አጀንደ አኽቭንድ እሩዳንስ እንቅም ጝችጘሩድ ፈነው ጡሸኲ!

ኻግር በወረ ሲጘዝ ኻሚትራንድ፤ ኻግር ለውንትዙ ጅግነ ብራንድ፤ ኻግር አርወ ተከውድቅ ይው የጝ፤ ኻቨረ አቐውድቅ ላጢዝ ይወነውዝ ችግሰል ጥውራንድ ጝርቍር ቈሽ አልስልሰተ ግሪ እቍርጘኲ።

እኔንት ቈሽ ኢትዮጵየ ላጥ ኻግራኒዙ ዲዝጝትድ ጻየው፤ ኻግሩ እሴትዝ እኪጠ ቸለው ኻግሩ ምኽርኽረ ኮሚሽን ችበችብስርኩች። ችብረ ችበችብሰነውዙ እንቅቱ በንዝመ ዋቕርጥድ ለምረናንስ ሠራሽራጙ የጝ።

ኻግሩ ምኽርኽረ ኮሚሽንድ ችበችብረት ሊጘ እምተንዝ ንየ አቕሽም ኢትዮጵየትል ጽበው ችግሰድ በንሽተዊዝጘ ሠራሳቅ ያንስቅ ሳልጠውዝ መድረካን ጻጝዘነው ቸልየውም ዊኑ። ጣቅ እርፈኒዝ እንጎ ክልላኒል ፍልውልወነውዝ አጀንደ አኽቨነውዙ ሰቭ ሠራሻጙ የጝ። ነን ብላ ክልሊልም ችጝኲ። ነናሽ ሠራሽተቍ ጻጝትድ ምነነ ሊቍሰቍ ጛይ።

ኻግሩ ምኽርኽረ ኮሚሽንድ እንቅ ኢትዮጲቍ ቀበሊስ ኪርም ጽበቍ ጝታበንድ፣ ጝታዋቕረድ ወረጘ የጝ የውድ ጝታይተ ደረጀዝ አኽቨው የጝ። እን አኽቭኒዝ ሲችፍሺንቀ ዳቐው አዊንም ኽዝቭዙም አነ ገረደዙ ደርግቭሸተ ዊንጠ ጡሻውም። አዊንም እኲጙ ይሽተቍ ዋቕርጥም ጉይሽጝ ጭቅተ እክሰዝጎ ሚሪሸቍ ጛይ።

እግረ እኔን እንቅ ዋቕረጥ፣ እንቅ በንድ አልትጘው ኻግሩ ምኽርኽረ ኮሚሽንድ አይነተ ዓለመድ ኻግሩ ለውንት ፋጥረነው የጝ። ቅመተ፣ ነስየስም ላው ጻቨው ሲጘ ፋጥረነውዝ አትርደይ ኢትዮጵየ ችጝሽራንስ አገነ ፋጥረው የጝ።

ኤድወ እን ምኽርኽረይዙ ጥወድ እሩዳንስ ዋቕረይዝቍ ወነ አቐቍ ኽዝቫን አይነተ ችጘርድ ፊስጥጘ ጡሸኲ። ውሸብል ዓምርትወ ኢትዮጵየ ጝታወ አራንስቅ ፈንድ ነሰቍ ጻጝትድ ጭርወዝ ቓለነውዝ ጝታችጘርድ ፍጥጘ ጡሸኲ።

ግርማ ተጫነ

መጋቪት 30/2017