አጌራዊ ኩስጝጚ ችግርካው ኽይፂ ኩልፍያኽ

ይቶፒያ ታሪክስ አባላምቲ ያኹኽሳ አጌራዊ ኩስጝጜ ጄሜርታ:: ይቶፒያው አጌራዊ ኩስጝጚው ኮሚሽን አዋጅስ ቲሪትጙኒዴስ  ፌዩንኩ ሲዚ አሜትካዳ ውላ እምፕልታቕኩሳ ቤንካዋ ኩስጝፅጝስ አጄንዴ ኩፕፁስ እጄ:: አምሊ 8 ጌርክ 2018 ም/አሜታዳ ዴስ ጉሽፃማ ዴሜካ አጌራዊ ኩስጝጚው ጉባዬ አዲስ አበባዳ ካስጛማጊያኽ:: አጌራዊ ኩስጝጚ አጌራው ጉዳይዳ ዝኩንኩሳ ሊሊትካዋ ፄቤብስጝስ አጌራዊ ቱትጜ ፌቴርጝስ፣ ሊሊትጙንኩ እምፕልታቕኩ ቤንካ ምንግስትሊ ዝኩኽሳ ታምትጜ ይስጝፅጝስ፣ አጌራዳ ካንትስታንኩ ችግርካዋ እምፕልትስ ኩስጝጛማ  ኽዮ እንኩርጝስ፣ ኩስጝጚው ፖለቲካውሳ ባይሎ ሌጌፅጝስስታ አጌራዊ እምፕልቶ አግጝስ፣ዲሞክራሲውሳ ባይሎ ሌጌፅጝስስታ ልማቶ አሬኽፅጝስ ቹዋ አላሜ ፃያስኩኽያኽ::

አጌራዊ ኩስጝጚው ኮሚሽኑ ቹዋ ኮሚሽነር ፕሮፌሰር መስፍን አርአያ አጌራዊ ኩስጝጚው ጉባይው ጂሚርፂ ቴርትዳ ፄውኑ ዙሚትጚዳ ሜድሬኽ አጌራው ፖለቲካውስታ ማይቤራዊ ታሪካኻዳ ስካዌ ፋንቲቴ ብሳው አኽⶓ ጌሌፅካ:: ይቶፒያ ሊጊሲሚ ጊዙ ታሪክዳ  ኩሪፃንኩ ባይልካ ዌና ታኹኒውላ ኽሳንትቶ ዊዳፊስ ሲፍፅጝስ ፅንጋኽካ ያኹንኩ ሚንችካ ቱትጜ አቲጙ ችግርካስታ ፖለቲካው ካስካ ናካሳኺስታ እምፕልቑሳ ሰላሞስታ አጌራውሳ እምፕልቶ ፌቴናማጊ አግስታው አኽⶓ ቶኬምካ::

አሳቡ ሊሊትት ሚንቺቱ ግድ አኽⶓ ጌሌፁንኩ ፕሮፌሰር መስፍን፤  እንሳ ሊሊትቶ ግርብስ፣ ጊዊስስታ ጋቻስ ኽይጝስ ፄውስታው ዳድ ዋኒኪ ያኹኒ ችግሮ ዊዳፊስ ኽይጝስ ካሊፃቲው አኽⶓ ይቶፒያው ፌይኹ ታሪክ እማኚ አኽⶓ ታክስፅካ:: አኽጝስኪ ዊዳፊ ኽይስ እንቲታኪ እምፕልትስ አስሜምጝጝስ ካሊፃው ኩስጝጚው ሜድሬኽ አኽⶓ ቶኬምካማ “አጌራዋ ኬሽፅጝስ ካላው እጁ አምንስታንቲ፣ ግልፅስታ ውላ አቡቕ አጌራዊ ኩስጝጚያኽ” ናኒስ እርዳትፅካ::

እኒጛ እጂንኩ ችግርካዋ ግርብስ ኽይጝስ ሞኬርጝ ኽዮ አግጝስ ካሊፃቲው አኽⶓ ጌሌፁንኩ ኮሚሽነር፤ “እን ኩስጝጚው ካስትዳ እን ዙራሙራሳ ያኻውላስ ኽሳንታ ይቶፒያዋ ታክስንስ” ናኒስ አቑዌ ዲግስካ::

ፌዩንኩ ሴዛ አሜትካዳ 11 ኮሚሸነርካስታ ድጋፎ እያንኩ   ውማይቴንካ ውላ ይቶፒያው እዝብሊ እምፕልዳ አኽጝስ እንዳ ታምብጝስ ኬፍቲኔ ፅሬቶ ፄውⶓ ታክስፁንኩ ኮሚሽነር፤ ኮሚሽን ላንቡሳኺስታ ሚንችካ ቴግባርካዋ አኮሜችⶓ እርዳትፅካ::ሊሊትቶ ሴሌቴንኹ ዳድስ ኽይጝስ ኩስጝጚውሳ ባይሎ ዴስጝጝ ቱስታው አኽⶓ ታክስፅጝስ ጛስጛዋ ቹኒትጝጝስ ታሪኩሳ ላኼኖ ኬሽፅጝስ ሜድሬኽ ኽሳንቲ ድል አኽⶓ ጌሌፅካ::

ይቶፒያው ታሪካኻዳ ካንትስቱንኩስታ ሚንችካ ዝቤንካዋ ቼፍፁንኩሳ ችግርካዋ ኽይጝስ አጌራዊ ኩስጝጚ ፋይፃንቲስታ ካቭስ አግስትጝስ ካላቲው ድል አኽⶓ ጌሌፁንኩ ዴሜካ ትክላይ ሚኒስትር አብይ አህመድያኽ(ዶ/ር)::

አጌራዊ ኩስጝጚው ብስፂ ቴርትዳ አግስቴካማ ፄውኑ ዙሚትጚዳ ይቶፒያ ሚንችካ ውትኽትኽካ ችግርካዋ ፌታ:: እኒ ችግርካዋ ዊዳፊስ ኽይጝስ  ካሊናኒ ጄርካ እኖጂዴስ ኬሽኹሳ ሰላሞ፣ እኖጂዴስ ኬሽኹሳ ልግሶ፣ ስልታኔስታ ዝኩዊኒውሳ ሴሎ ዝኩጝስ ካላንኩ አኽጝስ ኬሽኹሳ ክምንቶ ፌቴርጝስ ካሊስታው አኽⶓ ጌሌፅካ::

አጌራዊ ኩስጝጚ ዴስስትኹ ልቓ አቕ ኩፕንካማ ውሳኔ ፌያፌይጝፃኑ እንፃኽስትጚዴስ ሊሊትንኹ ዳድስ፣ ሊኽ ሻይስ ቼፍስታንኩ ይቶፒያንካ፣ አጌራኻዳስታ ባርኾቼዳ ዝኩንኩ እምፕልታቕ ውላ ዳብዚስ ኩስጙኑውስታ ሲዚ አሜታሳ ዊድኹ ዴሬፃውሳ እንዝጜ ካፅኹ አኽⶓ እርዳትፅካ::

ኩስጝጛንትካ ናካሱ 13 ሚሊዮንስታ ቻሱ 2 ሊኻስታ 3 ሊኻ ሚሊዮን እምፕልታቕስ ኽሳንቲ  አላፍት ዝኩክ ድል ዌንካው ኩፕቲ አኽⶓ ጌሌፅጝስ ታሪክዳ ፃፊስታውሳ፣ ውላዋ እምፕልሳውሳ፣ ሰላሞ ሴፌንፃውሳስታ ልማቶ ያጋውሳ ዋይሜ ሜዜጌብፃንታ አዴሮ እይካ::

ይቶፒያው ፕሬሱ አችትሊ እጂጜ ፄውንኩ ፖለቲካል ሳይንሱ ምሁር አለማየሁ ገብረ ማርያም ቤዴርኑንኩ ጊዝካዳ እምፕል ጉዳይዳ ውሳኔ እያንኩ ፖለቲካኩ አቕ ይቪችካ አኽⶓ ታክስፅጝስ ናካ ኩፅኒ ኩስጝጚ ውላ እምፕልታቑ ቤንካዋ አሴቴፍጝፃው አኽጝስ ሊሊታ ፄዌ ንካ::

ኩክሪኒ እምፕልታቑ ቤንዴስ ጉሽፃማ አሳብ ኩፑንኹስታ ውንቲኒ እዝቡ ድምፅ ፊትጙኹ አኽጝስ አጌራዳ ይቪቺ ያኻውላስ አሌምዴስ ሊሊታ ፄዋው አኽⶓ ጉሽካ::

ይቶፒያው አጌራዊ ኮሚሽን ኩፕፁኩ ሻይስ ቼፍስታንኩ አሳብካ ሶኼታ ቹዋ ቹዋ አጄንድካ ያኼካማ እዝብስ ይፋ ያኼካ::ጋቻስ ጉሽፃ ያኹንኩ እጋ ምንግስቱ ጉዳይ፣ ሙስኒስታ ስልታኑ ቴኬምስትጝጚሊ እምትጙንኩ ጉዳይካ፣ አይማኖቱ ጋቻ፣ ድንቤርስታ ምንግስቱ አቺትጝጚው ጉዳይካ ኩስጝጚ ፄውስታው ጉዳይካ ያኼካማ ቶኬምስትካ::

ምሁራንካ ናኑውስታ አጌራውሳ ችግሮ ጐሌላማ ኽዮ እይጝስ ኩስጝጚ ኬፍንኹ ታምብ ዝኩኽ አኽጝ ጌሌፅስታ::

ታደለ አጋጄ