ቱሪዝሙ ዜርፍስ ሊሊቲ ትኩት እይስትስ

ሜስኬሩም17 ቱሪዝሙ ባሉ ጌርክ አኽጝዴስ ፌይኹስ ቴግባርስ ካንትስታው አችሾ ኪስጙ እቑዊ አሜት ቺፉ ሜስኬሩም 17 ጌርክስ ኬቤርስታው አሌሙ ቱሪዝሙ ጌርክ እን አጌራኻሱ ሊሊትጙንኩ ቴርትካስ ክርቤርስትጝ ዴስስትኹያኽ። ያኼስጉ እኒ ባልካ ዜርፉ ልግስስ ዋሳላካሳ አምንስትኹሳ ታምቦ ፊትጜካማጊይ? ናውስ ካሲስ ኬፍቲኔ ዙርፄ ፋያንኩዌያኽ። አሜት ቺፋ አኮሜችስታንኩ ባልኩ ቴርትካ ጉሽፂ አሳብኩስታ ምግባር ፅንታስኩ ዲብስጝካዴስ ፌይካማ ዜርፋ ሚንቼ ልግሶ ያጉኑ ኪሲ ፋይስታውስ አችስ ጋማጋምስቱኑ እንፅኺ ልቓኽ። አኽጝስኪላ ሜስኬሩም 17ው ክብረ ባል እንፅኺው ጂሚሪጉ አሜቱ ቴክሌልጝፂ ሜንድሬኽ አኽጝ ጋቲው አኽⶓ ማላማ ይንታውስ ትኩትስ እንፃኽስትጝ ፋይፄ። ይቶፕያ ፍትሬቱ ግድዴስ ታሪኩስታ ባይሉ ማኼትካዋኺስታ፣ አሌሙ ሳይንሱ ክንቲውስታ ማኼትካው ሜዝጌባው አችትዳ (UNESCO) ሜዜጌብፅጝዴስ ስካውካ ኬቴምካውስታ ፍትሬትኩ ጉስፅካኺስታ ሚንችካ ኔክስትካያስኩ ቱሪዝምኩ አብትካ ዌናኽ። ዲብኩፂ እኒጛ አብትካዋ ኬፍቲኒ ኢኮኖሚው ኪስጙ ቴርትዳ ጝሺኪላ እሳን ሊሊት ካንትስቴ። ይንታው ዜርፍስ ዋይሚስታ ፄውጝስ ሲፋንኩ ቹው ቹዋ ጉዳይካዳ ትኩት እይስታማ እንፃኽስትጝ ቱስቴ።

1 ስር ልማቱሳስታ አግልግሎቲውሳ ፃንኩቶ ኬሽጝፅጝ  ቱሪዝም አብታ ይቢቺ ዳላላኽ። ቱሪስታ ጉስፂኩ ስፍርካሾ ካፃንኩ ዳድካዋ፣ ኤሌክትሪኩ፣ አኹውስታ ኔትዎርኩ ዲግስጝካዋ ቴርስጝ፣ ቢዲሪ እንፅኺ አኽጝ ቱስቴ። እንዴስ ድምክኒስኪላ ሆቴልኩ ጊፅኩ ስፍርካስታ ሌንጌድፅጙ ዜርፍዳ አቺትጙንኩ ቤንካ አግልግሎቱሳ ፃንኩቶ ክንቲስ ሌጌፅጝ ጎቤናንትካውሳ እጂጙሳ ጊዞስታ ዴስቴ (ሼውሳ ፉሬ) ዴሜኬ።

2 አጌራኻሱሳ ቱሪዝሞ ይስጝፅጝ፣ ባርኾቼስኩ ጎቤናንትካው ቼፍ አሌም አቡቑ አኼንካዴስ ስታ ጂኦ ፖለቲካው ምክንያትካስ ኪስጝጝስ ካሌ። አኽጝስኪ አጌራ ዋጊ ቱሪዝሙሳ ባሎ ሌጌፅጝ ዜርፎ ባርኾቼው ቻኒስትዴስ ካላካልጝጝስ አምጝፃው ስርያኽ፡፡ እን አጌራሱ እዝብ ጚአጌራሳ ታሪክስታ ፍትሬቶ እሳንስ ጎቡንጝስ ካሊፃንኩ እንፅኽካ እንፃኽስስትጝ ቱስቴ፡፡

3. ዝቤናዊስታ ዲጂታሉ ቴክኖሎጂስ አቕትጝፅጝኧ ናኪኒ ቴክኖሎጂው ዝቤንዳ ባይላዊ አቕትጝፂው ዳድካ ይቢችካዋ ቴኬምስትጝ ዳላላኪ፡፡ማቤራዊ ሚዲያዋስታ ሊሊትጙንኩ ዲጂታልኩ ዳድካዋስታ ቪዲዮውሳ አቕትግፂኩ ዳድካዋ ቴኬምስትጝስ ይቶፒያውሳ ፍንቶ አሌም አቩቑ እምፕልታቕስ አቺትጙኽ ዳድስ ዲግስጝ ቱስቴ፡፡
4. ሰላሞስታ ዴክቶ ቼሜትጝፅጝ፣ ቱሪዝም ሰላምሊኪላ ይስጙኽ ታምትጚ ዝኩኽ ዜርፍ አኽጝታጊ ሰላሞ ቼሜትጝፅጝስታ ጎቤናንትካውሳ ዴክቶ ማንዲፅጝስ አምንጝፃውሳ ቱሪዝሙሳ ዙራሙሬ ፌቴርጝስ ቱሪዝም ልግሱ ስርያኽ፡።
5. ታምብዌን አካልካውሳ ማቔንትጜ ይስጝፅጝ፣ ቱሪዝም እምፕል ኾቱ እንፅኺ ጋቲው አኽⶓ ሼው ንጝስ ቱሪዝም ሚኒስቴርዴስ ድምክና ጛርትኩ አብትዌን፣ አየሩ ዳድ፣ ሆቴልዌንካስታ ዙራሙሪው እምፕልታቕሊ ማቔንትጚስ እንፃኽስትጝ ቱስቴ፡፡ ትክላሊስ ሜስኬሩም 17ስ ቱሪዝሙሳ ጌርኮ ኬቤርፅኑስ ፌዩንኩ ጊዝካዳ እንፃኽስስቱንኩ እንፅኽካዋ ጋማጋምጝስ ዳንጉንካዋ ክችስጝስ ኬሽኹሳ እንፃኽስትጜ ሲፍጝ ቱስቴ፡፡ ባል ጌርኮ ቼፍፂ አኽጝፂ አኽጝዴስ ፌያማ ይኮኖሚው ልግስስታ አጌራው ፍንት ኬሽኹስ አቕትጝፅጝስ ፋይስቱኒዴስ ዙሚትጚዴስ ፌይኹስ ካንትስታው ቴግባርስታ ዋይሚዳ ትኩታ ፄውኹሳ እንፅኼ እንፃኽስትጝ ወክት ካሴው ኬፍ ንኹ ጝን እንፅኻኽ፡፡