ዓልምት ልኰ ኳስ ፈንድ ነንቱ ሰቲዝ ኽየው ጊንዝቭ ፊሰነዊ ችጝሸው አቓጙ ተርሽም እኔን ገቨድ ስፖርቲዙ ሊግዝቲዝ ኽየው ጥቕዘ ጭሰው አቐነውድ ጥውሸውዝ ቓሊሰቊ ክለቨኒስ ኮሞ ዳቕሽተተ የጝ።
ክለቭድ 1970 አ.እዝጘዝ ሲሪሸነው ቸለው አቓንድ ጅውነዙ ዋርደኒስ ጎነ ጻቭ ነንቱ ሰቲዝ ዓልምትል ኽየው ትኩርት ዊትረነው ቸለው ክለቭ አቐነው ቸልኲ።
ክለቭድ 4ትረ ጣሊያንቱ ሊጊል አሽ ጊመነውዙ ሲጘ ፃየው አቕሽም ሊግዘጢዝ ይወው አገነይዝ ጝሲጘይድ ሊጘት ጻፈነው ቸለው ክለቭ የጝ። ቺተዝም ኢንዶኔዥያት ፃጀ ጉይጥ ዝመ ቴሪ ሄኔሪ ስመ ሴክስ ፋብሪጋስ ጻይሸት እግረ ግን ጣሊያንቱ ልኰ ኳስድ ጉልምደነዊስ ከስጘ ዓልምትል አይር ሲጘ ጻፍጠጘድ ቸልስኲ።
ሳልጥንዘተ ሴክስ ፋብሪጋስ ሳልጥናⶔ 2024 ቲክርክረዙ ዓምረይዝ አይነተ ሊጊዝጎ 73 ነቊጠን እኽቨነውዝ ሴሪአትጎ ሊግዘነው ቸልኲ።
ሊጊዝጎ ሊግዘናንስም 21እምተን ኻየነው ግድ ዊንኲ። ክለቨድ ሊግዘጢዝ ትኲርት ይወነውድ ፈኒዙ ኽየው ሚስጥርም አቕኲ። 2024/2025 ቲክርክረዙ ዓምረይዝ ቈሽ ኮሞ 13ዋርደንድ ኻቕኲ፤10ን እርወ ፍ፣ 15ይዝ ኻሽ ቲክርክረዙ ዓምረድ ኻተነው ቸልሽም ሊግዙ እትለ አቐነውድ ቓሊሱ።
2025/2026 ቲክርክረዙ ዓምረይዝ ግነ እትለ አቐነዊስ ከስጘ ጥቕዘ ፋጥረተም አቕኲ። ቲክርክረዙ ዓምረድም 71ነቊጠንዝ 4ትረ ተግ ጻይ ኻቱ።
እን ፈንድ ክለቭዙ ሲርሽኒዙ ሲጘይዝ ኪርመነ ተግዝ አውሮፖት ቻምፒየንስ ሊግዙ ሲትፍሸተ አቓንስ ቸልሱ። 2026አውሮፖት ቻምፒየንስ ሊግዙ ቲክርክረይዝም ቲክርክረይዝ አይር አቐውድ ኮሞ ማንችስተር ዮናይትድ፡ አርቢ ላይፕዚግ ስመ ሌንስ ለጣቓንድ ፊኖርድስ ቈሽ ለጣሽ 9 ነቊጠዝ 4ትረ ተግል ጐየነው ቸልኩ።
ኒኮ ፓዝ፣ ኩንያ፣ ሊቤራሊ፣ ሜምፒፎ ባቱሪና ተከቁ ሊግዘጥድ ክለቭድ ጉልምድ እትላንስ ቸልስጝኩጙ። ኮሞቱ ኽየው ሰቭድ ሊግዘጢዝ አገነ ይወነው፣ ስልጠነዙ ጻጝትድ ዚምንድ ቲክነው ዝመ እጝቅቱ ስዛድ ዋቕረው አቐነውድ ቓሊሰው የጝ።
ይና ኻግርቱ ስፖርትድ ሊግዛንስም ኮሞቲስ ዲዝጝት ፊሰነውድ ሊግዘጢዝ አገነ ይወነው ዝመ ስልጠነድ ቺዝሸነውድ የጝ
አመልማል ተድላ
የጥቅምት 30/2019
