ቓሊፃ ደሴታ

ደቡባዊ ካርቢያኑ ባራኻዳ ቬኔዝዌላ ባሩ ዳሪዳ ግምትስ 65ኪሎሜትሩ እቺትዳ  ታንብስቱስ  እሎ ጉስታትስታ ሼዎ ዴስፄት ሊሊታ ስፍራ አግስቲ::

እና ስፍራ ዴሜካ አሩባስታ ቦኔር እስቱንኩ ዋሌን ደሴትካሊ አኽጝስ” ኤቢሲ ደሴትካ እስትጝስ” አቕስቴት ኩራሳኦዉ እስቴት   ደሴታኽ:: 444 ካሬ ኪሎ ሜትር አዩ እሳንት ዝኩት ብቲ ፍታስ፣ እዝቡ ኮንኪዉ ዳሊጝትስ፣ ጊሪምፂ ታሪክስስታ ዋሺኒኪ አሌሙ ቤንዴስ ሊሊትኹ አኺኒስ ዲኒክፄት ደሴታኪላኽ እስቴታ ድኹስታያትያኽ::

ሚንች ጊዛይ ካሪቢያንኩ ዴትካ ግድስ አቕስቱኒኪላ ሴኒዴስ ዳሮኺስታ ዝኩኽ ጊዝዳ አሜት ቺፋ ኬሴትስታዉ ድፃንቲ ባሩ አዉሎ ንፋስስ ማልጜ ታስስቲ::ኩራሳኦ ብቲፍንታ ኩፅኒ ፍትሬቱ ችግርዴስ ይጉፁትሳ ፄጌሬ:: ደሴታኪላ እን ድፃንቲ አዉሎ ንፋሱ ኬቴኒዉ ኩከሪዳ አግስቴት አኽጝስ ዝኩዋንትካኪ ያኻ ጎቤናንትካ አሜቶ ዋኾ ዋኽ አዊስታ ካጊ ያኸኽ አሬጌግጙኽ አይሩ አኺኒስ ዴስቴንካኽ:: እን አሬጌግጙኽ አይሩ አኺኒኪላ ኩራሳኦዋ 40ዴስ ጃላ ያኻንኩ ግዲታምካ ባርኩ ዳርካዋ አሚቼት ታኻታ ፄዋ:: ድምክኒስኪላ “ክሪስቶፌል ብሄራዊ ፓርክ” እስትኹ ማንዲስታዉ ስፍራኻዳኪላ አግስታዉ ብርክ ፉቺ ችሪ አጋዘን እንቲታኪ “ሼቴቦካ” /ላጜታ ባሩ ሚፅፅካ”/ እስትኹ ስፍሪዳ አይሊኒ ባሩ ሞጌድ ድንጉሊ ኖራ ካርጝሊ አይልስ ጋቺትጙስ ፌቴራኑ ትይንት ፍትሬቱሳ ዲኒክፄ አይሎ ካንትፄ:: ፟ሲንት ዊሊብሮርዱስ ፟  ቺዊዉ አይክዳ ቦግ ንኹ ሮዙ ኬሌምዌንካ ሌጌሴምካ ፍላሚንጎ ቻኽካ ሞሬፅስ ኬሌብስታኒስ ካንትጝ እሊዉ እና ደሴታዉ ፍትሬቱ  ፄጊያኽ::

ኩራሳኦዉ ታሪክ ማልጜ ጉሳንቲስታ ጃላኩክሪ ሚንቹኽያኽ :: አዉሮፓዉያንካ ዙራሙሪሾ ታምብጝዴስ ፍና ደሴታ” ካኬቲዮ”፟  እስቱንኩ  “ኤራዋክ” ዜሩ አኼር ዝኩክ ካሜንስታንትካስ ቺትጝቱስ እሽቲት አኽⶓ ንባር ቶኬሜ::

1499 አዉሮፓዉ ዝቤን ቼፋታጊ አሎንሶ  ዴ ኦሄዳ እስትኹ ስፔናዊ አሴሳንቲ አኹኪ ማራማርጛንቲ ደሴታዋ አግፁስ ካሜንስታንትካዉ ቲሪ ሊጊሲሚ አኽጝስ ፟ ወዴልካዉ ደሴታ ፟  ናማ ሰየማሼ::

1634 ኔዘርላንዱ ምራብ ህንዱ ኩባንያ ደሴታዋ ስትራቴጂካዊ ፍትሬቱ ወዴብ እሺት አኽጝስ ስፔናዉያንካዉ ክምዴስ ባይፁና:: እንጚ ጊዝዴስ ጄሜራማ ኩራሳኦ ኔዘርላንዱ ካይክማዉ ስርዳ ታኹስ አዜንፃዉ አኺኒስ አሌም አቩቑ ጋግሩጊፁ ማይኬላ ታኻታ አጌላጌልታ:: እን ልኻኹ ዝቤን 1795ስ  ፟ቱላ ፟  እስትኹ አፍሪካዊ ጋግሪስ ጉስስትኹ  ድንጉሌ አሜፆ ሌንጌድፃማ አሊዲዳኪላ 1863ስ ጋግርትጝ ይፋስ ድስኾ:: ደሴታዉ ኢኮኖሚዉ ትንሳኢ ያኹኽኪላ 1914ስ ቬኔዝዌላዳ ብብራንቲ አግስትⶓ ሲፋማ ድንጉሊ ብብራንቲዉ ፃንኩፂ  ኩራሳኦዳ ግቢትስቱሲያኽ ::

ናካዳ ዴሜካ ትክምቲ 2010ዴስ ጉሽፃማ ኩራሳኦ ጚጛራሱ ተክልይ ሚኒስትር ዝኩት ጛሬ ካሊት አጌራ ታኻታ ኩራትስ ቲሪቴ::

ኩራሳኦዉ ቹዋ ኬቴማ ፟ዊልምስታድ ፟  አሌሙ ቴቤቤርጙንኩ ምንግስትካዉ ክንቲዉ ሳይንሱስታ ባይሉ አችትዳ አሌሙ ማኼትትስ ሚዚጊብስቲት ግዲታማ ኬቴማኽ:: ዊልምስታድ ኬቴማኻዳ አግስታዉ  ፟ ንግስት ኤማዉ ዳምብ  ፟  አኹዳ ሰፌፋዉስታ ሜርኬብካ ፌያኒስ ብስስታዉ ዳምቢያኽ :: 1888 አዉሮፓዉ ዝቤን ቼፋታጊ እን ዳምብ ግቢትስቱስ ጌንዜብ ኩፓዉ ሴል ጊሪምፂ እሺኾ:: ቻሞ ሚፁንኩ አቕ ጌንዜቦ ኬያኒስ ቻም እላቲኩ ኩፅኒ ኔፃስ ዳምብስ ካያኒሽ እሺና:: እንሳ ማሉንኩ አብታምካኪላ ቻሞ ፍሽጞ ጄሜራኒ ኩፅኒ ምንግስት ጌንዜቦ ኬይፅጞ ኬዉጝፅጝስ ጌዴድስታ:: ንባሮ አግፅንኹኪ በኩር ጋዚቲዴስያኽ

ኩራሳኦወ እዝቡ ሚንቺትኪላ 150.000ዴስጃላ ያኹስ50ዴስ ጃላ ለሊትጙንኩ ብሄረሰብካ ዝኩዋና:: እዝቡ ዝኩዊኒዉ አኺኒኪላ ፟ዱሺ ፟እስትኹ ፓፒያሜንቱ ካልስ ጌሌፅስቴ::

አለሚቱ የኔት