ታሪክቲኒ ሜሲ

ፊዚክሱ ሳይንቲስት ያኹኒ አልበርት አንስታይንታ፣ ጅሚስ ያኹኒ ቤትሆቨንታ፣ ፃፊጝስ ያኹኒ ዊሊያም ሼክስፒርታ፣ አቒውሳ አንኮሌ ፂኒሱኒ ሲግመንድ ፍሮይድታ ክችክቺ ውንዳ ታምብጝስ ካሌ እሺኾ ናና:: ፍልስፍኒስ ያኹኒ ዴሜካ ሶክራትስታ ትቬቭስ አቕስቴ እሺኾ:: ጚ ኩፅኒ ልኩ ኩታው ዜር እቑዌማ ዋኒኪ ዋኒ ልኩ ኩታው ሜሲ ያኹኽ ሊዮኔል አንድሬስ ሜሲ:: ድኻ ሙራዴስ ጁዋማ አሌሙ ልኩ ኩታው ንጉስ አኽጝስ ፄዉኹ እንዝጚ ሳሴር ጋቲዊያኽ:: 10 አሜታዳ ልግስኒው ሆርሞኑ እንፂት ጌቴማ:: ቲሬ ሌጌሳቲታ ፍንሾሱሳ ቴስፌ ልኻኽፅኹ ፍታኒ ታምባሺኾ::ጝናአቕ እክምኒውሳ ጌንዜቦ ፍሽጝስ ካሌካያ:: ካሜንስትኹ ኬችኪላ ጌንዜቦ እርዳትጝስ ፋያያ:: ያኼስጉ ሌጌሳ ታምባውሳ ካሌቕቶ ካንትኹ ባርሴሎናው ዎክቱ ስፖርቱ ዳይሬክተር ሜሲዋ አግፅኹዳ ውሎ ፌሬምፅኾ:: እን ኬሴትስትኹ ጊዝዴስ ሚንችካ አሜትካዴስ ፋሌንጋ ታሪክ ካንትስታኒ 46 ዋንቼ ጉሽጝስ ልኩ ኩታው ታሪክዳ ቤዴራንቲ ክብረ ዎሴን ዌናኽ::

ሱኺቲኒ ባሎንደሮ ዊፁስ 8ቲኒ ዴሜካ ፊፋው አሜቱው ጐቤዝ እንክራንቲ ያኻ::

6 አውሮፓው ወርኩሳ ቻሞ ዊፅጝስስታ እምፕል አሜትስ ይቪቺ 91 ጎልካዋ ቼፍፅጝስ ጊነስ ቡክዳ አኹኪ ጊሪምፂ ታሪኩ ሜዝጌብዳ ጚውሳ ክብሩሳ ስሞ ፃፋ:: አሊዲዳኪላ አሌሙሳ ዋንቼስታ ላጛ ሲፍጝጚው ኮፓ አሜሪካው ዋንቼ ጉሽጝስ  ኩታው እንካናንትካዋ   ፍትኽፁስ፣ ጎልካዋ ቼፍፁስ ካንትስታ:: ኩታዋ ፋዩታ አዜዝጝስ ልኩ ኩታዋ እንካናንትካስ ጌሬምፃውሳ ካሌቕቶ ካንትፃ ልኩ ኩታው እንክራንቲ ሊዮኔል  አንድሬስ ሜሲ::

ታደለ አጋጄ