አይ ባሎንዶሩ ዊፃንቲ ያኼ?

ሊዮኔል አንድሬስ ሜስስታ ክርስቲያኖ ሮናልዶስ 20 አሜትካስ እምስታማ እጂኹ ልኩ ኩታው ኬፍቲኒ ሽልማቲ አሌሙ ልኩ ኩታዳ እስካዌ ንጉሶ ሹሚጝስ እንጉስ ማንዲስታማጊያኽ::

2026ው ባሎንደር ሽልማቲው ቴርት ትክምቲ 16 ጌርክ 2019 ም/አሜታዳ ታሪክስ አባላምቲ ጊዝስ ለንደን ኬቴምዳ ካስጜ:: ንጙዊን ባሎንደሩ ሽልማቲስ እንክራንትካው ጌሬምፂ ካሌቐትስ፣ ኬችዳ ካንትፁኒ ሳኪትጚስታ ዲጊስ ካስጙኽ አሌሙ ዋንቺው ልኺትጚዳ ስርታማ ፄውስታው ይሴን ልኺትጚያኽ::

ልኩ ኩታው ታሪክዳ ካቢትጝጚስ ካንትስትኹስታ አሌሙ ዋንቺ ካስጙኽ አሜትዳ ባሎንዶሩ ሽልማቲ ዎሴንስታው ክሌብካው ልኺትጝካዳ ቼፍስታንኩ ጎልካስ ይቪቺ ያኻውላስ እን ኽሳንቲ አሌሙ ሜድሬኽዳ ካንትስታው ካሌቕትስያኽ:: አኽጝስኪላ 2026 ባሎንዶሩ ዊፃንቲ ዎሴንስታው አሜሪካ፣ ካናዳስታ ሜክሲኮዳ ቴርሱኑ አሌሙ ዋንቺዳ እንክራንትካ ካንትፁኑ ካሌቕትስ እስታማጊያኽ::

ሽልማቲስ ታሜትስቱንኩ 30 እንክራንትካው ስም ዝርዝር  ይፋ ያኹስ እኒጛ ክቻዴስ ሹኻ እንክራንትካው ስም ንጝኪ ፈረንሳዩ ካሊያን ምባፔ፣ ባርሴሎናው ሌጌሳታምቢ ላሚን ያማልስታ ባየር ሙኒኩ ጎሉ ማሽን ሀሪኬን ዊፅጝስ ቤዴራ ግምት እንኩርስቱኩ እንክራንትካኽ:: ሪያል ማድሪድዳ ጌሬምፃውሳ ካሌቕቶ ካንትፅኹ ኪሊያን ምባፔ  ብሄራዊ ኬችስስታ ክሌብስ ፌይፅኹ ሳኪትጚ ሽልማቲስ ቢዲሪዳ ታሜትስታንቲ ፄውጝስ አሌድስትኹ ልኺትጚው ዝቤንዳ ትክላሊስ 66 ጎልካስታ 15 ጎልስ ያኻንኩ ኩታዋ ቻቤልጝፅጝስ ትክላሊስ 82 ጎሉሳ ቴሳትፎ ፄዋ:: እሊውሾስ ላሚን ያማል ጌና ሌጌሳ ታምቢ ድሚዳ አውሮፓው ልኩታዳስታ አሌሙ ዋንቺዳ ካንትፅኹ ካሌቕት ሽልማቲስ ኽሳንቲ ግምት እይስታ:: ልኺትጚው ዝቤንዳ 25 ጎልካዋ ቼፍፅጝስስታ 18 ጎልስ ያኻንኩሳ ኩታዋ ቻቤልጝፅጝስ ትክላሊስ 43 ጎልካዳ ኩታ ቴሳትፎ ፄውጝስ ሌጌሳታምቢ እድሚዳ ፌቴራው ጌሬምፃው ልኩ ኩታው ልቕልቕቲ ሜስፌርትታ ዲጋ::

ሀሪኬን ፌይኹ ልኺትጚው ዝቤንዳ ባየር ሙኒክስስታ ጚው አጌርስ ሜዜጌብፅኹ 73 ጎልካ /ክሌብስ 51 እንክርካዳ 61 ጎልካዋ/ ቼፍፅስ ላጜታ ጎልስ ያኹንኩ ኩታዋ ቻቤልጝፃ:: እንኪላ ክሌብስ ካንትፅኹ ኽሳንትት ድምፆ እያንትካዋ ጉስጝስ ካሌ::

ፌይኹ አሜቱ ባሎንደሩ ዊፃንቲ ኦስማን ዴምቤሌ ፌይኹ አሜቱ ሻምፒዮንስ ሊጉሳ ዋንቼ ጉሽጝስ ያኻውላስ እንክራንትካ ካንትፁኑ ጌሬምፃው ካሌቕትስ  ቻኒስቶ ፌቶራንኩ እንክራንትካ ቻኒስትስታ ሚዲያው ቻኒስት አኽⶓ ስክይ ስፖርት እንቤብፃ:: አኽጝስኪ አሌሙ ዋንቺው ዋይሚስታ ያኹንኩ እንክራንትካው ጛርቱ ቻኒስት ድምፆ እይጙሳ አኺኔ ኪስጝስ ካሌ:: ኪልያን ምባፔ፣ ላሚን ያማል አኹ ሀሪኬን ባሎንዶሩሳ ሽልማቴ ዊፃና:: እንቶጂሱሳ ካንቴ ታምፃን::

ታደለ አጋጄ