እኹርሽ ሊግዘውድ ወይ ኽምረ ብሔረ እቅ ጭሰጭሰን ዝቛለ ወረደ ቃውሰው ጭጝሽኒዝ ንቃ-ተደራጅ ዊንም ነንቱ ጭጝሽኒዝ አቕሸሩ ቀቨሊ ስስጙ ሊቫኖስ ይሽትረይ ኪውትል የጝ።
አዊንም ገጠርዙ ኹሪዝጘድቅ ቅም ፍጭር ኻያጙ፤ ቺዝጝዙ ሰቭም አክንዋጙ ሊግዝኩ። ዚምኑ ክንድጝ ጝ ፃምጢዝጘድቅ ክንጠ ኪርምሽም ጚር ግነ ክኽነትዙ ክንድጝ ክንድ መርግ ጉርየ አጠጘድ በን ቓሊስጙ።
እድወ ውሸብለድ ጝ አለመይስ ፅጋረነዊስ ኻዝንሽም ጚርት ግነ ኻዝንሰነዊስ እምጥጝዘነውድ ቀኑ። ‘አዚተነው መስዋትነይስ ኽየኩ’ ያንትጘ መፃፍ ቅዱስ ይሽተውድም ፃቭ ምከንሸንት አግልግለነው ኪርሙ።
ውሸብለድ ዚምኑ ክንድጝ ክንደቁ ጝ ፃምጥድ ቓላንድ ፃየዊዝ ጠራቐነው ቸልየውም፤ እንዝም ሲርየ ኻትመ ጥውን ጝቕመት ዚምንድ ችጘዊል ችጝዘናንስ ፃየው ኻለይዝ ሲርየ ንቕፀው ኰርዝ አወይ ጝኒቪድ እሩዘጘ ኻስቨነውድ ፃየፃዩ።
አነጚ ኻስቫንትጘድ ኻትመ ጥውን አወየው አቕንትዝ ጭሰጭሽተነው ቸልሸጘም ማኽረውም አነ ከቨው ዊንየውም። እንም ጭቑ አይንቀት ጚር ዚምኑ ክንድጝድ ክንዳየጘ ፃቨነውድ ቈሽ ኻትመይል ፃየው ልብትንድ ጥምትጠጘድ ፃቨነውድም አጉረው ችጘር ፃየው ዊኑ።
አቭነት ክንድጚስ ጋብዝ ጋብ ዚምኑ ክንድጝድ ዚልቅጝ ኮሌጅ ዝመ ዩኒቨርስቲ ጥውጝ ሰቭም ፃየቁ ፃምጥድ ቓሉ። እግርገ እዳቑን የው ኽነም ጭሱ። ይቕመትስ አወሽ ላውጨ ቸለኩን? የው ኻሰቭ ጉያጙ ማላጙ ቅም ፍጭር ኻየነው ላውጣው አቐነውድም ልብቱ።
እድወ እን ውሸብለድ ዊተ ጎነ አቐው ጊንዝቭ ፃየነውዝ ንግርንዝ ጭሰጭሽተናንስም ጝቕመጅቅ ማኽሩ፤ አነጚ እኒንት ፃቨናንስ ቸልሰው ጊንዝቭዙ ፃጀ እጀውም ዊኑ።
ሊግዘው ጊዝ ፊስ ኻስቨነውዝም ጝ አእምሮይል ላው ገቨ ቲንዱ። እኒንም ፃረው ሰሊጠ ጊቭርዘነው ዊኑ። ኻስቨጘድም ጚርቱ ቺዝጚል ኪርመነ ኰርዝ ሰሊጠ ፊዝ 20 ኩንታል ጊቭርዝ ንግርንዝ አቐው ጊንዝቭ ችጙ።
አርወይዙ ጣምነድም ችጝ ሊጘትረ አምረይዝም ደግም ጒዘነውዝ 30 ኩንታሊስ ንየ ጊቭርዘነው ቸልኩ። ወረደይል ፃረው ሰሊጠ ቃውስጝ ዲዝጝሰቊስም ላውድ የጝ የናን እብለውዘነው (ኲነነው) አቓውም።
ኰሪዝ አርየ ፊሰው ወየይዝ ሰሊጠድ ቅየነውዝ 30 ሽኽ ቁርሽ ፃየነው ቸሉ። መሉ ሲንቀት ኪርም ኻስቫጙ ዊነው ንግርንዙ ሰቭድም ሰራሸነው ኪርሙ። ቺተቺተቊ ፍጭር፣ቅምዝመ ቢል ጅቫጙ መተመትጎ ፊስ ቅየነውዙ ሰቪልም ውላቑ።
ንግርንድ ፊሰተ አቐነውድ ገነ ኪርመነይዝ ልብተው ውሸብለድ፤ ጥወርድም ሊጊሳጙ ፃነቁ እንሰሲዙ እግዘድ ቈሸነውዝ አጉረተ ጊንዝቭም ችጘነው ቸልኩ።
ኢትዮጵየስመ ሱዳንቱ ድበሪል ቅያጙ ዊነው ውሸብለድ ንቕፅ የው ትርፍ ችጘናንስም ኽጉ አየው ጉግዝ ኢትዮጵየቲስ ሱዳንትጎ ከሰነውዝ ኮንትሮባንድዙ ንግርን ኪርሙ፤ አነ ጚ ላው ኰሪዝ ግነ ኻሊየው ገቨ አጋልዙ።
‘ቈንሽተ ፊትር ምጢትር ተርች’ ይሽታንትጘ ምነነ ዝመ ኒቪ ሊቁዝ ዊነው ውሸብለድ ጝ ሰምሰድ ኪለው ጝኒቪድ ጥምሰው ገቨ አጋልዙ። እኔንም አቐውድ ቢል ፃይ ጫነዝ ጫነ ጭቭስ ድበር ከስጠ ሚኩራጙ ፃውተዝቁ ኻይለኒዝ ፃይሽት ፃየው ጥፍትድቅ ማጥልሸነውድ የጝ።
ንግርንድ ሊግዛጙ ምነነድ ቕድቕዳጙ ዊነው ውሸብለድ፤ እግርገ ስላተነውዝ ፃየውድቅ ጥቅነይዝጘ ቢትንሽ ዊነው ድኽቲዝጎም ዋጥሩ። እን ሲጘ ጉርየ ውሸብለድ አደባባይ (ሙሉቀን) ደባሽ ይሽተኲ።
ባዶ ናን አቕ ጝነቊልም ዋጥረናንስ ድፍርት በው ውሸብለድ፤ ቲክነው ኪሰረድ ከስጠ ቸለው መለም መልቱ። 2001 ዓ.ስቱ ጫረይዝ መተመ ቺዝጝ ጅቨነውዝ ጝ ኻግር ጥወነ ጥፍትም ጊቭርዝ ዋጥሩ።
2004 ዓ.ስ ጝእኹርሸው ጅውነይዝጐ ዋጥረነውዝም “ቢስብሰው ስወ ገውታውም’ ይሽታንትጘ ዝቛለ ወረደ ፅፅቀ ኻትመይል ዋልጠ ሽኽ ጝቕመቱ ዝመ ሊጘ ሽኽ ቁርሽ እድወዝ ሰቭ ኪርሙ። እኒንት ፃቫንድ እድወ ጝ ፃምጥድ ማልጝ ፊርጘው ዚምኑ ክንድጝድም ጋብዝጋብ ቃፅልሰናንስ አለመ ፃቨው የጝ።
ጥቅለዝ ሰውጠ ሽኽ ቁርሸንዙ ካፒታልዝ ባኽልቁ አልብዝመ ሻቅጠ ማቅጠዙ ሰቭል ውላቕ አይርዝም ሰቭ ኪርመነው ቸልኩ። ሊጘ እምትዝ ቀሰው ጥወር ችጛጙ ዊንሽም ዋጥር ቓዝቕዘነውድ ዳቕየውም።
ሊቭን ጎነው ዲዝጘው ውሸብለ አደባባይ፤ ሰቪዙ ዚርፍድ ላውጠነውዝ ዝቛለ ቃውሰተ ሆስፒታሊል ኹረ አልሰነው ጨረተይል ሲትፍሽ ኻቐነውዝ አጠ በነው ጝኒቪድ እሩዘነው ቸልኩ።
ውሸብለድ ሆስፒታሊስ ፈት እግርገም ሲሚንቶ፣ ኽንፀዙ መሰሪየን፣ጎሚስተ፣ቢረ፣ አቑ እንዝጘም ኻውየተ ቅየነው ሰቭል ውላቕ ሺክርክርሸተ ጅቨነው ቸልኩ።
ንግርንዙ መለድ ጥውሸውዝ ልብት ኰሪዝጘድቅ አርየድ ላውጥውጠጘ ድቈው ሲጘ ጉርየድ፤ ነንቱ ሰቲዝ ሳረዝመ ጥርዙ ንግርኒል ውላቐው አቓንድ፤ ሲዘ ዲናሞዙ ዛቐነ እቈን ፅበነዝመ ድርጅትዙ ስፍረ ጅቨነውዝ አርየዙ ሼድ ተሰነው ቸልኩ፤ እኒስም ከስጘ ሳቁጠ ኻትመይልም ፅበነ ጝን ጅቭኩ።
አርየ ዊትርቅም ዊነዊል ችብራው አቐነውድ ጉየው ውሸብለድ፤ ሆቴልዙ ኢንቨስትመንትል ውላቐናንስ ቃውሰ አስልሽት ፃቫጙ ችጝሸኩ። ንጭ ኻትመሸንትል እኩጙ ይሽተቁ ውሸብል ፃጀ ጉይጢስ ላውድ አቓንድ፤ አትረቁ ውሸብሊዙ ተከ አቐነውዝም ቃውሰተዝ ጭጝሸው የጝ። እግርገ እዳቑን የው ዚምኑ ክንድጚዝም አቕሽ ዲቈው 2016ቱ ክንድጝ ዚምኒዝ 12ትረ ክፍል ማትሪክዙ ፈተነ ፊትንሸተም ዊኑ።
” ያን እደረት ሚዜንዘውድ ከቨተ እጀው ምነነ ቀቪንቀት ሊቭ ጉጨጘድ ፃቨነዊዝ የጝ፤ከየም ሲሪ ኹልዝ በርክጭኩን፤ ይጝነቁድም ከቨናንስ ተንጫቅም፤ እኒስ ንየ ሊግዘናንስ ልቕርደኩን። ፃቀዊዝም እምጥጝኩን” የነውዝ ዊኑ ጋልፀውድ።
ጝ ዊግኒዝ ሰቭዙ አገነም ፋጥርኩ። ጝፅን ትቑርትም ክንሰኲ። ጝጝኒል አቭን ቺት አርቓውም። አንክርሰው ገቨድ ቈሽ ነንትልም አሽ ቅመነ እንሰሰንድ ጝጝን ፍርዛጙ ጫረ እየ እጀው ፃርጘ ቀቫው አቐነውድ የጝ።
“ይበልቪት አድየ ነጋሽ ይጋቢል አቕር አጋልዘቁ ችግሰንጢዝቅ እክሰ አቐው ኻሰቭ አድለነዊስ ከስጘ፤ ቲግቭርዝ ሰቭተነውዝ እን ደረጀይል ችጝነጘድ ፃቭረው ልቕረድ ቀለውዝ ቓልሽተው አየውም፤ እንዝም እነይረይ አምኰረ እውነት እደረ ነየነዊስ ኲረኩን”ያንድም ጝውነትል ፃየው እምንትድ ዊግተኲ።
አሰነይዝም ውሸብለ አደባባይ ሩሔ ዊትርቅም ፈተነ አቐነውድ ጉይ፤ “ወርሽረውድ ፈተነይዝ ሊቨነዊስ አይንቀት ምነነ ቀቭር ክተግረድ ችብስራንድ የጝ” የነውዝ ላዊዝ እሩዳቅ ያንድ ላየ ጉግዝ ሚኩረነው ጡሸጘም ማኽረኩ።
ኪሮስ ወ/ተንሳይ
ሲኔ 30/2017
