እንጃቢሪ ኬቴም ቺፅጝፂውሳ ዎዳንጄሎ ካለካልጝጚስ ቴቬቬርጜ ፋይፄ እስትኾ

ውብነሽ መዝገቡ
(እንጃቢሪ ዩኒቨርስቲዳ ጋዜቴንቱ ክንታንታ)

ወንጄሎስታ ጋቻዋ ቤዴራማ ካላካልጝጝስ ዳዴኾስታ ጋቻዋ ፋያንትካዋ ድፅጝስ ካሊስታው አኽጞ ሼው ናኒ ድፄ ፌፄማንትካ ድፂዴስ ክብስስትጝስ ጌዴድስታና። እዝብስታ ፄትቲኩ አካልካ ቲቪቪርጚስ እንፃኽስትጝኪላ ኽያ ያኻ። እምፕልቱሳ ዴክቶስታ ልማቶ ቼሜትጝፅስ አጌር አቕ ስጋታ ጋቲታ ልቕ ልቕ ንካማ እንፃኽስትጙሳ አክሞ አግፃና። “እምፕል ካርጝ ይቪቺ ግንብ ያኻላ”፤ እስታውስታጊ ዙራሙሬ ዳዴኽካዴስስታ ጋቻዴስ ካላካልጝስ ውላጊ ታምቦ ፊትጝጝ ማንዲስቴ። ወታትካ ግርብስስታ ውኒቲኔ ንቫሮ እይጝስ ፣ ፄትቲኩ አካልካ እግስስታ ውማይስ፣ እምፕልታቕ ዴሜካ ባኩኒ ኩስጚስስታ ቹኒትጚስ ኩስጛማ ታፍስ ታፎ እምትጛማ እምፕልትስ ቲሬኒ ፄትቲ ኬቤርስቴ። አማኻሪ ክልልዳ ፌቴርስትኹሳ ፄትቲውሳ ችግሮ ሲፋማ እንጃቢሪ ኬቴምዳኪላ ሊሊትጉንኩ ዎንጄልካ ፌፄምስታንኩ አኽጝስ እምፕልታቖ ምኽምኽፃኒስ እጂጞ ታክስስቴ፡፡ ፄትቲውሳ ችግሮ ኽይጝስ ኬቴሙ ቺፅጝፂው እምፕልታቕ ፄትቲው አካልካሊ ማቔንትጚስ እንፃኽስስቱኑ እንፂኺስ እንጃቢሪ ኬቴሙ ቺፅጝፂዳ አምንጝፃው ሰላም ይንታታ ካሊፁኽ አኽጞ ስልኪስ እንኺው አፄብ ደረጀ ጀርባውሊ እጂጜ ፄውንኩ ዝኩዋንትካ ድኹዌካ፡፡ ”ቑፂ እምፕልታኒ ስቤቶ ዱንፄ“ ናኒስታጊ እንጃቢሪ ኬቴሙ ዎታትካ ዙራሙሬ ዳዴኽዴስስታ ጋቻ ፋያንትካ ጛርት አቕዴስ ማንዲጝስ ፄትቲኩ አካልካሊስታ እምፕልታቕሊ ቴቪቪርጚስ እንፃኽስትካማጊያኽ፡፡ዙራሙሪውሳ ሰላሞ ማንዲፅጝስ ዝኩዊኒስ አሜቻውሳ ዙራሙሬ ፌቴርጝ ውላውጊ አላፍት አኽጝ እርዳትስትጝስ ዎንጄል ፌፄምስታቲታ ካላካልጜካማጊያኽ፡፡ ዎታትካ ዙራሙሪውሳ ሰላሙሳ አኺኔ እርዳትስትጝስ ዳዶስታ እምፕልታቑሳ ልቕልቕቴ እርዳትስታኑኩ አኽጝስ እንጃቢሪ ኬቴምኩ ዎታትካ እምፕልትስ አቺትጜካማ ሮንዶ ማንዲጝስ ፣ታራታርጛኑሳ ዲቦ ሲፍጝጜካማ ንባሮ እይጝስ እምፕልታቑሳ ዴክቶ ማንዲፃና፡፡ዊዳፌ ሰላሞ ቼሜትግፅጝስ ኬቴሙ ዝኩዋንትካ ካቢትጚስ ኩስጝጜ ካስጝፅካማጊ አግስታና፡፡ ዙሚትጝፅኑክ ዝኩዋንትካዴስ አቶ ሙሉነህ አየለ እንጃቢሪ ኬተም ቺፅጝፂ 01 ኬቤሊው ዝኩዋንቲ ያኻኒስ ጛው ዙራሙሪዳ እንዴስ ቤዴራ ዶንጌቱንኩ እግፋካ አይልካ ቤፍቴካማጊ ዝኩዋንትካዋ ቼጌርፃንኩ እሺንኩ አኽጞ ጉሽካ፡፡ እኒ ዳዴኽካ ዳድዳ ፌያንኩ አቕዴስ ሞባይሎስታ ጌንዜቦ ዜሬፋሺንኩ አኽጞኪላ ድኹዌካ፡፡ያኼስጉ እንሳ ችግሮ ኽይጝስ ኩፂ ወታትካስታ ኹኑ አቺጽጝካ እምፕልታ ኻራ ጌርካ እንፃኽስትካሚ አኽጞ ዙሜካ፡፡ ኬቴማኻዳ መንግስት እምልታቑሳ ዴክቶ ሜዴቡክ እምፕልካ እምልካ ሰላሞ ኬቤርፃንታካክላ እይስትኸሳ አዴሮ እንግርግራ ባይካውጅካማ ወንጄልዳ አሴቴፍቕካማ አግስቶጘክላ አቶ ሙሉነህ ዙሜካ፡፡ወታትካ ኬቴሙሳ ሰላሞ ዊዳፊስ ኬቤርፅጝስ ዴንብ ስያሳ ሴያኑላስ ሜሳሬ ዶንጌትካማ ልቕልቕናንኩ አካልካ አግስታንኩ አኽጝስ ክቺጝ ቱስታው አኽጞክላ ካሲካ፡፡ እንጃቢሪ ኬተም ቺፅጝፂ 01 ኬቤሊው ዝኩዋንታ ዊዛሩ ሰውበሰው ታዬኪላ እንዴስ ፍና ብሽታንሾ፣ ፄቤልሾስታ ጌቤልሾ ካሳንኩ አቕዳ ዳዴኽካ ጉርጉሙሳስታ ላጜቱሳ ወርኩሳ ቲባኔስታ እሊኩ ግዳግድካዋጊ ዜሬፍጙሳ ችግሮ ታምፃሺንኩ አኽጞ ጉሽካ፡፡ እንዴስ ፌያማኪላ ጝንዌንካ ኮሌፍካማ እሊውሾ ካሱኑሳ ጝኖኪላ እኒ ዳዴኽካ ዱንፄካማ ቱጝስ ዜሬፋሺና፡፡ እኒ ዜሬፋንትካው ድፂ ባስጛማጊ ካሳቲታ ኩፂ ኹኑ አቺትጝካ ወታተካሊስታ ማቔንትጜካማ ዙራሙሪኩ ፄትቲው አካልካሊ ያኼካማ ኩርፄንትስ እንፃኽስስትኹ እንፅኺስ ናካ ኹናኪ ያኻ ዋሼንካኪ ጋርትአቕ አምጝፃው ዳድስ ፌካማ ቱዋና ናኒስ ድኹዌካ፡፡ እንጃቢሪ ኬቴም ቺፅጝፂ ሰላምስታ ዴክት ፅፌት ጝናሱ አላፊ አቶ አማረ ታረከኝ ኬቴሙሳ ሰላሞ ቼሜትጝፅጝስ ኬቴምዳ እምፕልታቕሊ እሳኖ ኩስጝፁኒዴስ ፋሌንጋ ኬቴማኻዳ ሊሊትጙንኩሳ አችትጝካዋ ፌቴርጝስ እንፃኽስትኹ እንፅኺስ ኬቴም ቤዴራ እሺኹ ሰላሙ አኺኒሾ ዙርጝ ዙሜካ፡፡ኬቴምኩ እምፕልታቕ ዉላ ኬቤሊዳ አቺትጜካማ ሮንዶ ማንዳታ ፄውስትጞ ዙሜካ፡፡ ኬቴሙ ቺፅጝፃኻዳ እዝቦስታ ምንግስቶ አጌላጌላንታ እይስትኹሳ አላፍቶ እንግርግራ ባያውጅካማ እጋፌ ቴግባሮ ፌፄማኒስ አግስቱንኩሳ እጎ ኬቤርፃንካዳ እጋዌ እርምጄ ካፅስትጞ ዙሜካ፡፡እን ስሬታስኪላ ምንግስቱሰሳአላፍቶ እንግርገራ ባይካማ እጋፊ ቴግባርዳ አግስቱንኩ ፄትቲኩ አካልካዳኪላ እንፂዊስ ኪፂስታንታ ፄስታ፡፡ዴምብ ስያሊ እምትጛማኪለ ችግር ዝኩጞ አምኑንኩ አላፊ ቤዴራ ባጄቱ ችግር ምክንያታስ ፌቴርስታኹ ዴምብ ስያሱ ሊሊትጚ 2019 ባጄት አሜታዳ ክቼው አኽጞ ቼሜትጝፄካ፡፡ ፈይኹ ባጀጽ አሜትዳ ኬውጛያሱ ፄትቴ ማንፅጙ እንፅኺስ 11 ያኻንኩታፍስታፎ እምስቱንኩ ዳዴኸካዳ እጋዊ እርምጂ ካፅስትጞ ሃለፊ ጌሌፀካ፡፡ ኬቴምዳ ዊዳፊ ሰላም ቼሜትጛታ እምፕልታቑስታ ፄትቲዉ አይልካዉ ማቔንትጙሳ እንፅኼ ፋያዉ አኽጝስ ታምቦጊ ፊትጛንታኪላ ሰላሙስታ ዴክቱ ፅፌት ጝናሱ አላፊ እንፅኼንቶ ፌያፌይጝፅካ፡፡