እስካዊ ክንቲው ዝቤንዳ ቴስፊዴስ ፌይኹስ ቴግባርስ አዴሮ ፊትጝንስ!

ፉሪስ ልምትካማ እጂንኩ ክንቲ ጝንካ ብስስታኒ፣ ክንትፂ ቤንካ ክንታንትካው ዴስቲው  ድምፅስ ብራኑ፣ ዴብቴሩስታ ክንቲ ሜፃፍካው ፋንቲቲ ጄሜርስታው እስካዊ ክንቲው ዝቤን ጄሜርስታው ውዚሚዳ አግስትኔ:: ክንቲ ጄሜርስቱስ ክንቲ ጝናሱሳ ዴዌሎ ዴዌልጝስታ  ክንትጝ ክትፅጝስ ያኻውሳ ክንቲውሳ ግባቶ ዋኽትጝፅጝ ይቢቺ ያኻውላስ አጌራኩ ቻሱ ሙሲሲኒውሳ ስሮ ይስፃማ ግቢትጝስታ ክምንቶ ሲፍፅጙ ፋንቲቲ ጄሜራው ዎክትያኽ ::

ክንታንትካስ ስካዊ አሜት እስካዊ ፍንያኽ::ዋይሚ አኹኪ ሳኪትጚ እንጉስ ይቢቺ አግስታው ያኻውላስ ጌርክ ቺፋሱ ፅሬት አኽጝታጊ ፌይኹ አሜትዴስ ኬሽኹሳ ዋይሜ ንጙዋ ሜዜጌብፄ ንካማ ስካዊ ጁትጚስስታ እንኮኽስትስ ክንቴ ጄሜርጝስ ዱሚዳ አግስታና::

እንሳ ሳኪትጝፅጝስ ኩፂ ዳማዴስኪ ጃላ ሰላም ፋይፃንቲ  አኽⶓ ሼው ንጝ ፋይፄ::ሰላም አቒ ጄራስኪያኻ ዋሺኒኪ ይወትስ ዝኩኽ ፍትሬትስጊ ፋይፃንቲ አኽጝ አቕስትኹዊያኽ:: ሰላም ክንቲስ ቹዋ ብሪው ስር አኽጝስ ክንት ክንትፅጙ ካስት ዋይሚስታ ያኻው ሰላም ዝኩዋኒያኽ::ክንቲ ዊዳፊ ዝኩኽ ሰላም ዝኩዋታስታ ሲፋታኪላ ቹዋ ሜሳሪያኽ:: ክንቲ እሳንጛኒስታ ፃንኩት ማንዲስታማጊ ሲፋኒ ጋቻኪ ያኻ ዋሺኒ ችግር ፌቴርስታኒ ኩስጝጚስ ኽይስታንታስታ ኬቬቬርጛማ ዝኩጙሳ ዳዶ ካንትፃው አኽⶓኪላ ሼው ናማ ምንግስትኪ ያኻ ዋሺኒኪ አካል ክንቴ ካንትኹስ ማቔንትጝጝ ፋይፄ::

ክንታንትካ ክንቲ ጝና ካሳኒስ ጛጛራሱሳ ይዎቶኪ ያኻ ጝንአቑሳ ሰላምስ እጂጙሳ አምንጝጜ ቼሜትጝፅጝ ቱስቴ ::ስራስሪ (ክንታንትካ ) ክንቲውሳ ዋይሚስታ አኽⶓ ጃጊ ዙራሙሬ ሰላሞ አቲⶓ ታክስጝስታ ሴኬኬንትጝ ማንዲስታላኽ ::ሰላም እላቲው አኹኪ ጋቻ ዙራሙሪዳ ካንትስታንኩ ክንቲ ጝንካዳ ክንታንትካ  ክንቴ ሼው ንካማ እርዳትስትካማ ዋይሚስታ ያኻና ናማ ታክስጝኪላ አሽርጝያኽ::

አማኻሪ ክልልዳ ፌቴርስትኹ ጋቻው ምክንያታስ ፌዩንኩ ሹኻ አሜትካዴስ ጃላ ባንኩ ጌፄሩ ዙራሙሪዳ አግስታንኩ ክንቲ ጝንካ ዋኽስ ዋኾ ልምትካሺና፣ባንኩ ዴሜካ እምፕላኒ ልምታኒሰ እምፕላኒኪ ብስስታኒስ እጂንኩ አኽጝ ጌሌፅስቴ:: እን ኩፂ ክንታንትካዳ ዋሳላካ ቻኒስቶ ፌቴራማጊ አኽጝስታ አጌራዋ አሬኬብስታውስታ ልኺትጛንቲ ክምንት አፌርስታቲታ ቻኒስቶ ፌቴራማጊ አኽጝ ግልፅያኽ:: እን አኽጝስ ሰላም ክንቲስ ዝኩኽ ፍሺ ኬፍ ንኹዊያኽ:: ክንቲ ጝንካ ዋሺኒኪ ማቤራዊስታ ፖለቲካው ጋቻዴስ ኔፃ ያኼካማ ስራስሪስታ ዎታትካ አግፅጝ ቱስታውሳ አቕቶ አግፄካማ ቻሱሳ አጌራዋ አሬኬብትጙሳ አላፍቶ አሬኬብስታንታ ፄውጝ ቱስቴ ::

ክንቲ ጝና ይቢቺ ፄዋው ፅሬትስ ይቢቺ ያኻውላስ ውላጊ ታምቦ ፊትጛኒ ጋያኪ ቹዋ ታብሉ ፅሬት ዴሜክስታውላስጊ ሳኪትጚ ቺጊርፂ አኽⶓ ሼው ንካማ ጚሪሱሳ ፍንሾሱሳ ክንቲውሳ ትምኔቶ ብራንፅጙ አላፍት ኬፍ ንኹዊያኽ::

እን አኽጝስ ስካዊ ክንቲው ዝቤንዳ ውላጊ ዙራሙርካዳጊ ክንቲ ጝንካ ክንቲው ማንድካ አኽጝዴስ ድምክና ሰላሙ፣ካሊትጚውስታ እንካንጚው ማይኬልካ ያኻንታ እምፕልታቕ፣ቹዋ ታብል፣ክንትፃንትካ፣ፄትቲው አካልካ ስታ ዋሼንካኪ ታምብ ዌንካ አካልካ ፅሬቶ ፄውጝስታ ፌዩንኩ ጊዝካዳ ክምንትዳ ፌቴርስትኹሳ ቻኒስቶ ካሳውሳ እንፅኼ አንፃኽስትጝ ቱስቴ:: እንሳ ሳኪትጝፅጝስ ክንትፃንትካ ስታ ክንቲ ጝናሱ አመራርካ ክምንቱስታ አጌራው ኽሳንቲ አዴርዌንካኽ::ክንቲውሳ ፃንኩቶ ማንዲጝ፣ክንታንትካውሳ ምግባር ፅንታሳ ክችስጝስታ ሲፍፅጝስ ቻስኩ አጌሮ አሬኬብስታንትካ ክምንትካውሳ ብራኖ ካንትፅጝስታ ዋይሜ ሜዝጌብፅጙ አላፍት ዝኩንኻ  አኽጝታጊ ይሳማ እንፃኽስትጝ ቱስቴ::