ጎጠኝነይ ኻሰቭ እጀቊዙ እምንት አጠ ጡሻውም!

ዚምኑ ኻሰቭዝ እቅዙ ጥቅልሸነ ጻመድ ላብጠቱ ኻሰቭ፣ ላብጠቱ አርወ፣ ላብጠቱ ከቨከቭሽትን ፣ ላብጠቱ ትርክት ፋጥረነው የጝ፡፡ እንቂስቅ ፊሰፊስሽተው አቅም ቈሽ ሊግዝትዙ፣ ትውጽውጸዙ ጉግድ ሳልጥዘኵ፡፡ እንቅ ገቨድ ፣ እንቅ ችጘነድቅ ጭቅቱዝመ ሳይንስዙ ዊግሽን አቓንድ አርወድ ቲስመምዘው፣ ጉግድ ፈራቐው፣ አምነአምንሽንድ ኽየው ጻቨኵ፡፡ ጽጋድ ኒቅልሽ አቅም ቲክልሸኵ፡፡ አቅም ቲክልሸውዜ ቈሽ እክሰ ደድሽተኵ፡፡

እን ጕግድ ትውጽውጸው አቕሽም ፤ ገነ ድኽ ኻግራንል ቓልሽተው ገቨድ ግነ ጎጠኝነይዙ መነጸር ሲርን ደጝት ይወነው ዲዝጝሸው አቕኵ፡፡ ጎጠኝነይዙ ጎንጥድ ፡-

ኻሰቭዙ እጅጝት፣

አቅምዝመ ቸልትዙ እጅጝት፣

ስልጣን በነነውዝመ ሊምድሰነውዙ በን፣

ዊርቨዙ እኹርሽነይዝ አርወነው፣

ይናው ኻሰቪስ ቢዘ ለምርሽነይ እጀውም የው ቓለዝ ያን ክጠውዜ ተየ ቢቊሊነ የው ኻሰቭዝ አኽቭሸው የጝ፡፡

ጎጠኝነይዝ አኽቭሸነውዙ ኻሰቭድ ችጝዘው ቈጨድ ፡-

ኽዝቫንድ ላው ጻቭ ቓላው አቓንስቅ አገልግለ ይውንድ አድልወተ የጝ፡፡ አድልወተ አቐነውድ ቲክን ቀሰው ጭሰጭሰንዙ ችግሰ ፋጥረኵ፡፡ ምጝግሥቱ አርወድ፣ አግልግለድ ይቊዝ ጭቊ የነውዝ እክሰ ጒድልዘኵ፡፡ አርወ ዳዘኵ፡፡ ሙስነዝ እፍርት ዳዝኩ፡፡ ላጥድ ሽቕትንዝ ቓለው አቓንስቅ ላውንትዙ ጥወ እጀውም፡፡ ላውንትዙዝመ እፍርትዙ ኒቪዝመ እትለ እጀው አቓንስቅም ኻይሽታውም፡፡

ጎጠኝነይ ፡-

ላው ጅውነል እኹርሸነውዝ፣

ላው ቈንቈ ዊግተነውዝ፣

ላው እምንት ቲክነነውዝ፣

ላው ፖለቲኵ ቓለ ጻየነውዝ፣

ላው ዲዝጝት ጻየነውዝ …. የውም ላጥ ላው ጻቭጥጘ ቸለቊ ገብድ ጎነ ጻቨነውዝ ፋጥርሸው አጸው ገውተረ ቓለ የጝ፡፡ ኻሰቭዝመ አርቕትዝ ለጣቐነው ዊንም ላጢዝ ልብሰነው በቊዙ ምሽግም የጝ፡፡ ወነይዝ እልትዝ ዲስሽጠ ቸለው፣ አርወው ተክዝጠ ቸለው አቕሽም ግን ቓዳው አቕረው ኽየው ልኻን የጝ፡፡ ላጢዝ ቈሽ በዊል ፈው እትለው ልኻን የጝ፡፡ አቒድ ቢስብሰው አቓንስቅ ጣዝጘድ ቅብራንስ ገረዱ ፓራዳይም ሽፍትዝ ዲቊሽተው፣ ነቃቐው ኹርዝ ላውጥሽጠ ቸለው አቐነውድ ዘስክርሽጠ ጡሻውም፡፡

ጎጠኝነይዙ ጎነድ አድልወዝመ ጭቅቱ አቓቅ የነው አቓንስቅ ቈጨዝ ወሰው ኽዝቭ ፋጥረኵ፤ ወሰው ኽዝቭ ቈሽ ስጙሽ ዚምናንዝ ኵንሸውድ፤ ላው ሰትዝ ድሰኵ፤ ኻሽትዝ ጽርሽ ኵርንድ፤ ደቂቀዝ ማጥማጥዘኵ፡፡ ጎጠኝነይ ኻሰቭ እጀቊዙ እምንት አጠ ጡሻውም የውድ እንዝ የጝ፡፡ አሰነድ እምንትዝ ኽጤት ፣ ዓልምዝ ቈሽ ጻለት ፋጥረነው ጚ እማንዙ ሜዳልየ ጭምሳውም፡፡ ጎጠኝነይዙ ምሽግድ ኻየኻይሽተነው የጝ፤ ኻየኻይሽተነው ቈሽ ናጸዝ ጽብተ ጡሸው ዓልሚል ናጽነይ ቢሰው አርወዙ ልየ የጝ፡፡

ናጽነይድ አርወዝ ቀምሸው ስረትዝ ዊንም ኽግዝ ሠራሻውም፤ ጝቀለኸድ ሴረ ዲውለነው አቓንስቅ አርወድ በክንዘኵ፤ እክሰድ ቈጨ ጻቨኵ፡፡ አቓንስቅም ይናወይኽምረት ቈሽ ድኽ ኻግራኒል እትለው እን ኻቨረ ማሉዘይዙ ጻመይስ ፈነው ጡሸኵ፤ ይናአኽቭሸነድ ለውንትዝ አኽቨው የውም አርወው ቅመተ ትርክት አጠ ጡሸኵ፡፡ እጂስ እጂ ምቅሸው ቀንይንዙዝመ ሽቕትንዙ ማጽቨድ ናንዝ ናን አምነአምንሽን ኵነነውዙ ጥወይዝጎ ላውጠነው ጡውሸኵ፡፡ ንጭ ታትነ በንነው፤ አምርም ምነንድነው ግርየ ጭቊ አቒንቀ ዚምንድ ማጽነው እጅር አቕን ችጝሸነው ጡሸኵ፡፡ ይናቊሪዝ ንጭት ተከው አቒንቀ ዘላልም እምጥጘዝ ጽበናንስ ምነንድነው ገቨድ ፋጥረናንስ አቢሰው፣ ቓዳው ልኻኒስ ፈነውዝ እንቅትወ ኻግርት ኲነናንስ ሠራሸነው ጡሸኵ፡፡

ግርማ ተጫነ

`ግንቭት 15/2017