ኩስጚ ጝና ክልሉ ሰላሙ፣ ይኮኖሚውስታ ማቤራዊ ጉዳይዳ ትኩቶ እያማ ኩስጝጝ ጌሌፅስትኾ

ክልልዳ ዝኩኽሳ ሰላሙሳ ፊኹዌ ዊዳፊ ፄውጝዳስታ ክልሉ እዝቡ ይኮኖሚውስታ ማቤራዊው ቴኬምስታንትዳ ትኩትስ እንፃኽስስትጝ ቱስታው አኽⶓ ኩስጚ ጝናስኩ አባልካ ጌሌፅካ::

ክልሉሳ ሰላሞ ቼሜትጝፅጝስ አመራሩ፣ ፄትቲ አይልካውስታ እዝቡ ቲቪቪርጚ ፅሬት ፋይፃንቲ አኽⶓ አማኻሪ ክልሉ ቺፅጝፂ ጛራ አረጋ ከበደ ታክስፅካ::

አማኻሪ ክልሉ ኩስጚ ጝና 6ንቲ ዙሪ 5ንቲ እንፅኺው ዝቤኑሳ 12ንቴ ሚዲቢኔ ጉባዬ ስንብቶ ካስጝፃ::

ክልሉ ኩስጚ ጝና እዝብዴስ ቻቤልኹሳ እጎ ፍሽጙ፣ ፌፄምፃንትካ አካልካዋ እግስ ካሲስታንታስታ ቱስቲስ አላፍቶ ፊትጛንታ ሲፍጝጙ፣ ባጄቶ ፄዴክፅⶓስታ ፖሊሴ ጋማጋምጙሳ ስልታኖ ቱስቲስ ፊትጛንታ አዴሮ ቻቤሉንኩ አኽጝታጊ ፌይንኩ አንኩዋ አሜትካስ እዝቡሳ ስልታኖ አሚካማ እጂጝ ታክስስታዊያኽ::

እንጚስኪላ ስንብቶ ካስጙኽ 12ንቲ ሚዲቢኒ ጉባይዳ ትኩቱስ አጄንዲስ ኩስጚ ፄውስቱክ ጉዳይካዴስ ክልሉ ምንግስት 2018 ባጄት አሜቱ እክዱሳ ፊፂምጜ ካንትኹስ ሪፖርት ዲጋማ ኩስጚ ጝና ጋማጋማ::

ክልሉ ሰላሙ ጉዳይዳስታ ይኮኖሚዳ ሚንቾ ጊዞ ካፃማ ኩስጚ ጝና ኩስጝጛ:: ኩስጚ ጝናስኩ አባልካ ባጄት አሜትዳ ክልሉ ምንግስት አኮሜችኹ ሰላምስታ ዴክቶ ኬቤርፅጝዳ ካሴስታ ካንቴ እይካ::

ናካዳ ዝኩኹሳ ቺርቺሬ ሰላሞ ዊዳፊስታ ድሳቲው ሰላምሾ ካይጝፅጝ ፋይፃው አኽⶓ ካሲካ:: ወሬሙሳ ሜሳሬ ዶንጌቱንኩ አይልካ ውትኽትኺ ችግርሾ ሚፅካማ እዝብ ፅግፅግናማጊ አኽጝስ ምንግስት እጎ ኬቤርፅጝዳ አላፍቶ ፊትጛታ ታክስፅካ::

ጋያኪ አሬሳቻንትካ፣ ጌፄን፣ ምንግስቱ እንፃኽስታንትካስታ ክንታንትካ ሰላምስ ልቕልቕ ናቲንታ ፄዋማጊ አኽጝስ ምንግስት ቢዲሪ ጉዳይ ፄዋማ እንፃኽስትጝ ማንዲስታው አኽⶓ ኩስጚ ጝናስኩ አባልካ ጉሽካ::

እሊውስ ዴሜካ ኩስጚ ጝናስኩ አባልካ ክልሉ እዝብዳ ኬፍቲኔ ቻኒስቶ ታምፃውሻው ዝኩዊኒው ክብርናቲ አሬኬዛታ ይኮኖሚው ጉዳይዳ ሊሊቴ እክዶ ፍሽጝ ክልሉ ምንግስትዴስ ማንዲስታው አኽⶓ ታክስፅካ:: 25 አሜታሱ ክልሉ ይኮኖሚው እክድ ሳኪትጛታ ምንግስት ኩርፄንትስ እንፃኽስስታማ ዝኩዊኒው ክብርናቲዴስ አጌር አቕ ፋንታ ፅሬቶ ፄውጝ ማንዲስታው አኽⶓኪላ እሳንስ ኩስጜ ካስጝፄካ::

ኩስጚዳ ዲግኹ ካሲዴስ ቲኑ ኾትካዳ እጁ ዲግስጚው እንፂጝስታ እምቢትንኹሳ አግልግሎቴ እይጙ ችግር እሳንስ ካንትስታማጊ አኽጝስ እዝቦ ፅግፅግፅኹ ጉዳይ እክድስ እምስታማ ዙርሜ አግፃታ ፄውጝ ፋይፄ ናው አሳብኪላ ኩስጚ ጝናዳ እሳኖ ጊዞ ካፃማ አባልካዴስ ዲግኹ ካሲ እሺኾ::

ትሮቲስ ፋንኩ ምንግስትኩ እንፃኽስታንትካዋኪላ ቲኑ ሜድኑ ቴኬምስታንትካ ፄውጝስ ምንግስት ፍንሾስ እክዶ እሜታ ኩስጚ ጝናስኩ አባልካ አሳቦ ዲግስካ::

ሆስፒታሉ ታምብስታንትዳኪላ ምንግስት ትኩትስ እንፃኽስታማ ክልሉ እዝብ ዲጊዳ እክምኔ አግፅጝስ ካላውሳ ዳዶ ቴግባርዳ እሽፅጝ ማንዲስቴ ናኒስ ካሲካ::

12ንቲ ክልሉ ኩስጚ ጝናሱ ጉባይዳ ኩስጚ ጝናስኩ አባልካዴስ ዲግኹ ካሲስ ዙርሜስታ ኽይትጝፄ እይንኩ ክልሉ ቺፅጝፂ ጛራ አረጋ ከበደ ክልላኻዳ ልቕልቕ ናንኩ እጋዋ ያኼካያስኪ ኬችካ ክልሉ እዝብዳ ታምፃኑሳ ቤዴሎ ካላካልጝጝስ እንፃኽስስታማጊ አኽⶓ ጌሌፅካማ እዝቡሳ እምፕልቶ ፌቴናንኩ ክልላኻሱ ችግርካዋ ክችስጝስ ክልልዳ ፌቴርስታውሳ ዋሺኔኪ ሰላሙሳ ስጋቶ ኽይጝስ ትኩትስ እንፃኽስስታውሻው አኽⶓ አቕፄካ::

ይቶፒያው ናማኪ አማኻሪ ክልሉ ታሪካዊ ባላንጋርካ አይልካሊ ፃምርታማ ሰላሙሳ ችግሮ ፌቴራው አይልኪላ ሰላሞ ጉላላ ፄዋታ ምንግስት ቢዲሬ እያው ጉዳይ ዝኩታ ያኻማ እጎ ፌያፌይጜካማ እዝቡ ስጋታ ያኻንኩ አይልካዳ እርምጄ ካፃማ ሰላሞ ኬቤርፅጝ ቢዲሪ ምንግስቱ ቴግባር አኽⶓኪላ ጉሽካ::

ክልሉ ኩስጚ ጝናስኩ አባልካኪላ ክልሉ እዝቡሳ እምፕልቶስታ ቲቪቪርጜ ድፅጝስ ዙራሙሪ ቺፋ ካዋንዳ ያኼካማ ችግሮ ፌቴራንኩ አይልካ ሰላምሾ ዙራንታ ታምቦ ፊትጝጝ ግዴቲ አኽⶓኪላ ታክስፅካ::

ክልሉ አመራርካኪላ ጛርቱስታ ኬቹ ፋይዴስ ኪቻ እዝቡሳ ዊዳፊ ትክሞ ኬቤርፅጝስስታ ቼሜትጝፅጝስ ኩርፄንትስ እንፃኽስትጝ ማንዲስታኩ አኽⶓ ሼውፅካ::

ክልሉሳ እዝቦ ቲኑ ዜርፍስ ቴኬምስታንታ ፄውጝስ ትኩትስ እንፃኽስትጝ ቱስታው አኽⶓ ቶኬሙንኩ ቺፅጝፂ ጛራ ቲኑሳ ዜርፎ ሊሊቲ ትኩትስ ምንግስት እንፃኽስስታማጊ አኽⶓ ሼውፅካ::

ትሮቲስ አግሌልስቱንኩ ምንግስቱ እንፃኽስታንትካስኪላ ምንግስት 24 ታፋ እርዳታማጊ አኽጝስ ፍንሾስኪላ ይስጝፃማ ሲፍፃው አኽⶓ ቶኬምካ:: ክልልታ ቲኑ ኾትካዳ ካንትስታው እጁ ዲግስጚውሳ ችግሮ ኽይጝስ እጆ ዲግሳንትካ አቺትካሊስታ ፌዴራሉ ምንግስትሊ ቲቪቪርጚስ እንፃኽስስታማጊ አኽⶓ ኩስጚ ጝናስኩ አባልካስ ዙርሜ እይካ::

ዙራሙሪ ቺፋ ጆንኩ ማቤራዊስታ ይኮኖሚያዊ ኾትካው ግንባቲውሳ ካሴ ዙርፅጝስ አግልግሎቴ እይጜ ኬሽጝፅጝ ቱስታው አኽⶓ ቶኬምካ::

ክልሉ ኩስጚ ጝና 12ንቲ ማዲቢኒ ጉባዬዳ ኬፍቲኒ ፍርድ ጝናሱ እክዱሳ ፊፂምጜ፣ ኦዲት ቢሩሳ ሪፖርቶ፣ ክልሉ ሰላሙሳ አኺኔ፣ ዝኩዊኒ ክብርናቲውሳ ጉዳዮስታ ክልሉሳ አንኩዋ አሜታሱሳ እንዝጜ ካንትኹስ ትኩቶ እያማ ጋማጋማ::

ክልሉ ኩስጚ ጝና እንፅኺውሳ ዝቤኖ አሌድጝሊ እምትጛማ አንኩዋ አሜታዳ አኮሜችኹሳ ቴግባሮ ካንትኹስ ኩስጜ ካስጝፃ:: ሜስኬሩም አርፊዴስ ጉሽፃማ እስካዊ ኩስጚ ጝናሱ አባልካ ቲሪትጛኑ ዝቤን አኽጝስ ኩስጚ ጝና አሊዴ ዝቤኖ ካንትኹስኪላ ትኩትስ ኩስጛ::

ኩስጚ ጝና 2019 በጀት አሜቱሳ በጀቶ 402 ቢሊዮን 285 ሚሊዮን 713 ሻይ 544 ብር ፄዋማ ፄዴክፅጝስ ጉባዬ አሌዳ::

ታደለ አጋጄ