ፌዩንኩ አሜትካዳ ምንግስት ግብርኒው ዜርፍዳ ሊሊቴ ትኩቶ እያማ እንፃኽስትጝስ ኬሽኹ ኪሲ ካንትስታማጊ አግስቴ:: አሬሳቻንትካ ምርቶ ሌጌፅጝስ፣ ምግቡሳ ዋስትኔ ቼሜትጝፅጝስስታ ኬሽኹሳ ዝኩዊኔ ጉስጝስ ግብርኒው ውማይቴንካውሳ ኩስጜ ቻቤልካማ አኾቲ ልማቱ እንፅኺዳ እሳንስ አሴሜርጜካማ እንፃኽስታና::
አኾቲ ልማቱ እንፅኺ ሊሊትጙንኩ አኹኩሳ ጉላልካዋ ቴኬምሰትጝስ ሳኑ ዎክትዳ ሴብሎ አሜሬታኑ ዳድያኽ:: እሳን እርሺው ብቲዳ ብንዴስ ፋውሳ አኾ ቴኬምስትጝስ ብቲ ቻቤላውሳ ሴብሎ አሬሳቻንትካ እምፕልትስ ሊሚፃና:: አኾቴ እሳንስ ቴኬምስትጝስ ምርቶ አሜሬታንኩ ባንጂ ወረዳ አስቑኒ አቡ ኬቤሊው አሬሳቻንትካ አኾቲስ ኬሽኹሳ ሴብሎ አሜሬትጝስ ቤዴራ ቴርቶ ፄዋካማጊ አኽⶓ አውጚው ራዲዮንስ ካንቴ እይካ::
አስቑኒ አቡ ኬቤሊው አሬሳቻንቲ በለው አዳል ሴብሎ አኾቲስ ሊሚፅጙ ዴስ ሌጌሳማጊ ይንትጝስ አኾቲው እንፅኺዳ እሳንስ አሴሜርጜካማ እንፃኽስታንኩ አኽⶓ ዲብስካ:: አኾቲስ ሊማው ሴብልዳ እንዳርማኪ ፍትሬቱ ኬሴትስ ፂኪስታቲው አኽጝስ አሜት ቺፋ አኾቲስ ኬሽኹሳ ምርቶ አሜሬትጝስ ቴኬምስታንኩ አኽⶓ ዙሜካ::
ናኪኒ ዎክት አኾቲውሳ እርሼ አሬሳኑ ጊዝ አኽⶓ ቶኬምካማ ሊሊትጙንኩሳ ሴብልካዋ ሊሚፃኑሳ ብቴ ላሳላስፅጝዳ አግስታንኩ አኽⶓ ድኹዌካ::
አሜት ቺፋ አኾቲስ ሊሚፃኑ ሴብል ጛጛርትጛሱሳ ዝኩዊኒ ኪስጝዴስ ፌይኹስ ምርቶ ጌቤልስ ዲግስጝስ ቴኬምስታንታ አኽⶓ ዲብስካ:: አኾቲ ልማትስ ሊሚፃኑ ሴብልስ ኮምፖስቶ ቴርስጝስ ቴኬምስታንኩ አኽⶓኪላ ቶኬምካ::
እሊት ባንጂ ወረዳ አስቑኒ አቡ ኬቤሊው አሬሳቻንታ እንዬ የሽዋስ አኾቲ ልማቱሳ እንፅኼ ትኩቶ እይካማ እንፃኽስትጝስ ኬሽኹሳ ምርቶ አግፄካማጊ አኽⶓ ድኹዌካ:: አኾቲስ ሊሊትጙንኩ ሴብልኩ አይኔትካዋ ሊሚፅጝስ አሜትዴስ አሜቶ ዝኩዊኒዳ ኪሴ ካንትፅⶓ ቶኬምካ:: እንዴስ ቤዴራ አሬሳቻንትካ ዴስስ ሴብሎ ዜራኑ ጉዝማ እሌትዴስ ፌያቲውሳ ምርቶ አግፃሺንኩ አኽⶓ ቶኬምካማ ናካ ኩፅኒ ግብርኒው ውማይቴንውሳ ኩስጜ ቻቤልጝስ ጉዶ ምርቶ አሜሬትጝስ ትክሞ አግፄካማጊ አኽⶓ እርዳትፅካ::
አሜትዴስ ላጚኒ ኮምፖስቶ ቴርስጝስ ሴብል ኬሽኹሳ ምርቶ እያታ ይስካማ እንፃኽስትካማጊ አኽⶓ ቶኬምካማ ጌቤልስ ማልጛ ፋይስታንትካ ያኹንኩ ሴብልካዳ ትኩቶ እይካማ እንፃኽስትጝስ ኬሽኹሳ ምርቶ አሜሬትጝስ ቴኬምስታንኩ አኽⶓ ድኹዌካ:: ጛው ዙራሙሪዳ ስንዳይ፣ ጉባሪ፣ ቡን፣ ዱኒዚስታ እሊኩ ቴጋንኩ ሴብልካ እሳንስ ዋጋንኩ አኽⶓኪላ ቶኬምካ::
አኾቲስ ሊሚፃኑ ሴብልዳ እንዳርማኪ አኹ እንፂት ጌቴማቲው አኽⶓ ዙሙንኩ ዊዛሩ እንዬ ስንዳዮስታ እሊኩሳ ሴብልካዋ ምስሊስ /ኩታግትሚስ/ ዜርጝ ኬሽኹሳ ምርቶ አሜሬታንታ ካሊፃው አኽⶓ ዲብስካ::
አኾቲስ ሊሚፃኑ ሴብልዳ ግባቶ ቴኬምስታንኩ ያኹኒውላ አቓ ግብሪ ማዳባሪ ዋይሜ ዴሜክጝ ኩፅኒ ፋይስታውሳ ላካሳ ግባቶ ቴኬምስታቲንታ ፄውⶓ ዙሜካ::ግብርኒው ውማይቴንካ አሬሳቻንትካ ፋያኑሳ ጉልሌ ዜሮስታ ግባቶ ዎክትስ ዲግሳያንታ ኪላ ካሲካ::
ባንጂ ወረዳው ግብርኒው ፅፌት ጝናሱ ትክትሊ አላፊ አማረ ማሞ ወረዳ እንዴስ ቤዴራ አኾቲስ ሊማሺኹ ብቲ 50 ሄክታርዴስ ኽሳቲው እሺኹ አኽⶓ ቶኬምካማ ናካ ኩፅኒ 5 ሻይዴስ ጃላ ሄክታር ብቲ አኾቲስ ሊማማጊ አኽⶓ ዙሜካ::
ወረዳዳ ችኹ ዎክትዳ አሜሬታኑ ሴብልዳ ፍትሬት ኬሴት ጉዳቶ ታምፃው አኽጝስ አኾቲስ ሊሊትጙንኩሳ ሴብልካዋ ሊሚፅካማጊ አኽⶓ ጌሌፅካ::
ዝቤናዌ ቴክኖሎጄ ቴኬምስትጝስ እሌትስ ቴኬምስታኑ ሴብልዴስ ፌይኹስ ስንዳዮ ጌቤልስ ዲግስጝስ እሳንስ አሜሬትጝስ ቴኬምስታንታ ያኼካማጊ አኽⶓ ዙሜካ::
ወረዳዳ አግስታንኩ 20 ኬቤልካዳጊ ግብርኒው ውማይቴንካ አሬሳቻንትካስ ውማዩሳ እርዳቴ ፄዌካማጊ አኽⶓ ጌሌፅካ::አሬሳቻንትካ አኾቲስ ኬሽኹሳ ምርቶ አሜሬታንታ ጉልሌ ዜሮስታ ግባቶ ዎክትስ ታምባታ ፄዌካማጊ አኽⶓ ጉሽካ::
አማኻሪ ክልልታ 2018 ምርቱ ዝቤንዳ አኾቲስ ሊሙኽ 932 ሻይ ሄክታርዴስ ጃላ ብቲዳ 119 ትኩሚ 8 ሚሊዮን ኩንታል ምርት አግስትⶓ ግብርኒው ንቫር ምልኻቴ:: እምስትኹ ምርቱ ዝቤንዳ 734 ሻይ 434 ሄክታር ብቴ ሊሚፅጝስ 96 ትኩሚ 8 ኩንታል ምርቶ አግፅጝስ አኬድስታ:: ብሄረሰቡ ቺፅጝፂታ ዴሜካ 70 ሻይ 800 ሄክታርዴስ ጃላ ብቲ አኾቲስ ሊማው ያኹስ 7 ትኩሚ 4 ሚሊዮን ኩንታልዴስ ጃላ ምርቶ አግፅጝስ አኬድስታማ እንፃኽስስታማጊ አኽⶓ አዊ ብሄረሰብ ቺፅጝፂው ግብርኒው ሜምሪው ንቫር ቶኬሜ::
ታደለ አጋጄ