዝበል ኬቤሊው አሬሳቻንቲ አደራ ዘገዬ “ቤርቤር ንጚ እኖጂስ ወርኪያኽ ምክንያትኪ ቤራዋ ጄውናው፣ እዶ ኬናውስታ ጄርካዋ ክንትፅናው ፃናባንኹ አብቲያኽ” ንካ::

እምንኹ ምርቱ ዝቤንዳኪላ ሴዛ ሄክታር ብቲዳ ቤርቤሮ ዜሬካማ አንኬባኬብካማጊያኽ:: 40 ኩንታል ኽብፂውሳ ማዳባሬ ቴኬምስትካማ ዎክትስ አሪሜስታ ቑንዜ ጎቤንካ አንኬባኬብካማ ቤርቤሮ ግዲትፅካማ ዋግፄካ::

ንጙዊኒ ችኽ እንግርታማ ቱዋችኹኒኪላ እሪ፣ ንፋስስታ አዊኪላ ቤርቤርስ አስሜምጛማ  ቤርቤር ግዲታማ ዋግⶓ ዲብስካ:: ዜርስትኹ ቤርቤሩ ምርትዴስ ዴሜካ አኬዱኑሳ ምርቶ አግፅጝስ ቴስፊስ ማንዴካማጊያኽ:: ቤርቤሮ ፅልንጉንቲ አኹኪ ስሮ ቤሴቕፃው ቤርቤር ቑንዛ አቤሌሽስታቲታ ውማይቴንካውሳ ኩስጜ ቴግባርዳ እሽፅጝስ ካላካልጜካማጊ ችግራ ጋቲታ ቤርቤር ሊማማጊ አኽⶓ ዙሜካ::

አሬሳቻንቲ አደራው ናኑውስታጊ ናኪኒ ወክትዳ ካንትስታው ቤርቤሩ ዛሊስታ አቢቢዴስ ካንታኑውስታጊ ኬፍቲኔ ምርቶ አግፃንኩ አኽⶓ ምልኻታው ያኹኒውላ ሜስኬሩምዴስ ትክምቴ ኪንዴኺስታ ቤርቤሩ ቑንዚ ኬሴትስታማጊ እንዴስ  ቤዴራ ችግር ታምባሺኹ አኽⶓ ታክስፅካ::

ቑንዚስ እጁ አግስታው ያኹኒ ውማይቴንካ እርዳቴ ፄዋንታኪላ ካሴ ዲግስካ::

አበራች ዛዝባል ኬቤሊው አሬሳቻንታ  ንብረት አለሙ ዙሙኑውስታጊ ንጙዊኒ ምርቱ ወክትዳ ላጛ ሄክታር ብቲዳ ማዳባሬ ቴኬምስትካማ ሊሚፅካማጊ አግስታኑ ቤርቤር ኻፂስኪ ያኻ አቢቢስ ናካዳ እልስ ካንትጝስ ሳሲፃዊያኽ::

ውማይቴንካው ኩስጚስ እርሼ አሬስጝዴስ ጉሽፃማ ኽብፂውሳ ማዳባሬ ፄውⶓ ኺስታ ክችክቼ እንፃኽስትጜ ሲፍካማ ቤርቤሮ ሊሚፅጝስ ሊኽ ኩንታልዴስ ጃላ ምርቶ አግፅጝስ አኬድⶓ ዲብስካ:: ፌይኹ አሜትዳ እምፕሎ ሄክታሮ ዋኻያሱ ብቲዳ ቤርቤሮ ሊሚፅካማ ዋይጝስ ኬፍቲኔ ሚፄ አግፅⶓ ቶኬምካ::

ቤርቤር ጌቤልስ ፋይስታንቲ ሴብል አኽጝስ ኬሻንቴ ሚፄ አግፄካማጊ አኽⶓ ዙሜካ::

ቤርቤሮ ዜራኒስኪላ ኬሽጙኽሳ ጉልሌ ዜሮስታ ኬፍቲኔ ምርቶ እያውሳ ቴኬምስትጝስ ናካዳ ዝኩኽ ቤርቤሩ ልማት ቴስፌ እያውስታ አኬዱኑዴስ ጃላ ምርቶ አግፅጝስ ቱስቲስ ማሴ አንኬባኬብካማጊ አኽⶓ አሬሳቻንታ ንብረት ዲብስካ:: ኽብፂውሳ ማዳባሪ ወክትስስታ ክችክቺ ሴልስ ቴኬምስትጝኪላ ምርት ኬፍናታ ፄውጝስ እንዴስ ቤዴራ አግፃሺኑ ሚፂዴስ ኽሳውስታ ኬሽኹ ዝኩዋኒዳ አኽጝስ ጄርካስ ፋይፃውላሳ ዋኽትጝፄካማ አችስ ታምፅጝስ ዴስቴንካ አኽⶓ ድኹዌካ::

ፌዩንኩ ሶኼታ አሜትካዴስ ጄሜራማ ቤርቤሩ ዋይሚ ኬሽጛማጊ አንትጝስ ቤርቤሮ ኽስኹስ አሜሬታንኩ አኽⶓኪላ እንክርፄካ::

ቤርቤሩ ሴብልዳ ኬሴትስታውሳ ቑንዜ ካላካልጚስ ባይላዊ ዳድስ ፅሬቶ ፄዌካማጊ አኽⶓ ጉሹንኩ ዊዛሩ ንብረት ፍንሾስ ኩፅኒ ዝቤናዊ ሳይንሱ ምርምሪው እጁ ዲጋይኒ ናውሳ አሳቦ ዲግስካ።

ዚጋሚ ወረዳ አበራች ዛዝባል ኬቤሊው ግብርኒ ፅ/ጝናዳ ሴብል ልማቱ ውማይቲኒ አማረ ተፈሪ ኬቤሊታጊ አሬሳቻንትካ  ቤርቤሩ ምርትስ ኬሻንቴ ምርቶ አግፃንታ ካሊፃውሳ ውማዩሳ እርዳቴ ፄዌካማጊ አኽⶓ ኽይትጝፄካ።

ኬቤሊታጊ 6ሊኻ 79 ሄክታር ብቲዴስ ጃላ ቤርቤሩ ቴክልስ ሾፌንካ:: አሬሳቻንትካ ቤርቤሩ ፃንኩትስ አሜሬትካማ ኽስኹስ ቴኬምስታንታ ውማይቴንካ ጊዝ ቺፋ ሲፍጜካማጊ አኽⶓ ቶኬምካ:: ችኹ ቱፂዳ እሺኹ እሪው እንፂት ቤርቤሮ ቴኬልጝስ አሜቻቲው እሺኹ ያኹኒውላ ኑንኩ ውማይቲኒ አምሊ ኪንዲዴስ ጉሽፃማ ዝኩኽ እሪውስታ አይር እግልታው አኺኒ ኩፂ ቤርቤርስ አስሜምጛው አኽⶓ ጉሽካ:: ይጉዋንቲ አርፊዳኪላ ኩሪ ኹራማ ቤርቤሩ ቑንዚ ጁዋቲታስታ ወክቶ ማንዳማ ኩፕናታ እንፃኽስታንኩ አኽⶓ አቶ አማረ ጌሌፅካ::

ቤርቤሩ ምርትዳ ኬሴትስታውሳ ቑንዜ ካላካልጝጝስ አሬሳቻንትካ ፄዋኑሳ ባይላዌ ካላካልጙሳ ሴሎ ይስጝፃንታ እንፅኼንቶ ዲግስካ።

ትኩታው ቤን ዴሜካ ሳይንሳዊ ዳድስ ቑንዜ ካላካልጝስ ካላኑሳ እጆ ዲግሳታ ካሴ ዲግሱኒውላ ዙርሜ አግፃካያስኩ አኽⶓ ቶኬምካ።

ዚጋሚ ወረዳው ግብርኒ ፅ/ጝናዳ ትክልቲውስታ ኩፓኩፒው ውማይቲኒ ኪሲ መለሰ ካሳሁን ወረዳታጊ ቤርቤሩ ሴብል ሊሊቲ ትኩት እይስታማ እንፃኽስታው አኽጞ ኽይትጝፄካ። 2018/2019 ምርቱ ዝቤንዳ 18 ሻይ 500 ሄክታር ብቲዴስ ጃላ ቤርቤሩ ሴብል ሊማማጊ አኽⶓ እርዳትፅካ::

ዚጋሚ ወረዳው ቤርቤር ፋይስታንቲ አኽጝሊ እምትጛማ ምርት ክችክቺስስታ ዎክትስ ሊማማ አሬሳቻንትካኪ ያኻ ቴኬምስታንትካ ፅንኩቶስታ ቲንስ አስሜምጛውሳ ቤርቤሮ አሜሬትጝስ እንፃኽስስትኹ እንፅኺስ ናኪኒ ወክትዳ ቤርቤር ኩፔ አፌራማጊ አኽⶓ ቼሜትጝፄካ::

ቤርቤሮ ፂካውሳ ቑንዜ ካላካልጝጝስ እምፕሎ ማሴ ካቢትጝፃማ አሬስጝ፣ ቤርቤር እሺኹዳ ቤርቤሮ ዙርፃማ ብቴ ፉሪሳውላ ዜርⶓ ባይጝ፣ ጉልሌ ዜሮ ዜርጝ፣ ኩሪውሳ ባዩ ክችክቺስ ኬውጝስታ ሊሊትጙኽ ባይላዊ ካላካልጜውሳ ሴሎ አሬሳቻንትካ ቴኬምስትካማ ቴኬላንታ ሼውቴ ፌቴርⶓኪላ ጌሌፅካ::

እንጚስኪላ አምፕል ሄክታር ብቲዴስ 18 ዴስ 20 ኩንታላ አግስቴ እስታማ ማንዲስታው ያኹስ ትክላሊስ ወረዳታ 337 ሻይ ኩንታልዴስ ጃላ ምርት አግስታው እስታማ እክድ እምስትⶓኪላ ቶኬምካ::

ቤርቤሩ ምርትዳ ኬሴትስታውሳ ቑንዜ ካላካልጝጝስ እሊኩ ኾትካሊ እንፃኽስትጝስ ቴርትⶓ ዲብስካ:: አሬሳቻንትካ ቤርቤሮ አሜሬታኒስ አኹ ቲሬቲታ ፄውጝ ቱስታው አኽⶓኪላ ቶኬምካ::

ወረዳታ ሹምቢው ምርትዴስ ሲፋማ እሳንስ አሜሬትስታው ቤርቤር አኽጝታጊ ወረዳው ይኮኖሚው ቹዋ ሙሲሲኒ ኬፍናታ ትኩትስ እንፃኽስስታማጊያኽ። እንጚ እንፅኺው ዜርፍስኪላ 17 ሻይ ዴስ ጃላ አሬሳቻንትካ ቴኬምስታንትካኽ።

ንግስቴ ተስፋ