ዴሞክራት ኬይሻ ላንስ ቦተምስ አሜሪከቱ ሲጘዝ ኪርመነዙ  ጝጭር ቅመተ አቕች!!

በውግቱ አትላንታቱ ከንቲቨ ዊነቁድ ዴሞክራት ኬይሻ ላንስ ቦተምስ ሲልዝ ደቡባዊ ጆርጂያቱ ቅምንዝ ቅመትነይዝ ፃጝሽተው ምርፀዝ ለጣቕርኩች።

እኔንም አሜሪከትል አውማው አጉረተ ስልጣኒዝቅ ማርፅሽትረይ ኪርመነዙጝጭር እውነ አተጘድ ፃቭኲ።

ሲኤንኤንስመ ኤንቢሲ ኒውስም ቲክርክረድ ጝርት ከቭጝኩⶔ። ቦተምስ ሪፐብሊካንዙ ወግሽተተ አቐቊ ቢሊየነር ትኽነ ኻይንዙ ፋፅምዘተ ሪክ ጃክሰንት ለጣቕርኩች።
ሪፐብሊካንዙ ቅመተ ብራያን ኬምፕ ጊዝዙ ገደብዝ ደግምጝ ቲክርክርሸነው ቸልየቊም።
ድልዋ 20 እምተንዝ ንየ ሪፐብሊካንት እግዝግዘት እግርገ ቅመተይዙ ቢሮድ ዴሞክራተንዝ ዊስ ይውኲ።

እን ፈንድም ኻምል አርፈይዝ ጃክሰንት ከቭጝ ቲክርክረይዙ አሰነይዙ ሸወጭዝ አትላንታ ጅውነይጅቅ ምርፀዙ ዝምረ ፃቨቊ ፕሬዝዳንት ዶናልድ ትራምፕስ ፅጋ አቕኲ።

በውግቱ ፕሬዝዳንት ባራክ ኦባማ ጥቅምት አርፈይዙ አሰነይዝ ጆርጂያትል ቦተምስት ሰልፍ ፍጝኩⶔ።

ዴሞክራቲክቱ ሴናተር ጆን ኦሶፍ ሲልዝ ፃቭሽተው ደግመ ምርጸዝ ሪፐብሊካንቱ ኮንግረስ አቫል አቐው ማይክ ኮሊንስት ለጣቕጝኩⶔ። እኔንም ጆርጂያትል 2020 ዓ.ስ ጆ ባይደንስመ 2024 ዓ.ስ ትራምፕት ከቭጘት እጝጎ ቑልፍ አረይ ኻግር አረጘድ ደድስጝኩⶔ።
ቦተምስ 2018 ዓ.ስ ኪርም 2022 ዓ.ስ አሽ አትላንታቱ ከንቲቨ አቕር አግልግልድርኩች። ሊጘትረ ጊዝዝም ማርፅሽቲረይም። ጝዝግረም ቢደን ዋይት ሀውስቱ ኽዝቭዙ ሲትፍሽን ቢሮ ዳይሬክተር አቕር ስረንትርኩች።
ቢደንቱ 2024 ዓ.ስ ደግመ ምርጸዙ ዝምረዝ አጉረተ ማኽርዘተ አቕር አግልግልድርኩች።

ቦተምስ ምርፀዙ ጝር ምርፀዙ ዝምረን ኰሪዝ
ሜዲኬይድት ፈራዘናንስ፣ ጝነቊዝ ፈው ፈንድ ቃፅቨናንስመ ማርፀነውዙ ሚቭተንድ ኻየናንስ ቃል ጥውርኩች።

ጝር ቲክርክርሸተ ጃክሰንት ለካቲት አርፈይዝ ቲክርክረድ ኪርምረው አረንድ ጆርጂያትል ሊጊሰትነይዙ ስረት አቒል ሊግዘው ፖለቲከዙ አይር እጅር አረጘድም አልስርኲች።

ምርፀዙ ዝምረይዝም 100 ሚሊዮን ዶላርዝ ንየ ጊንዝቭዝ ትራምፕቱ ኪርመነ ምርፀይል ዊነቊ ሌተናንት ቅመተ በርት ጆንሰንም ሲን አርፈይዝ ፃጝሽተው ኪርመነዙ ምርፀድ ለጣቕጝኩⶔ።
ሚዝረድ africanews ቲስ ችጝኑን!!

‎ሳምራዊት ግርማይ

ጥቅምት 30/2019