ፅባባ ዝኩፃ ጝና

አለሚቱ የኔት

ፔሩ ሰሜናዊ ክሙ ኦካላማ ኬቴማ ፋይፃንትካ አጌሌጌልፅካ አክኽካዋጊ ዳሊትጝፄታ እምቲት እሳንት 63 ሴንቲ ሜትሮ ሊኪስቲት ዝኩፃ ጝና አሌሙ ፅባብ ጝን አኽጝስ ካሊⶓ ኦዲት ሴንትራል ድረገፅ ዜጌባ:: ፌዩንኩ ሚንችካ ምሬት አሜትካዳ ፅባብ ጝንካ ግቢትስትⶓ አንቤብፅኹ ድረ ገፅ እምንኹ ዝቤንስ እዝቡ ሚንችት ዴሜክጝስ፣ ግንባቲው ብቲ እንፂጝስስታ ሊሊትጙንኩ አኼንካስጊ ፅባብካ ዝኩፅካ ጝንካዋ ግቢትጝ ጌዴድፃንቲ ያኻማጊ አንትጝ ቶኬምስታ::

ፔሩ ሁዋራል ኬቴኒ ኦካላማ አውራጂው ዝኩዋንቲ ፋቢዮሞሬኖስ ግቢትስትኹ ፅባብ አኹኪ ፅላ ጝናው ግንባቲ ፕላን “ጝኑሳ ሜቴኖ ስራ ፄውኽ ያኻውላስ ስፍሬ ቱስቲስ ቴኬምስትጝያኽ” ናውሳ ስሩሳ እሜ ፌያፌይጝፅጝስ አሌምኹ አኽⶓ ቶኬምኹዊ::

እንጚ ጉሽፂ አሳብስ ግቢትስቴት 63 ሴንቲ ሜትር እሳንትስ ግቢትስቲት ሹኻ ፎክ ዌና ዝኩፃ ጝና ጉል ንኹ ኬሌምስስታ ፅባብ ካምፕካስ ሻይስ ቼፍስታንኩ ጐቤናንትካዋ ጉሳንታ ታኻ::

ፅባባ ዝኩፃ ጝና ሴግዳ ያኼካማ ካንታንኩሳ ትሪትስ ዲግቱት ኪነትቤቡሳ ዋይሜ ፄጌርቱኒኪላ ውንስ ዋሺኒኪ ዝኩፂ ጝንታ፣ ፃንኩፂ ቤን፣ እንጅፂ ጝን፣ ሚጊብፂጝን፣ ኽቴናቴ እንዜጝፂ ዳድ /ኮሪደር/፣ ኹርፂ ጝና ፂንስፂ ቤን፣ ቼርካቑሲፂስታ ፎክሾ ጃላ ማቺፄስታ ጌምፄ ደረጄጊ እሚቲትያኽ::

እና ኦካላማ ኬቴሙ አደባባዩ ፍንፍኒዳ ግቢትስቲትሳ ፅባባ ዝኩፃ ጝናዋ ጐቤንጝስ እምፕላኒስ ላጛ አቒዴስ ጃላ ሌንጌድፅጝስ ካላላኪ:: “ፅባባ ዝኩፃ ጝና” ናውሳ ማሬጐ እሚⶓ ካንትኹስኪላ ማንዲትጚዳ አኽⶓ ንባብስ ቢካ:: ንቫሮ አግፅንኹኪ በኩር ጋዚቲዴስያኽ::