አፍሪካ ቹኒትስቲስ

አፍሪካ ቴቤቤርጙንኩ ምንግስታትካው አችቱ ፄትቲው ኩስጚ ጝናዳ ቲሬንቲ እንጅኩፄ አግፄታ ቴቤቤርጙንኩ ምንግስትካዉ አችቱ አላፊ አንቶኒዮ ጉቴሬዝ  ካሲና::

ቴቬቬርጙንኩ ምንግስትካው አችቱ ቹዋ ፃፋንቲ አንቶኒዮ ጉቴሬዝ አፍሪካ ምንግስታትካው አችቱ ፄትቲው ኩስጚ ጝናዳ ቲሬንቲ እንጅኩፄ አግፄታ ካሲካ::

ቹዋ ፃፋንቲ እንሳ ኑኑኪላ ስንብቶ ጄሜርኹ ቴቬቬርጙንኩ ምንግስታትካው አችቱ ትክላሊ ጉባኤዳ ብስፄ ዙሚትጜ ፄውኑ ዎክትዳኽ::

አንቶኒዮ ጉቴሬዝ ፄውኑ ዙሚትጚዳኪላ አፍሪካ እንፁኒ እምፕል እንጅኩፂ ዝኩጝ ቱስታው አኽⶓ ጉሽካ::

“21ንቲ ዝቤን ቤናዳ ፄትቲው ኩስጚ ጝና አፍሪካ ቲሬንቲስ ውክልኒ እላቲት አኽጝ ፍታዊ ጋቲውስታ ምክንያት እላቲዊያኽ” ናኒስ ኪስስትጝ ቱስታው አኽⶓ ታክስፅካ::

ቹዋ ፃፋንቲ ፌይኹ አሜትዳ 1945ዴስ ፋሌንጋ ሚንችካ አሌሙ ውንካ ኪስስትካ፣ ያኼስጉ ፄትቲው ኩስጚ ጝና እንዳራኪ ኪሴ ካንትፃውላስ ሲፉታኽ ናኒስ ምስሌ እቑዌ ዲግሳሺና::

ፄትቲው ኩስጚ ጝና አንኩዋ ቲሬንቲስ አባልካ ዝኩኑ ያኹስ እኒጛ ክቻዴስ ቻይና፣ ፈረንሳይ፣ ሩሲያ፣ እንግሊዝስታ አሜሬካኽ::

እንስኪላ አፍሪካ ካያ ክምዳ እሺቲኹ ጊዝዳ ላጛንቲ አሌሙ ዎሬምዳ እሺኹሳ አኺኔ ናካኪላ ካንትፃማጊያኽ ናኒስ ሊጊሲሚ አሜትካስ ካሲስቱስ እጂⶓ ቶኬምካ::

ኩስጚ ጝና ሊሊትጙንኩ አሌምኩ ቤንካዋ ዎኬላንኩ 10 ቲሬንታ ጋቲንኩ አባልካ ዝኩኒዉላ አንኮ ቲሬንቲ እንጅኩፂ ዝኩኩ አባልካታ ድምፆ ድምፅስ ሻሪጙ ሜብት እላቲንኩዊያኽ::

አፍሪካው እምፕልቱ ኩስጚ ጝናዳ ላጛ ቲሬንቲስ ዎኬልስታንትካዋስታ ድምክኒስ ላጛ ቲሬንታ ጋቲንኩ ዎኬልስታንትካ ዝኩዋንታ ሊጊሲሚ ጊዝስ ቻኒስቶ ፄዋኒስ እጄ::

ፄትቲው ኩስጚ ጝናሱ አጌርካ፣ ኾትካስታ ጛርት አቕ አሌም አቡቑ ማይኬብካዋ ድርብጝዳ፣ ሰላሞ ኬቤርፅጝዳ አሴቴፍጛታ ፌኬድጝ እንቲታኪ ጋቻስ ቴቤቤርጙንኩ ምንግስትካ ዎታኮውሳ ዙርሜ እይጝ ቱስቴ ናውሳ ዎሴንጙሳ ስልታኖ ፃያ::

ንቫር ቢቢሲዴስያኽ

ታደለ አጋጄ