አሱሪቴ

አሱሪቴ አዋኾዳ አሳንስ ኬቤርስታው እስካዊ አሜቱ ካይጝፂ ባልያኽ:: ችኹ ዎክትዳ ዜርስትኹ ሴብል አምሎ ሴያማ ካንትስታዉ፣ እሪ ኔኬታማጊ ይንታው፣ ብንካ ዳንጉዋኑ፣ ስራስሪ ክንቲ ጝና ካስⶓ ጄሜራኑ፣ ሹምቢ ኹስትⶓ ጄሜራው፣ ስካዌ ዝቤኑ ቻቢልፂ ባል ያኻማ ካንትስቴ:: አሱሪቴ ኮግሚ እምፕልዴስ ጄሜራማ ሜስኬሩም እምፕሎ ኺስታ ኬቤርስታው ያኹስ ባል ታምብጝዴስ ቤዴራ ሊሊትጙንኩ ቤዴራ ቴርትካ ፄውስታና::  አጌር ሹማጌልካ ጌውስጙንኩሳ አሬክጝፃና:: እስካዊ አሜቶ ዴስቲስ ቻቤልጝስ እምፕልታቑሳ እምፕልቶ ይስጝፃኑ አርፊያኽ::

ኹን ስልኼ ዜኬትካማ፣ ቺዌ ዶኬስካማ ባልስ ሊሊቲስ ቴርታና::አሱሪቴው ጅማንትካስ እይስታውሳ ቤዴርካማ ቴርስጝስ ቴርታና:: ስራስሪ ዴሜካ ጛሬ ልንፅስትካማ ምንጊሱሳ ባይሎ ካንትፃው ዳድስ ጋሜስታ ኩንቾ ፍሽስትካማ አሱሪቴስ ቴርትⶓ ጄሜራና::

አሱሪቴ እሳንስ ኬቤርስታው ዙራሙሪዴስ እምፕል ዚጋሚ ወረዳኽ:: ዚጋሚ ወረዳ ጎኻናጂ ኬቤሊው ዝኩዋንቲ ትሩነህ አበጀሁ አሱሪቴው ባል ምንጊሱ ጊዝዴስ ጄሜራማ ኬቤርስቱስ ሴጙኽ ናካሱ ጊዝዳጊ ጛው ዙራሙሪዳ ባይሉሳ ቴርቶ ባይፃውላ ብሩኽስ ኬቤርስታዉ ባል አኽⶓ ድኹዌካ:: አሱሪቴ ኹንስታ ጝርጃ እምፕልትስ ኬቤርፃኑ ልኻኽዴስ ብራንሾ ካይጝⶓ ካንትፃውስታ እስካዊ አሜትሾ ካይጝⶓ ምልኻታው ሊሊቲ ባል አኽⶓ ቶኬምካ::አቶ ትሩነህ ዙሙኑውስታ አሱሪቴዉ ባልታዋ ስራስሪኪ ያኻ ዎታትካ እንግቼ ትስጛ ካስጝዴስ ቤዴራ እምፕል ስፍሪዳ ኩፓና::” እንግቻዬ.. ሆዬ” ንካማጊ ጅምጝስ እንግቺ ዋጉኽ ስፍሪሾ ካሳንኩ አኽⶓ ዙሜካ::

ጎኻናጂ ኬቤሊው ዝኩዋንታ ዊዛሩ አበራች ፀሀይ ኪላ አሱሪቴው ባል ታምብጝዴስ ቤደራ ኹን ስልኼ ዜኬትጝስ ቴርታንኩ አኽⶓ ድኹዌካ:: ጝርጃኪላ  ባሎ ኬቤርፅጝስ  ያኻውስ ጛውሳ ታምቦ ፊትጛንኩ አኽⶓ ዲብስካ::ባሉ ሊሊቲ ጊሊፂ እንግቼ ኬውጝ አኽⶓኪላ ቶኬምካ:: እንግቺ ካዌንዳስታ ብን ናቕታዳ ዋጋው ክዩ አይኔትያኽ:: እንግቼ ኬውጛ ካሳንኩ ዎታትካ አንኬ ቤርቤርስ ካፅካማ ዋሹኒዴስ ፋሌንጋ እንግቼ ኬውⶓ ጄሜራንኩ አኽⶓ ዲብስካ::

እንግቺ ዝኩኽ ስፍሪሾ ካስጝስ ኬውኒዴስ ፋሌንጋ ኩፅኒ እምፕል ስፍሪዳ እንጁክካማ ላጛስ ላጛስ ያኼካማ ጎናጎናና::ጎናጎንስትኹሳ እንግቼ ዴሜካ ብቲ ክማኒ አሱሪቴ ንካማጊ ጅምጝስ ጝን ጝና ዙርካማጊ ሙሲሲኒዳ እንፄዋኑዌኽ:: ዎታትካ ሙሬ ዙሬካማጊ አሱሪቴውሳ ባሎ ኬቤርፃኑ ጊዛይ እንታ ንጝስ ጅማና::

“አሱሪቴ ናካማ

አሱሪት ላምባ

ናካማ

አሱሪት ላምባ

ሹምቤ ኹናዉ ናካማ

አሱሪት ላምባ

ናካማ አሱሪት ላምባ

ዋሼ ዎሽናዉ ናካማ

አሱሪት ላምባ

ናካማ

አሱሪት ላምባ

ቓንፄ ኹናው ናካ ማ

አሱሪት ላምባ

ናካማ

አሱሪት ላምባ

አሱሪቴ አሱሪት ላምባ

አይናሚ ኮንዳሌ ታምባ ::”ንካማጊ ድኺ አብታሚ ናኑላስ ዉላ ሙሬ ዙሬካማጊ ጅምጝስ አሱሪቴ ኬቤርፃንኩ አኽⶓ አቶ ትሩነህ እንክርፄካ:: አሱሪቴው ባሎ ኬቤርፃንኩ ዎታትካ “አሱሪቴ ናካማ” ንካማጊ ጅምጝስ ሙሬ እንዜጛኑ ጊዛይ እምፕልታቕ ዴስቲስስታ እልልቲስ ቻቤላና:: ዳቔርካማ ቻቤልጝስ ጝና ሚፅፃና::ጝንዌንካ ቢፄ ቤፅካማ ጉሽሬ ኔኔስካማ እንጅኩፃና::ስልኼ አሪኬ አብዜ እያና:: ጌርክ ግድፍ ያኹኒ ዴሜካ ዱሬ አሬድካያና ጉዝጉዞጊ ዲግሳያና::”ናካ አሜታ ድባን አቒሊ ክሚሊ ዴክስ ታምፁኒጊ “ንካማጊ ስሌቶ ሳሊስታና:: ስሌት ክቼያታ አሱሪቴው እንክራንትካ “እንኩዋኻይምኽ” ንጝስ አሜትስ ዴክስ ታምፃታ ሜልካሜ እንጎ እንጉስታያና::እሊውሳ ጝና ካሳኒስ ምስሊስ ጅሜካማጊ ዉላዋ ጝኖ ታምፃና::

አሱሪቴው እንክሪዴስ ድምክና ኮግሚ ሹኻ ጌርካስ ሩፋዬታዋ ስራስሪ እሪ እሩዋው ወክትስ እሪስ ታስስትካማጊ ጐዴባና:: እምፕልታቑላዳ ሩፋዬል ጌርካሱ እሪ ስራስሪዋ ሌጌፄ እስታማ አምንስቴ:: እሪ እሩዊⶓ ጄሜሩታ ስራስሪ ዝባትካ አኽጝስ

“ሩፋዬል ጃላ ጃላ፣

ሩፋዬል ጉቒቲ

ቺዊ ካርጛ ፂዊንቲ!” ንካማጊ ውታኺዳ ጊጝትጜካማጊ ጐዴባና::

ኩሉ ዙራሙሪዳ ኮግሚ ሻራዉላስ ሹምቢ ኹስታላ እስታማ ዙሚስቴ::አሱሪቴው ባልታዋ ዴሜካ ታምብኹ ሹምቢው ምሚ ኹስትⶓ ጄሜርስቴ::አሱሪቴው ጅማንትካስ ሹምቢውሳ ምሜ ጌሽካማ ኬሜስፃና::አሱሪቴው ባላዴስ ፍና ሹምቢ ታምቡኒዉላ ኹስታላኽ ::

አሱሪቴው አሊዲዳ ኮግሚታዋ አኹኪ ሜሰኬሩም እምፕል ጌርክስ እምፕልታቕ ቻኻ ኮይቴውላ ኹርፂዴስ ጁዌካማ ኻራ ኮግሚው አኹስ አካላቶ ቑሴና:: አካላት ቑሲስታው እሰካዊ አሜትሾ ካይጝⶓ ታክስጝስያኽ::ዎሌጅካ ብንሾ ታምባካላቲንኩ ዝኩኒውላ አኾ ብንዴስ ቡዌካማ አጋይጝስ አካላቶ ቑሴንታ ፄውስቴ:: እምፕልታቑላዳ ኮግሚው አኹስ አካላቶ ቑሲጝ ቑዚዴስ ኬሽፃው ንካማ አምናና::ክስታንቱሳ እምኔቶ ሲፋንትካ ኮግሚኩ አንኩዋ ጌርክካዳኪላ ብሽታንሾ ካስካማ ፄቤልስ ፄሜቕስታኑ ጊዝያኽ::

ዚጋሚ ወረዳው ባይል ቱሪዝምስታ ስፖርት ፅፌት ጝናሱ አላፋ ዊዘሩ አረጋች ሽቱ አሱሪቴ ዚጋሚ ወረዳ ሊሊትጙንኩ ኬቤልካዳ ባይሉሳ እሜ ባይፃውላስ ኬቤርስታማጊ ዝኩኽ ባል አኽⶓ ጌሌፅካ::አሱሪቴ እምፕልትስ ኬቤርስታው ባል አኽጝስ እምፕልታቑሳ እምፕልቶ ይስጝፃው ባል አኽⶓኪላ ቶኬምካ::አሱሪቴውሳ ባሎ ኬቤርፃንኩ ድሚ 6-18 አሜቶ ኺስታ ዝኩንኩ ዎታትካ አኽⶓ ቶኬሙንኩ ዊዛሩ አረጋች ዎታትካ እምፕልዳ ያኼካማ እንግቺ ዝኩኽ ስፍሪሾ ካስጝስ “እንግቻዬ.. ሆዬ” ንካማጊ ጅምጝስ ባል ኬቤርስታው አኽⶓ ጌሌፅካ:: ትክላሊስ አሱሪቴ ባል ፍንሾሱሳ ቴስፌ ካንትፃው እስካዊ አሜቱ ቻቢልፂያኽ::አኽጝስኪ ባል ባይሉሳ እሜ ባይፃውላ ክምንትዴስ ክምንቶ ፌያፌይጛታ ዉላውጊ ታምቦ ፊትጝጝ ቱስቴ::

ታደለ አጋጄ