ማቤራዊ ሚዲያዳ ፉኽ እግ

15 አሜታዴስ ኩክራ ዝኩንኩ ሌጌሳ ታምብካ ማቤራዊ ሚዲያዋ ቴኬምስታቲንታ አጌዳውሳ እጎ ፈረንሳዩ ኩስጚ ጝና ፄዴክፅኾ::

ይንታው ፌሬንጅካው ቴሳስ አርፊዴስ ጄሜራማ እጎ ቴግባርዳ እሽፅጝስኪላ ፈረንሳይ አውሮፓውኩ አጌርካዴስ አቫላምታ ታኼ::

ፈረንሳዩ እግ አዜዛውስታ ማቤራዊ ሚዲያዋ ቴኬምስትጝስ እድሚዋሳ ንቫሮ እሚጝ ግዴቲያኽ:: ዩናይትድ ኪንግደምስታ አውሮፓው እምፕልት ሌጌሳ ታምብካውሳ አንኩሊውሳስታ አካሉሳ ቲኖ ማንዲጝስ ምስሌ ውሳኔ ፍሽካ:: ስልታኑሳ ዝቤኖ አሌድካማጊ አግስታንኩ ፈረንሳዩ ፕሬዝዳንት ኢማኑኤል ማክሮንኪላ እግ ፄዴክጝ ፋይፃንቲ አኽⶓ አቕፄካ::

እግ ዋትጜይ ቴግባርዳ እሼው ናኒስ ካሴ ጉሻንኩ ዝኩኒውላ ቴኬምስታንትካውሳ እድሜ ቼሜትጝፅጝስ ሊሊትጙኽሳ ሴሎ ትክምዳ እሽፅጝስ ጌዴድስታው አኽⶓ ምንግስት ታክስፃ::

ፈረንሳይዳ ሜስኬሩም አርፊዴስ ጉሽፃማ 15 አሜታዴስ ኩክራ ዝኩንኩ ሌጌሳ ታምብካ እድሜ ቼሜትጝፃውሳ ንቫሮ እያኑላ ማቤራዊ ሚዲያውሳ ፍኖ ብስጝስ ካላላ:: ቴሳስዴስ ፋሌንጋ ዴሜካ ውላጊ ፈረንሳዊያንካ ማቤራዊ ሚዲያዋ ቴኬምስታንትካው እድሚ 15 አሜታዴስ ጃላ አኽⶓ ቼሜትጝፅጝ ግዴቲያኽ እስታ::

ዋሺኒኪ ማቤራዊ ሚዲያው ፍን ፈረንሳዩ ምንግስት እንኩርኹሳ እድሜ ቼሜትጝፄ ሴሎ ቴኬምስትጝ ግዲያኽ::

አጃንስ ፈራንስ ፕሬስ ፍሽኹ ዜጌቢዳ ጛርቱሳ ስርኩኔ ማንዲጝሊስታ እድሜ ሺሽጙ  ቼሜትጝፂው ውንቲኒ አኽጝሊ እምትጛማ ካሲ ዲጋማጊ ያኹስ ሌጌሳ ታምብካ ሳሴርስ ክልክሌ ፌይጝስ ካላቲንኩ አኽጝ ጌሌፅስታ::

ፈረንሳዩ ዲጂታሉ ሚኒስትር አን ለ ሄናንፍ እድሜ ሺሽጝስ ካሊስታው ሴል ቴግባርሾ ቱⶓ ዲግኹ ክሬቲስ ዙርሜ እይካ::

ምስሊ ንቫርስ ሌጌሳ ታምብካ ማቤራዊ ሚዲያዋ ቴኬምስታቲንታ እግስ ካላካልቱት ቤዴርካ አጌርካዴስ አውስትራሊያ አግስቲ:: እንጚስኪላ አውስትራሊያው ምንግስት ማቤራዊ ሚዲያዳ እንኩሩኽሳ እድሚውሳ ጌዴቦ ፌይካማ አግስታንኩ ኾትካዳኪ ያኻ አችትካዳ እግስ ኪፂስትጝስ ካላኑሳ ውሳኔ ፍሻ::

ፉኽሳ እጎ ፌይካማ አግስታንኩዳ እንኩርስትኹ ክፃት እፅፍስ ዴሜክስታማ 99 ሚሊዮን ዶላርስ ኪፂስታንታ ዎሴንስታ::

ቴግባርዳ እሺኹሳ ወክቶ ካንትናኒኪላ አውሮፓዊያንካው ዝቤኑ ቼፍታ 2025ዴስ ጉሽፃማ 16 አሜትዴስ ኩክራ ዝኩንኩ ሌጌሳ ታምብካ አውስትራላዊያንካ ፅካ ማቤራዊ ሚዲያው ፍንዴስ አጌድስትካ::

ያኼስጉ ሌጌሳታምብካ ኩፅኒ ማቤራዊ ሚዲያውሳ ፍኖ ቴኬምስትጝዴስ ክብስስትካያስኩ አኽጝ ጌሌፅስታ:: እጎ ፌይጜካማ ፊስቡክ፣ ኢንስታግራም፣ ስናፕቻት፣ ቲክቶክስታ ዩቲዩብ ማቤራዊ ሚዲያውሳ ፍኖ ቴኬምስታንኩዳ ምርማሪ ጄሜርስታ::

ፈረንሳይስታ አውስትራሊያ ማቤራዊ ሚዲያዳ ፍሽትኹሳ እጎ ሲፋማ ዩናይትድ ኪንግደሞ ዴሜካማ እሊኩ አጌርካጊ ምስሌ እርምጄ ካፅካማጊ አግስታና::

ዩናይትድ ኪንግደም ይንታው ፈሬንጅካው አሜትዳ ጄሜራማ 16 አሜታዴስ ኩክራ ዝኩንኩ ሌጌሳ ታምብካዋ ማቤራዊ ሚዲያዴስ አጌድታት አኽⶓ አቕፄ ኑስ ቢቢሲ ንቫሮ ፍሻ::

ንግስቴ ተስፋ