ይቶፒያው ፕሪሚየር ሊግ

ይቶፒያው ፕሪሚየር ሊጉ እስካዊ ልኺትጚው አሜት 18 ክሌብካ ክቻዳ ጄሜርስታ:: ፌይኹ አሜትዳ 20 ኬችካ ክቻዳ ካስጙስ እጄ:: ንጙዊኒ ልኺትጚው ዝቤንዳ ትክላሊስ 306 እንክርካ ካስጛና:: እንክርካ ካስጛኑ ዴሜካ አርብስ፣ ክዳሚስስታ አድጉዊ ጌርካስያኽ::

እንክርካ አዲስ አበባ፣ አዳማ፣ ድሬድዋ፣ ሃዋሳ፣ ባርዳር፣ ሀላባስታ አቢይ ኤርስሞ ኬቴምካዳ ካስጛንኩ አኽጝ አቕስታ:: እንኪላ ክሌብካ ዴጌፋንትካው ፍንዳ እንክራንታ ካሊፃዊያኽ::

ኬችካው ልኺትጚው ዝቤንዳ ልኺትጛንትካ ያኼካማ አሌድጝስ ሊሊትጙንኩሳ እንክራንትካዋ ፌሬምፅካ:: 55 ጌርክካስ ብስታ ያኻማ እጂኹ እንክራንትካው ዚዊዊርጚዳ ሚንችካ ኬችካ ጛውሳ ኬቾ ይሴና ፄውጝስ ሚንችካ እንክራንትካዋ ፌሬምፅካ::

140 ዴስ ጃላ እስካዊ ዚዊዊርጚ ፌፄምስታ:: 137ዴስ ጃላ እንክራንትካ ዴሜካ እሺኑ ኬችዳ ውሎ ፌሬምካ:: 40ዴስ ጃላ ባርኾቼ አጌራኩ እንክራንትካ አጌራኻሱ ክሌብሾ አሌቔትጜካ::

ንጙዊኒ ዚዊዊርጚው ጌቤልዳ ኽሳንቴ ልቕልቕቴ ካንትፁንኩ ክሌብካ ክቻዴስ ይቶፒያው ንግድ ባንክ አባላምቲዳ ቶኬምስቴ:: ኬች 11 አጌራኻስኩስታ 4 ባርኾቼው እንክራንትካዋ ፌሬምፅጝስ 15 እስካውካ እንክራንትካዋ ኬችሾ አሌቔትጝፃ:: ድምክኒስኪላ 15 እንክራንትካውሳ ውሎ አዴሳ:: ኬች እንክራንትካስ ፍሽኹ ጌንዜብ ልኩ ኩታው ውታኺዳ ዋይሜ አግጝስ ካንትፃው ካስትያኽ::

ይቶፒያ ቡና 11 እስካውካ እንክራንትካዋ ፌሬምፁስ ክዱስ ጊዮርጊስ፣ ባርዳር ኬቴምስታ መቻል ዴሜካ 10 እንክራንትካዋ ኬችሾ አሌቔትጝፄካ:: ይቶፒያው መድንስታ ሸገር ኬቴም ዴሜካ ጛራ ጛራ 12 እንክራንትካዋ ኬችሾ አሌቔትጝፄካ::

ንጙዊኒ ልኺትጚው ዝቤንዳ ላጜታ ኬችካ እስካዌ ሴሌቴንፃንቴ ኪስካ::

ልኺትጚው ዝቤን አሌድስታኒ ሴዛ ኬችካ ኩክሪኒ ሊግሾ  ጌማና:: ኬፍቲኒ ሊግዴስ ፕርሚየር ሊግሾ ሌግሳንኩ ዴሜካ ላጛ ኬችካ ያኻና:: 2020 ልኺትጚው ዝቤንዳ 16 ኬችካ ክቻዳ ልኺትጚ ካስጛው አኽጝ አቕስታ:: አኽጝስኪላ ኬችካ ኩክሪኒ ሊግሾ ጌምጝዴስ ፊቲጝስ ልኻዊድፄ ልኺትጜ ፄዋና እስታማ ማንዲስቴ:: ፕሪሚየር ሊጉ ሻምፒዮና አይ አኽጝስ ካሌ ናው ሚንችካስ ማንዲስታንታ ያኻ::

ታደለ አጋጄ