ባርባዶሶ ጎቤንፅንስ

ፉቺ ባሩ ዳሪዴስስታ አምሉ ፍትሬትዴስ ፌይኹስ ባርባዶስ ካይ ክማዋ እምስትጙ ታሪክዴስ ፌያታ ዲሞክራሴ ሳኪትጝፂት፣ ባይልስ፣ ቱሪዝምስስታ እዝቡ ሌንጌዶ ቻቤልጙ ቴርትስኪላ አሌምዴስ ዲኒክፄት ዴሴትዳ አግስቴት አጌራኽ::

ባርባዶስ እሳንትስ ፅላ አጌራ ታኹኒውላ አሌም አቡቑ ቱሪዝሙ ካርቲዳ ኽሳንቴ ብቴ እምቴት አጌራኽ:: ፅንኩት አይኩ ዳሪው ግድስ፣ ኬሌምስ ዋርቓማ ካንትስታው ባይልስ፣ ጅሚስስታ አኹ ባንባው ስፖርትስ አሜትቺፋ ሚሊዮንስ ቼፍስታንኩ ጎቤናንትካዋ አጌራሾ ካሳንታ ፄውቴ:: ሚንች ሌንቴቕ ብቴ ፃቱት ያኹስ ክች ዙራሙሪዳ ዜሬቕቴን ካንካ አግስታና::

አውሮፓዌንካሾ አንትጝዴስ ቤዴራ አራውካስታ ካሪብ ጎስካስ ካይ ክማስ እምስቴሽቴ:: 16ንቲ ዝቤን ቤናዳ ፖርቹጋሉ ሜርኬቤንካ ዴሴታዋ ካንታኒ “ባርባዶስ” ናውሳ ስሞ እይካ ኔ ንቫር::

1627 ዝቤን ቤናዳ እንግሊዝ ካይ ክማዋ እምቴ:: ሲፋማኪላ ሽኩዋሩ ቓንፃው እርሺ እሳንጛ፤ እን እርሺስኪላ እንፃኽስታንትካዋ ግዳጅስ አፍሪካዴስ ቴኬምስታሺካ:: እን ታሪክ ዴሜካ አጌራው እዝቡሳ ባይሎ አይቶ ኪሳ::

1826 ምሬት አሜታዳ ካይ ክማዴስ ፊይኔዴስ ኩፅኒ እዝብ ፓለቲካው ሜብትስታ ማቤራዊ ፍቱሳ ቡንካዋ ጄሜራ:: 1966ዳ ኔፃኔቶ አግፄ:: 2021 ምሬት አሜታዳ ዴሜካ ንጉሳዌ ቴርቶ ኪስታታ ሪፐብሊክ ታኻ:: እንጚኪላ አጌራው ታሪክስ እስካዊ ቤን እሺኾ::

ባርባዶሱ እዝብ “ቤጀን” እስትጝስ እቑስቴ:: ሚንች እዝብ አፍሪካዌንካው ዜርዴስ ይንቱኽ ያኹስ አውሮፓስታ እሊኩ ባይልካው ቻኒስት ግልፅስ ካንትስቴ::

ባርባዶሱ ዝኩዋንትካ ሌንጌዶ ቻቤልጝስ፣ ጌሬትትስስታ ዴስቲኒ ዝኩዊኒስ አቕስታና:: ጝን አቑ፣ እምፕልታቑስታ እምኔቱ ጉዳይ ኽሳንቲ ክብር እይስትጝስ ሊሊቲ ዳድስ ካንትስታንኩያኽ::

ቱሪዝም ዴሜካ አጌራው ቹዋ ሚፂው ጉሽፂያኽ:: ድምክኒስ ፋይናንሱ አግልግሎትካ፣ ንቫሩ ቴክኖሎጂ፣ ሳሴር ኢንዱስትርካስታ ግብርኒ ይኮኖሚው ሞሴሴንካኽ::

ባርባዶስ ባሩ ዳሪው ግድስ ይቪቺስ ጊሊፅስቴት አጌራ ጋቲቲያኽ:: ካይ ክማዴስ ሪፐብሊክሾ ታምብጝስ ካሊኹ ታሪክ፣ ባይሉ ካሊትጝፃማ ዝኩጝ፣ እዝብካው እንፅኼ እንካንጙስታ ይሴንት፣ ፍትሬቱ ግድስ አሌም አቡቕዴስ ቱሪዝምስታ ዝኩኽ ብቲዴስ ባርባዶስ ካሪቢያኑ ውኪያኖስካ ግዲታንታስታ ቓሊፃ ፄዌካ:: ባርባዶስሾ እንዜጛው ዋሺኒኪ አቒ ቓሊፄ ባሩሳ ዳሬ ይቢቺ ያኻውላ ታሪኮ፣ ባይሎ፣ አቔስታ ፍትሬቶ እምፕልዳ ካንታማ ሼዎ ዴኔክፅጝስ ዴሶ ካፅጝስ ካሌ::

ባርባዶስ ካሪቢያንካዴስ ኬፍቲኒ ንቫቩስታ ፁፍ አች ዝኩክ አጌርካዴስኪላ እምፕላኽ:: ባርባዶስ ፅላ ዴሴት አጌራ ታኹኒውላ አሌምዴስ ቱሪዝምስ አቕስቴት አጌራ አኽⶓ በኩር ጋዚቲዴስ አግፅኑኽ ንቫር እርዳትፄ::

ንግስቴ ተስፋ