አውሮፓው ሻምፒዮን ሊግ

አውሮፓው ሻምፒዮንስ ሊጉ  ልኺትጚ አሌምዳ ኽሳንቲ ልኩ ኩታው ሜድሬኽያኽ:: አጌራኻሱ ሊግዳ ኼሽኹሳ ዋይሜ ሜዜጌብፁንኩ ኬችካ አሴቴፍጛኑ ኽሳንትካ ኬችካዋ ታምትጝፃው ልኺትጚያኽ:: ሜድሬኽዳ አሴቴፍጝስስታ ዊፅጝ ዴሜካ ኬችካውስታ እንክራንትካው ኽሳንቲ ሳኪትጚያኽ ::

2026/27 አውሮፓው ሻምፒዮንስ ሊጉ ልኺትጚ 36 ኬችካ ክቻዳ ካስጛማጊ አግስቴ:: እንክሪኪላ ይሴን ጁትጚስስታ ልኻዊድፂ ቡንካስ ካስጛማጊያኽ:: እን ልኺትጚ ጄሜርኹ ሰሜን አሜሪካዳ ካስጙስ እጂኹ 2026 አሌሙ ዋንቺው ልኺትጚ አሌድስቱኒዴስ ፋሌንጋኽ:: እንክራንትካ አሌሙ ዋንቺው ልኺትጚዴስ ፉራኑላስ አውሮፓው ሜድሬኹ ልኺትጚሾ ቱዌካ::

እስካዊ አውሮፓው ሻምፒዮን ሊጉ ልኺትጚው ማሊፊ ጅሜርስትኹዴስ ሹኻንቴ አሜቶ ቼፍፃ:: እንዴስ ቤዴራ እሺኹ ምድቡ ዳላዳልጚ ይጉዋማ እሊው ልኺትጚውሳ ማሊፌ እሜ::

ጛራ ጛራ ኬች ሶኼታ ሊሊትጙንኩ እንክርካዋ ፄዌ:: ሴዛ እንክርካዋ ጛው ልኩ ኩታው ውታኺ (ስታዲየም) ሴዛዋ ዴሜካ ጛው ልኩ ኩታው ውታኺዴስ (ስታዲየም)  ሴጋ    ካስጝፃና:: አግፃኑ ዋይሚው ስሬታስ እምፕላንቲዴስ ሶኼታንቴ አቾ እሚጝስ አሌዱንኩ ኬችካ ዊፃማ ፌይጙ ልኺትጚሾ ኩቲስ ኩታ ቱዋና:: 9ዴስ 24ኺስታ አቾ እሚጝስ አሌዱንኩ ኬችካ ዴሜካ ታምባ ዙሪ እንክሪስ ጛስ ጛዋ ታምትጜካማ ታምባ ዙሪ እንክሪስ ዊፃኒ ዊፃማ ፌይጙ እንክሪሾ ቱዋና:: 25ንቲ አችዴስ 36ንቴ አቾ እሚንኩ ኬችካ ልኺትጚዴስ ሴጋ ያኻና::

እስካዊ ልኺትጚው ማሊፊስ ቻምፒዮንስ ሊግዳ ትክላሊስ ፄውስታንኩ እንክርካ  189ኽ:: እምፕል ኬች ዋንቺስ ልኺትጚዳ ታምብምባ 17 እንክርካዋ ፄዌ::

አውሮፓው ቻምፒዮንስ ሊጉ ልኺትጚዳ ሪያል ማድሪድ 15ኒ ዋንቺ ጉሽጝስ ቤዴራንቲ ኬችያኽ:: ኢሲሚላን ዴሜካ 7ኒ ዋንቺ ጉሽጝስ ላጛንቲ አችዳ እንጅኩዋ::

ይሴን ልኺትጚው ዝቤንዳ ላጛ ሲፍጝጚው አሜትካስ ዋንቼ ጉሽኹ ዴሜካ ፈረንሳዩ ኬች ፓሪሴንት ጀርመኒያኽ:: ንጙዊኒ ልኺትጚው ዝቤንዳ ዋሺኒ ኬች ዋንቼ ጉሽጝስ ካሌ ናው ሚንችካውሳ ትኩቶ ጉሳ::

ታደለ አጋጄ