ሲቪልስታ ጝን አቑ ምዝጋቢው ፋይፃንት

ሲቪልስታ ጝን አቑ ምዝጋቢንጝ አቑ ይወቱ እንዝጚዳ ኬሴትስታው ቹዋ ቹዋ አኼንካዋ እጋዊ ዳድስ ሜዜጌባማ እሚጝ፣ ቼሜትጝፅጝስታ ምስክር ወሬኬቶ እይጝስ ካሊፃው ምንግስቱ እንፃኽስስትጚያኽ፡፡

ኽይኪላ ፋይፃንቲ ፂዊ አኹኪ አኺኒ ንጝ አኽⶓ አማኻሪ ብሄራዊ ክልላዊ ምንግስት ሲቪልስታ ጝን አቑ ምዝጋቢው አግልግሎቲው ንቫር ካንትፄ::

ክምንትስታ ክርጝ እንቲታኪ ቱትጚስታ ትፍትጚው፣ አቒው ዝኩዊኒ ጀሜራውስታ አሌድስታው ይወቱ አኼንካው ምዝጋቢያኽ፡፡

ፋይፃንቲ አኼንካው ምዝጋቢ ዊዳፊስስታ ግዴቲስ ሜዜጌብስታውስታ ኩፕናው ቹዋስ እግስ፣ ፍትስታ ቺፅጝፂስ እንቲታኪ ስታሰቲክሱ እንፅኺስ ንቫሮ እያዊያኽ፡፡

ጋያላ ፋይፃንትካ አኼንካ እምፕል አጌሩ እዝቡ ሚንችቶስታ ልግሶ ክችክቺስ ካንትፃንኩ አኽጝስ እምፕልታቑ ይኮኖሚው፣ ማቤራዊስታ ባይላዊ አግልግሎቴ እይጝስ ቴርታው እክድስስታ ፊፂምጚስ ፋይፃንትካ ንቫርካ  እስትካ፡፡

አጌርታ አዋጅ ቼፍ 260 ጉሽፂስ ግዴትካ ያኹንኩ ሴዛ ንጝኪ ክምንት፣ ቱትጚ፣ ትፍትጚስታ ክርጙ አኼንካዴስ ድምክኒስ ጉዲፈቻ፣ ጄራ አኽⶓ ቻቤልጝስታ ታብላ አኽⶓ ፍርድ ጝናዳ ዎሴንፅጝ አምሊ 2008 ምሬት አሜታዴስ ጉሽፃማ ቴግባርዳ እሽፅጝስ ትክላሊስ ላጜታ አኼንካ ሜዜጌብስትካማጊ አግስቴ፡፡

ፋይፃንትካ አቒ ይወቱ አኼንካዋ ሜዜጌብፅጙ ትክምኪላ እንግራ ይጉዊ እንፃኽስትጚዴስ ፋማ ውላዋ አቡቑኹሳስታ ፍታዌ ቴርቶ ቴግባርዳ እሽፃማ ጛርት አቕስ ኾትካስ አጌርካስስታ አሌሙ እምፕልታቕስ ኬፍቲኔ ትክሞ እዬ።

ፋይፃንትካ አቒ ይወቱ አኼንካው ምዝጋቢ እምፕላ አጌራው ፍንሾሱ ልግስስ ዳብዜ ካንትፅጝስ አምንጝፃው ንቫሩ ፍን ያኻማ አጌላጌሌ።

ቺፅጝፂኩ ጉዳይካዋ፣ ፍቶ እምቢትንኹ ፄውጝስስታ አጌር አቑሳ አቕቱሳ ሜብቶ ዊዳፊስ ማንዲፅጝስ ፍቱሳ ቴርቶ እንግራ ይጉዊ እንፃኽስትጚዴስ ፋማ ዝቤናዊስታ ቲሬንትስ ንቫሮ እሚጝስ ክችክቼስታ ፍታዌ ውሳኔ እይጝስ ፋይፃንቲያኽ። ዴስስትኹዴስ ፉኹሳ ኬሼኹስ እንፃኽስትጜ ፌቴርጝስ አሜቼ።

ምዝጋቢውስታ ብሄራዊ አቕፂው አዋጅ ቼፍ 760/2004 ሲቪሉስታ ጝን አቑ ምዝጋቢ አዋጅ ቼፍ 1370/2017ዳ ኬሽጙኽስታጊ ዋኽትጙኽሳ አግልግሎቴ እይጝስ ካሊፃው አኽጝስ አዋጆ ካብስ ፍሽጝ ፋይፃንቲ ያኻማ ካንትስታኒ ይቶፒያው ፌዴራላዊ ዲሞክራሲያዊ ሪፐብሊክ እገ ምንግስት ቱንዚ 55 እንፂ ቱንዚ (1) ስታ (6)ዋ ጉሽፃ ፄውጝስ ኬሽጛማ አዌጅስታ።

አዋጅኪላ ኬሽጛማ ፊጝስ ካሉኽ አጌር አቕ ፋይፃንትካ አቒ ይወቱ አኼንካዋ ቱስቲስስታ ወክትስ ሜዜጌብስታንታ ካሊፃው እንቲታኪላ ታምብስታንታ ያኹኽስታ ጝን አቑሳ ምዝጋቢውሳ ቴርቶ ቴግባርዳ እሽፅጝ ፋይፃንታ ያኻማ አግስትጝስ ብሄራዌ ትክሞስታ ዴክቶ ማንዲፅጝስ እንቲታኪ ምንግስቱስታ ጛርቱ ዜርፍስ አጌር አቕስ  እይስታው አግልግሎቲ ሳሴርስታ እምቢትንኹ ያኻታ ፄውጝስ ሲቪሉስታ ጝን አቑሳ ምዝጋቢውሳ አግልግሎቴ እይጝ ፋይፃንቲ አኽስጝያኽ።

ፋይፃንትካ አቒ ይወቱ አኼንካው ምዝጋቢ ጛርቱኪ ያኻ አጌራው ውላቱዊ ትክምስ ፋይፃንቲ አኽጝታጊ  አጌር አቕኪላ ሜብቶ ቴኪምስትጝዳ ዝኩኹ ሼውቲ ዋሳላካይ ናውሳ ካንቴ እይንኩ አዊ ብሄረሰብ ቺፅጝፂ ቻግኒ ኬቴም ቺፅጝፂው ዝኩዋንታ ዊዛሩ አዲሴ ከፋለ ሚንቾ ጊዞ ሜብቶ ቴኬምስትጝዳ ዳንጉኒ ዝኩⶓ ቶኬምካ።

ፋይፃንትካ አቒ ይወቱ አኼንካዋ ሜዜጌብፅጝስ እንቲታኪ ትክሞ እርዳትስትጝዳ እሺኹ ካንቲ ዜሬቕቲኒ እሺኹ አኽⶓ ታክሳንኩ ዊዛሩ አዲሴ ሊሊትጙኽ ዳድስ አግፁኑ ሼውቲስ ኩፅኒ ካንቴ ኪስካማ ሜብቶ ቱስቲስ ቴኬምስትⶓ ሼውፅካ።

ዊዛሩ አዲሴ ላጛ ጄርካስጊ ክምንቱሳ ምስክሩሳ ወሬኬቶ ወክትስ ሜዜጌብፅካማ ፍሽካ። ጛውሳ ጋብቼኪላ ሜዜጌብፅካ። ሜብቶ ቴኬምስትካማ አጌራዌ ግዴቴኪላ ፊትጜካማጊ አግስታና።

አግልግሎቴ አግፃኑ ምዝጋቢው ኾትዳ እስይታው አግልግሎቲ ዙራዙርፃውስታ ፍሼ ካሴው እሺኾ ናንኩ ዊዛሩ አዲሴ ጊዝዴስ ጊዞ ኩፅኒ ኬሽጛማ ዝቤናዊ ዳድስ አጌላጌላውሻው አኽⶓ ቶኬምካ።

አቶ አስማረ አድማስ ኪላ ሹማጌልቱ እድሚዳ አግስታንኩ ቻግኒ ኬቴሙ ዝኩዋንቲያኽ። ጛ ጋብቼ ፌፄማኒስ ኩነትካዋ ሜዜጌብፅጙ ጊዝ እሺያሱ ወክት አኽⶓ ታክስካ። ያኼስጉ ናኪኒ ወክትዳ ኩፅኒ ምዝጋቢ ካስጛውሻው አኽጝ ጌሬምፃኩዴስ እምፕል ያኼካ። “ዝቤናዊ ጊዝ ሚንቾ ጉዳዮ ሳሴርፃው እንፃኽስስትጚ ቴግባርዳ አሺጝ ቲኾዋ ፄጌሬ ናኒስ” ዝቤኖ ዝቤንሊ ልኺትጝፄካማጊ አሳቦ ጉሽካ።

ሹማጌልታስ ካሜኑኑሳ ጄሮ 90 ጌርካዴስ ቤዴራ ቲኑ ኾትካዳ አግስቱንኩ ምዝጋቢው ውማይቴን ሜዜጌብካማ ክምንቱሳ ምስክር ወሬኬቶ እዮⶓ ድኹዌካ።

አግልግሎቲስኪላ ዴስቴንካ አኽⶓ ጉሽካ።

ናክኒ ክምንት ዝቤን ያጉኽሳ ሜብቶስታ አግልግሎቴ ቱስቲስ ቴኬምስታማ አጌራው ልግስስታ ዋኽቱጙኽ ንቫርስ ታምቦ ፊትጝጝ ማንዲስታው አኽⶓ ጉሽካ።

ቻግኒ ኬቴሙ ቺፅጝፂዳ ሲቪል ምዝጋቢው ንቫሮ ኩፕፁጙ ውማይቲኒ አቶ በዛብህ መኮንን ፋይፃንትካ አቒ ይወቱ አኼንካዋ ምዝጋቢ ጄሜርጝ ክችጙኽሳ ንቫሮ እሚጝስ ካሊፅኹ ያኹስ አጌር አቕ ውላቱዊ ልቕልቕቲስ ኽሳንቲ ፍሺ ዝኩኽ አኽⶓ ኽይትጝፄካ።

ክምንት፣ ጋብቺ፣ ትፍትጚስታ ክርጝ ዝኩዋኒ ኾትዴስ እይስታውሳ ምስክሩሳ ወሬኬቶ እሚጝ ሜብት አኽጝታጊ ዋሺኒኪ አቒ ዲጊዳ አግስታው ኬቤሊው ምዝጋቢው ማይኬልዳ አግስታማ አግልግሎቴ አግፅጝስ ካላው አኽⶓ ቶኬምካ። ጛው ኽይትጝፂታጊ ክምንት 90ጌርካስ፣ ክርጙ 50 ጌርካስ እንቲታኪ እሊኩ አኼንካ ዴሜካ 30 ጌርካኻዳ ሜዜጌብስታኒ ምዝጋቢ ኔፃስ ካስጛው አኽጝስ አጌር አቕ እድሎ ቴኬምስትጝስ ካላንኩ አኽⶓ አቕፄካ።

ናካ ዝኩኽ አኺኒዳ አግልግሎቴ ኬሽጝፅጝስስታ ዝቤናዋ ፄዋማ አግልግሎቴ ፋያንትካ አቒውስታ ወሬኬቱ ኔክትጚዴስ ፌካማ ቴክኖሎጂስ እምቢት ንኹሳ አግልግሎቴ አግፅጝስ ካላንታ ፄውስታማጊ አኽⶓ ቶኬምካ።

ጋብቺው፣ ክምንቱስታ አሊውጊ ምዝጋቢ ወሬኬትዴስ ፋማ ቴክኖሎጂስ ቲኪስትጝስ ዲጂታሉ ምዝጋቢሾ ካይጛ።

2018 በጀት አሜትዳ ኬቴሙ ቺፅጝፂታ ኩቲስ ሜዜጌብስቱንኩዴስ 2 አካል ጉዳቴንካ አኽⶓ ጉሽካ። አኺኒው አይኔትታ ካንትስታኒኪላ 1586 ክምንት፣ 50 ጋብቺ አኹኪ ቱትጚ፣ 7 ትፍትጚስታ 88 ክርጙአኺኒው  ሜዜጌብስትⶓ ሜዜጌብስታ።

ኬቴሙ ቺፅጝፂታ ፋይፃንትካ አቒ ይወቱ አኼንካዋ ሜዜጌብፅጙ ሼውቲ ዜሬቕቲኒ ያኹኒውላ ሊሊትጙኽ ጉላሊስ እይስታው ክንቲስ ኩፅኒ ጊዝዴስ ጊዞ ኬሽጛማጊ አኽጝስ ይስጝፃማ ሲፍፅጝ ማንዲስታው አኽⶓ ሼውፅካ።

ብሄረሰቡ ቺፅጝፂዳ ሲቪልስታ ጝን አቑ ምዝጋቢው ቴቬቬርጝፃንቲ አቶ ቢምረው አላምረው 2018 ባጄት አሜትዳ እምስትኹ አክድ ሳኪትጛታ ፄውስቱኽ ፅሬትስ 40ሻይ 614 ፋይፃንትካ አቒ ይወቱ አኼንካ  ሜዜጌብስትⶓ ጌሌፅካ።

እምስትኹሳ እክዶኪላ 145 ታፋዴስ ጃላ ሳኪትጝፅጝስ ካሊⶓ ሼውፅካ። እንጚ ዋይሚስኪላ ውላውጊ ቲቪቪርጚ ኬፍቲኒ እሼ።

ውላቱዊ ንቫር ክችክቺስ እምስታውላ ይጉኒጊ አጌራው ልግሱ፣ ፍቱ፣ ይኮኖሚውስታ ማቤራዊው ጉዳይካው አክዱ ዳብዚ ግልፅስ ካንትስታቲዊያኽ ናንኩ አቶ ቢምረው አጌራ ፍሽታው እግስ፣ ፓሊሲስስታ አዋጅስ ግልፆ ንቫሮ እሜማ ልኺትጛንታስታ ቤዴራ ያኻማ ታምቦ ፊትጝጝስ ብሄረሰብ ቺፅጝፂታ እንፃኽስስታማጊ አኽⶓ ጌሌፅካ።

ብሄረሰብ ቺፅጝፂታ ሴዛ ኬቴሙ ቺፅጝፅካዳ ዝቤናዊ ዲጂታልስ እይስታማጊ 30 ኬቤልካዳ ዝቤናዊ ዳድስ ወሬኬትዴስ ኔፃ ያኻማ እምቢትንኹ አግልግሎቲ እይስታታ ትኩትስ እንፃኽስስታማጊያኽ።

ምዝጋቢ ፌፄምስታው ዲጂታልስ አኽጝ ዴሜካ ሲቪሉስታ ጝን አቑ ምዝጋቢው አግልግሎቲዳ አሱቲኔ ንቫሮ ሳሴርስ ካላካልጝጝስ ካሊፅⶓ ቶኬምካ። ሊሊትጙኽ ምክንያትስ ሴኔድዳ ታምባሺኹሳ ጉዳቶ ይጉፅጝስ ንቫሮ አችትጝፃማ እሚጝስ ካሊስትⶓ ሼውፅካ።

አግልግሎቴ እያንትካ ኾትካኪላ ሲቪሉስታ ጝንአቑ ምዝጋቢውሳ ወሬኬቶ ቢዲሪ አኺኒታ ቴኬምስትካማጊ አሱቲኔ ንቫሮስታ አችቤራቤርⶓ ይጉፅጝስ እንፃኽስትጙ ፋይ ኬፍ ንⶓ ጉሽካ።

2018 ባጄት አሜቱሳ ፊፂምጜ ጋማጋምጝስ ፍንሾስ ትኩት እይስታኩ ቴግባርካዋ ጎሌልጝስስታ ኬሽኹሳ ፌፄሙንኩስ ዴሜካ አቕስቶ እይጝስ ጋያላ 2019 ባጄት አሜትዳ ቴክኖሎጂስ ዴጌፍስትኹሳ ምዝጋቤ እሳንጝፅጝስ ኬሽኹ ፊፂምጚስ እክድ እምስትⶓ አቕፄካ።

እክዱ ሳኪትጚስ ዴሜካ ሚዲያዋ ዴሜካ ትኩታኩ ቤንካስታ እምፕልታቕ ቴቬቬርጛንታ እቑዌ ዲግስካ።

ንግስቴ ተስፋ