ቹኒትስታያሱ ክልኽ

ናካ እን አጌራዳ ዋሺኒኪ ዙራሙሪዳ ዝኩዋው አጌርአቒስ ዳማዴስኪ ጃላ ምኽምኽፅኹስታ ማልጛ ዴሜካማጊ ይንትኹ ዝኩዊኒው ክብርናቲያኽ:: ቹዋ እስታንኩ ምግብስ ያኻንኩ ምርትካ፣ ጝን ክራይ፣ ክንቲዳስታ እክምኒው ዋይሚ ጌርክዴስ ጌርኮ ዴሜካማጊስታ ጄውጙ አክምዴስ ጃላ ያኻማጊ ይንታ:: እን አኺኒስ ዜሬቕቲኒስታ ክቻክቺ ሚፂ ዝኩክ እምፕልታቕኩ ቤንካዋ ጌርክቺፋሱ ይወትዳ ይዝኩዊ ፍታኒዳ ቱዋታ ፄዋ:: ቹኒትስታቲው ክልኽ ያኻማኪላ ሲፋ።

ዋይሚው ክብርናቲው ጉሽፂ ውትኽትኺስታ አጌራኻሱ ምርት እንፂት ፣ምርትካው ዲግስጚዳ ሊሊትጙንኩ ፅንጋኽካ ጌቴምጝ፣ ዋፅዋፅካ ደላልካው ቱስታ ጋቲው እንፃኽስትጚ አሌም አቩቑሳ ይኮኖሚው ቻኒስቶኺስታ ዝኩኽ ቻኒስትሊ እምትጙኽ ዳድ ዝኩኺያኽ:: ችግሩ ውትኽትኺ አኽጝ ማልጛ ቺጊርፂስታ ስሮ አግፅጝስ ሳሴር ጋቲው ያኹኒኪላ እምፕልታቕዳ ፌቴርስታውሳ ቻኒስቶ ሳሴርፅጝስ ካሊፃንኩ ጊዛዊስታ ሲፋንቲ ዝኩኽ ሜፍቴ እምቢት ናማ ቴግባርዳ እሽፅጝ ቺፅጝፂው ስታ ፖሊሴ ፍሻንትካዴስ ማንዲስታው ማልጛ ትኩቶ ፋያው ጉዳያኽ::

እን አኽጝስ ዝኩዊኒውሳ ክብርናቴ ክችስጝስስታ አጌር አቑሳ ጌርክ ቺፋሱሳ ሲኪኪኔ ኔኬትጝስ አቫላምቲዳኪ ጌቤሎ ቺፅጝፂው ቴርትስ ሼኬቱሳ ታምስታንቶ ክችስጝ ፋይፄ። አሜሬታንቲስታ ምርቶ ፋያንቲ ክቻዳ ዝኩኽሳ ቱስታ ጋቲውሳ ደላልካውሳ ክችሾ ቱⶓ ካላካልጝጝስታ አሜሬታንትካ ምርቶ ኩታ እምፕልታቕስ ዲግጝስ ካላውሳ ዳዶ አሜቼችጝፅጝስ እምፕልት እንፅኽካው ማቤርካዋ ይስጝፅጝስታ እሊኩ ጌርክካዴስ ድምክና አድጉዊ ጌቤላሳ እሳንፃማ ሲፍፅጝስታ ይስጝፅጝ ቱስቴ። እንዴስ ድምክና ኩፂ እጋፊ ዳድስ ምርቶ ቤፍፃንኩስታ ጌቤልዳ ምርት እንፂጝ ጌቴማታ ፄዋንኩ አካልካዳ ይሴኖስታ እጋዌ እርምጄ ካፅጝስ ጌቤሉሳ አሬኬዝፅጙሳ እንፅኼ እንፃኽስትጝኪላ እሊው ጉላሊ ዳድያኽ።

ሲፋንቲስታ ቹዋ ሜፍቲ አጌራኻሱ ዋሺኔኪ ምርቶ ሌጌፅጝያኽ። እንስኪላ ግብርኔ ዝቤንፅጝ፣ ዚሪቕቲኒስታ ክቻክቺ አችዳ አግስታንኩ አሜሬታንትካስ ፋይፃውሳጊ ድጋፎ ፄውጝስታ ባርኾቼውሳ ምንዛሬ ቱስታውሳ ቴኬምስትጜ ሲፋንታስታ ማልጛ ፋይፃንኩ ሼኬትኩ ምርትካስ ቢዲሬ እይጝስታ ዲግስጚ ኬሽጛታ ፄውጝያኽ።

ምንግስት ዚሪቕቲኒ ሚፂ ዝኩክ እምፕልታቕኩ  ቤንካዋ እርዳቴ ፄውጝስ ካላንኩ እንፃኽስትጝካዋ እሳንጝፅጝ ቱስቴ። ዝኩዊኒውሳ ክብርናቴ ቲሪትጝጝ ምንግስቱ፣ ቼፍጝጛንትካ ኾትካ፣ ጌፁ እምፕልታቕስታ ምታኒ አብቱ ውማይቴንካ ማቔንትጝካዋ ካሴው አጌራዊ አጄንዲ አኽጝ ቱስቴ።

ትክላሊስ ዝኩዊኒው ክብርናቲ አጌር አቕዳ ፌቴራውሳ ቻኒስቶ ኔኬትጝስ ዙሚትጝጚዴስ ፌይኹስ ዋይሚስታ ያኹኽስታ ቴግባርስ ካንትስታው ሜፍቲውሳ እርምጄ እምቢት ናማ ካፅጝ ፋይፃንቲስታ ቻስ እስታቲው ጉዳያኽ።