ቴስፊ እንኩርስቱት አትሌታ

አሌሙ አትሌቲክሱ ታሪክዳ ይቶፒያው ሊጊሲሚ እቺቱ ጊጛንትካው  ስም ጁዋኒ ቤዴራማ ይንታው ዊፅጙስታ ፂኒጙ ድልስ አቕስቱንኩ ቤዴራስኩ ጄግንካ አትሌትካኽ:: እን አጌራ ሊጊሲሚ እቺቱ ጊጚስ ሚዚጊብፂኹስታ ሚዚጊብፄታጊ አግስቴው ጊሪምፂ ድል አጋታሚታ ይንትኹ ያኺቲየስ ክምንትስፌያፌይጙስ ሲፍኹ ፂኒጙ ዋይሚያኽ:: ደራርቱ ቱሉ ባርሴሎናዳ ጄሜርኹ ኩሪፃው ታሪክ ጌቴ ዋሚ፣ ብርሃኔ አደሬ፣ ትሩነሽ ዲባባ፣ መሰረት ደፋር፣ አልማዝ አያናስታ ጉዳፍ ፀጋዬ ፄጌራንኩ አትሌትካስ አሌሙ ሜድሬኽዳ ስም ኬፍናማ እቑስታታ ፄዌካ ::

ናካዳ ዴሜካ እንሳ ኽሳንቴ አዴሮ አሬኬብስትጝስ ይቶፒያውሳ ሰደንደክአላማ ኬፍፅጝስ አጌራውሳ ስሞ እቑፄታጊ አግስቴት ልክና አምባውያኽ:: አትሌት ልክና ካሚንስቲኹ ምስራክ ጐጃም ዞን ቢቡኝ ወረዳ ሊሊቲ ስምስ ሉባ ጊዮርጊስ እሰታው ጌፄሩ ዙራሙሪዳኽ:: ጊጚው ልኺትጚሾ ትይኹኪላ  ፍትሬትስ አግፂኹሳ ካሌቕቶ ቴኬምስትጝስ ያኹስ ክንቲ ጝና ካቱስ ኹሉ ቺፋ ልኩስ ናኺስስ ሊጊሲሚ እቺቶ ጊጝጝስያኽ:: እንዴስ ጄሜርኹ ጚው ጊጚው ታሪክ ናካዳ አሌም አቡቕስ አንኩዋ ሻይ ሜትርስታ እሊዉ ልኺትጚዳ አጌራዋ እቑፂት ጄግና አትሌታኽ::

አትሌት ልክና አውሮፓው ዝቤን ቼፍታ 2019ዳ ጄሜራማ ፌዩንኩ ላጚቲ አሜትካስ ዝኩዊኔ ፄውትኹ አውሮፓው አጌር ስፔንዳኽ:: አውሮፓዳ ፄውስታንኩ ልኺትጝካዳ ይሴናስታ ኮሜች አትሌታ አኽጝስ ኩሪፃውሳ ድሎ ሚዚጊቢፄታጊ አግስቲ::

ጚውሳ ጌሬምፃውሳ አክሞ ካንቱንኩ አውሮፓኩ አጌርካ አጌሮ ኪስታታ ጊጝታታ ጌንዜብስስታ ኬሽኹ ዝኩዊኒስ ካሲኒውላ ልክና ኩፅኒ “አጌሮ ኪሳላ ይት አጌራስ ጊጝጝስ ፋቴ” ኒስ ዲጉኽሳ ካሴ ቻቤልታውላስ ቲጉዋ:: ጊጚስ ዊፅጝዴስ ድምክና ጚ አጌራስ ዝኩኽሳ እንካኖ ሚሲኪርፄ:: ይቶፒያው አትሌቲክስ አሌሙ አቡቑ ልኺትጚዳ ዋይሜ አታማጊ ይንትኹ ጊዝዳ ልክና ኩፅኒ አጌርስ ጄግና አትሌታ አኽⶓ ካንትፄ::

አትሌታ አሌሙ አቡቑ ሜድሬኽዳ እምፕል ሶኼታኻዳ ካስጙኽ ልኺትጚዳ ሲፍጝጚስ ዊፅጝስ ወርኩሳ ሜዳሊያ አግፄ:: ጌሬምፃው ፍትሬቱ ካሌቕትዌና ልክና  አሬኽትስ ልኺትጜ ዊድጝ ይንታው ኽሳንትካ ልኺትጝካዳ ቴስፊ እንኩርስቱት አትሌት አኽⶓ ሚሲኪርፄታጊያኽ::ኽሳንትካ አትሌትካውሳ ዴሶ ካፅጝስ አሌሙ አደባባይዳ አጌራውሳ ስሞ ኬፍፄታ እቑፅጝስ ይስታታ እንፃኽስቴታጊያኽ::

ታደለ አጋጄ