ይሴና አጌራስ እጋዊ ምንግስት

“ጉላሊ ካስጛላ፤ አጌራኪላ ፂናላ፤” ናው ቴስፊ አቲስጙ ድምፆ፣ ጋቻውስታ ችግሩ ድምፅ ይቶፒያኩ ባላንጋርካዴስ ቹኒትስታሺኹ ወክት ዜኔግስታቲዊያኽ::

አሱ ንቫርስታ ሚዲያው ዝማቺኪላ እዝቦ ጅፍንትሾ ሚፅጝስ ቴኬምስታሺኑ ፖለቲካው እንግራ ይጉዊ ካንቲ እሺኾ:: እንጚጊ ኩፅኒ ሳኪትጛውላ  ይጉዋ::

ኪቻካ እዝቡ ጉላሊስ ቲሪትጛው ምንግስት አጌር አቑሳ ክችክችቶ፣ ኔፃንቶስታ እጉሳ ሴግቴንቶ ቼሜትጝፃው ዝቤናዊ ፖለቲካው እንዝጚያኽ:: እንጚሳ ካንትኹስኪላ ቤዴራሱ አሜሪካው ፕሬዝዳንት አብርሃም ሊንከን ዲሞክራሴ “እዝቡ፣ እዝብስ፣ እዝቡ ጉላሊስ ቲሪትጛው ምንግስትስ ያኻዊያኽ” ናኒስ ጌሌፁኑ አኽጝ ድኹስቴ::

እንጚኪላ እምፕል ምንግስቱ ስልታኑ ጜዋናስታ አሊዴ ውሳኔ እያንቲ እዝብ አኽⶓ ግልፅስ ካንትፄ:: ይቶፒያ 7ንቴ ትክላሌ ጉላሌ ሳኪትጙኽ ዳድስ አሌድታታ እስካዌ ምንግስቶ ቲሪትጝፅጙ ታሪካዊ ቤንዳ አግስቲ:: እንጚኪላ እስካዊ አጌራዊ ቤን ይንታንኩ አንኩዋ አሜትካስ አጌራዋ ኬፍንኹ ውላቱዊ ኪሲሾስታ ሳኪትጚሾ ካይጝፄ እስታማ ቴስፋ ፄውስታ::

እስካዊስ ቲሪትጙኽ ምንግስትዴስ እዝብ እንዳራይ ፋያ እኑሳ ዙሚትጝፁኑክዴስ ክንትፃንታ ማንተግቦሽ ትላሁን እዝብካው ዝቤንካውሳ ካሴ ዙርፅጝስ ጄሜርስትኹ ኽሳንትካ ፕሮጄክትካውሳ ግንባቴ ውና ፄውጝስ ካሌ ናውሳ እምኔቶ ቺፄካ::

ዊዳፌ ሰላሞስታ ብሄራዌ ዴክቶ አምንጝፃው ዳድስ ቼሜትጝፅጝ ዴሜካ ቹዋ ምንግስቱ ቴግባር ያኼ ንካማ ማንዲትጛውሻና:: ጄግንቱስታ ውንቲኒ ቴግባር ካልስ ያኻውላስ እንፂኺሰ ሊኪስታውሳታጊ እስካዊ ምንግስትኪላ ፌይኹሳ ዳንጉኔ ክችስጝስ፤ ሳኪትጜ ዴሜካ ሲፍፅጝስ እዝቡ ልማቱስታ ሰላሙሳ ፃንቑናዋ ዙርፄ ናው ፂኑኽ እምኔት ዝኩክ አኽⶓ ጉሽካ:: እዝብ ዴሜካ ሰላማዌስታ ኩስጚውሳ ታሪኮ ሲፍፃማጊ ምንግስቶ ዴጌፍጝ ማንዲስታው አኽⶓ ቶኬምካ::

እሊው ካንቴ እያንኩ አንኪሺ ጉዋጉሲ ወረዳው ዝኩዋንቲ አቶ ካኘው መኮንንኪላ ይኮኖሚዳስታ ስሩሳ ልማቶ ዋኽትጝፅጝዳ ትኩቶ ፄውጝስ እዝቡሳ ድኽቶ ይጉፅጝስ ካላውሳ ምንግስቶ ፋያንኩ አኽⶓ ድኹዌካ:: ዙራሙሪ ቺፋ ጄሜርስትካማ አሌድስትካያስኩ ስር ልማቱ ፕሮጄክትካኪላ ወክትስ አሌድስትካማ ካንትⶓ ፋያና::

ዝኩዊኒውሳ ክብርናቴ አሬኬዝፅጝ፣ እጎ ኬቤርፅጝስታ አጌር አቑሳ ዴክቶ ማንዲፅጝኪላ እስካዊ ምንግስትዴሰ ማንዲስታው አኽⶓ ዲብስካ::

ፄጌሩ ዙሪሙሪዳ ክንቲ ጝና ቲኑ ኾትካ፣ ሜብራት አኹኪ ኤሌክትሪክ አይልስታ ኔትወርኩ ታምብስታንት እሳንጛማ ሌጌሱኽሳ ዙራሙሬ ካንትጝስ እንጉስ ማንዲትጛንኩ አኽⶓ ቶኬምካ::

እዝቡ ወኬልስታንትካው ኩስጚ ጝናው  አኹኪ ፓርላማው አባላ ያኼካማ ጎሌልስቱንኩ ኬቤርስቱንኩ ወይንሸት ነጋ ጛሾስ እዝብ አምናማ አንኩዋ አሜታሱሳ እዝቡሳ ውክልኔ እይኹሳ እዝቦ አሜሴጌንካ:: እዝብስ ቱኑሳ ካሎ ፌፄምጝስኪላ ካሎ ቱዌካ::

አዊ ብሄረሰቡ ቺፅጝፂታ ፌዴራሉ ምንግስቱ ባጄትስ ጄሜርስቱንኩ ፕሮጄክትካ ወክትስ አሌድስታንታ ሲፍጜ ፄዋንኩ አኽⶓ ጉሽካ:: ፍታዊ አብቱ ቴኬምስታንት ዝኩዋታኪላ ድምፆ እንኩዋኽፃና:: እዝቦ ቴኬማውሳስታ ፍንሾስ ካይፃውሳ እጎ ፍሽጝስታ ፉኽ እግ ቴግባርዳ እሼማጊ  አኽⶓ ሲፍጝጝኪላ ፓርላማው አባልካው ቴግባር አኽⶓ ኽይትጝፄካ::

ባጄትስትኹ ባጄትሰታ አኬድስትኹ እክድ ቴግባርዳ እሼማ እዝቡ ትክም ኬቤርስታታ ፌፄምፃንትካ አካልካዋ ይስጝፅጝስታ ሲፍጛማጊ ጋማጋምጝኪላ እምፕል እዝቡ አዴሪያኽ::

ፍንፍና እዝብሊ ኩስጛማጊ እዝብሳ ካሴስታ ክሬቴ ቹኒታማ ትኩታው ቤን ኽያታ ፄውጝኪላ ወኬልስታንትካው ግዴቲ አኽⶓ ጉሽካ:: ጋያኪ እዝቡ ሰላሙስታ ልማቱ ካሲኪላ ቢዲሬ ትኩቶ አግፃማ እዝብ ቴኬምስታታ ፄውጝስ እንፃኽስስታንኩ አኽⶓ ጌሌፅካ:: አብቶ አፌራማ ኔፃኔትስ ዝኩጙ እዝቡ ሜብትኪላ ቼሜትጛታ ፄዋና:: ሰላሞ ኬቤርፅጝሰ ፋንኩ እግካኪላ ቴግባርዳ እሺካማ እዝቡ አቕቱስታ ዲሞክራሲው ሜብት ቼሜትጛታ እስካዊ እዝቡ ወኬልስታንትካው ኩስጚ ጝናሱ አባልካዴስ ማንዲስታው ቴግባር አኽⶓ ቶኬምካ::

እዝቡ ኔፃ ጉላሊስ ቼሜትጙኽ ምንግስት ናካዳ አጌራው ፖለቲካውሳ ዳብዜ ክችሳው ቻዳ ዳሜካ ኽሳንታ አጌራዋ ኬፍፃው አኽጝታጊ ምንግስትኪላ እዝቡሳ አዴሮ ቱስቲስ ፊትጛታ ሲፍጜስታ ግምጋሜ ፄውጙ ስልታን እዝቡ ወኬልስታንትካው አኽⶓ ዊዛሩ ወይንሸት ቼሜትጝፄካ:: እዝብኪላ ዋሺኔኪ ካሴኪ ያኻ ክሬቴ ዲግስጙ ሜብት ዝኩታ ያኻማ ኪሲ ሜዜጌብስታታ ኩፅኒ እዝብዴስ ማንዲስታውሳ አላፍቶ ፊትጛታ እቑዌ ዲግስካ::

ትክትሊ ቺፅጝፂ ጛሪሱ ማሬግስ ክልሉ ማቤራዊ ዜርፍ ቴቬቬርጝፃንታስታ ክልሉ ኩስጚ ጝናሱ አቫላ (ዶ/ር) ሙሉነሽ ደሴ አጌራ ምንግስቱ ግንባቲስ እዝብ 7ንቲ ትክላሊ ጉላሊዳ ካንትፅኹሳ ኩርፄንቶ ጋሼካማ እዝቡሳ አዴሮ ፊትጝጝስ እክድ እምስትⶓ ኽይትጝፄካ::

ኽሳንታ አጌራው ግንባቲስ ይሴን እዝባዊ ጉሽፂ ዝክኹሳ ምንግስቶ ቲሪትጝፅጝ አጌር አቑ ቢዲሪ አላፍት አኽⶓ ቶኬሙንኩ (ዶ/ር) ሙሉነሽ እዝቡሳ ውክልኔ አግፁኽ ምንግስት ዴሜካ አጌራዳ ሰላሞ፣ ዴክቶስታ እጎ ኬቤርፅጙሳ አላፍቶ ይሴንትስ  ፊትጝጝ ማንዲሰታው አኽⶓ ጌሌፅካ::

እስካዊስ ጎሌልስትኹ ምንግስት እዝብ እይኹሳ አዴሮ አምንስትስ ፊትጝጝስ አጌር አቑሳ ዝኩዊኒውሳ ሴሎ ኬሽጝፅጝስስታ ኬፍፅጝስ ካሊፃንኩ ኽሳንትካ ፕሮጄክትካ ውና ያኻንታ ትኩትስ እንፃኽስስታው አኽⶓ ዲብስካ::

ክልሉ እዝብ እምፕልትስ ኬቬቬርጛማ ዝኩጝዴስ ጃላ ልማትስ ኬሽጛማ ዝቤናዊ እንፃኽስትጚው ጜዋና ያኻታኪላ ካሊፅጝስ እንፃኽስስቴ::

ማቤራዊ ዜረፋስኪላ ቲኑ ኾትካ እሳንጛታ፣ ቱስቲስ አጌላጌላንታ፣ ቹትካውስታ ስራስሪው ቑንዚስታ ክርጝ ኔኬታታ እንቲታኪ እጁ ዲግስጚው ችግር ኽይስታታ ክልልታ 25 አሜታስ ቴርቱኽ እክድዴስ አንኩዋ አሜታስ ሳኪትጝፅጝስ ካላውሳ እክዶ እሜማ ምንግስት እንፃኽስስታው አኽⶓ (ዶ/ር) ሙሉነሽ ኽይትጝፄካ::

ሙስኒስታ አግልግሎቴ እይጚዳ ካንትስታው ዳንጉኒ ክቼታ እዝቡሳ ታክስጜ ክችስጝዴስ ጉሽፃማ አግልግሎቴ እይጜ ቴክኖሎጂሰ ካይጝፅጝስ ሙሱቡ እምፕል ማይኬሉሳ አግልግሎቴ እሳንጝፅጝኪላ እስካዊ ምንግስቱ እክድያኽ::

ድኪታኪ ባኩንታ ምንግስት ኬሼ ናማ ሰላማዊ ዳድስ እዝብ እይኹሳ ስልትኖስታ አዴሮ ፊትጝጝ ዋሺኒኪ አመራርዴስስታ ኩስጚ ጝናሱ አባልዴስ ማንዲሰቴ ኑንኩ  (ዶ/ር) ሙሉነሽ ጎሌልኹሳኪ ያኻ ጎሌላያሱሳ እዝቦ ክችክቺሰ አጌላጌልጝስ ካሎ ቱⶓ ዲብስካ::

እዝብኪላ ፌቴርስታውሳ ችግርኪ ያኻ ዳንጉኔ ጋቻዴስ ኪቻ ኩስጚስ ኽይጙሳ ባይሎ ይስጝፅጝስ ኽሳንታ አጌራዋ ክምንትስ አሬኬብፁጙሳ ግዴቴ ፊትጝጝ ፋይፄ ናኒስ አዴሮ ዲግስካ::

ንግስቴ ተስፋ