ቃዉሰ ቲክነዝ ቲግቭረንድ አክንውነ

ኢትዮጵየ እንቅ ሚስከኒዝ አውግረው ሚርዬ ተምዘቊ ንቕፀቊ ኻለየን ፅይረይ ጚ፡፡ ደርሰቊ ኻለየንድ ቃውሰ ቲክነዝ እቑረናንስ ቈሽ አምንሰው ዲግ ተሚሰኵ፡፡ እምተንዝ  ትጉለልድጛጙ ነንቱ ኰርል ችጘቊ ማኽሊስ ላውድ ፖለቲከዙ ምህዳር አቒል ቓሊሽተው ቅራኒዝ እቻቐው ዲምቅሽን የጝ ፅበውድ፡፡ እኒን ዲምቅሽንድ ሽክትንዝመ ቂም በቀልዝ እንዝጘም ጭቕትዝ አብልሸው አቐነዊዝ ቺተንድ ዲግ አቐው ጒደነዝ አቭንውሰናንስ ቸልሰው ተምዝት ቢስኩ፡፡ ብሔሩ ገበን አቕጝ ደርሰቊ ገበኒዝ ጅልውዘ ጎይን አቭላይተ ፃቨናንስ ቸልሰው መድራኽ ፋጥረነው እዳቕ፣ አልትልትን ዊገዊግሸናንስ ቺግርዘው ገቭ አቐነውድ ዲቈቊ እምተኒዝ ቓልንኩኑን፡፡  እሩነይዝመ ኪብረኪብርሽንል ሲርዬ ፃቨቊ ገበንድ ቺዘነውዝ ደርሰተ ቃውስጠ ጥውሸው ኻለይድ ፅይን ሰራሸነው ተሚሰኩ፡፡

እንቅ ሚስኪዝ ጊቭርትዝመ ጊቭርትነይዙ ኻለይድ ኻስቭዝጠ ጥውሸኩ፡፡ ኢትዮጵየ አንቅ ሚስከንዝ ሰራሸነው ቸልነውዜ ገነ ዳቕሽትየው እጅርዙ ግርቪስ 70 ላይስ አቐው ኽዝቭድ ውሸብለ የጝ፡፡ እኒን ውሸብለ አቐው እጅርዙ ኻይልድ ፅይን አርሽነይዝ፣ ኢንዱስትሪዝ፣ ቲሪዝምዝመ ቴክኖሎጂዝ ተከቊ ፍልውልወንጥዝ እማንትዝ አክንወነው ቸልሸውዜ ሲጘ ሰራሸነው ቸልሸኩ፡፡ ቢዘይስ ጥወቊ ጊቭርተንድ ቲክየነው ጭቑ አቒጝቀስ እቻቐው አፍሪከስም አቑ ላጥ አኽጉራኒስ ኻስቭሸዊስ ንዬ ቢዘዙ ምንዛሪ ፍርዘነው ቸልሰቊ ንቕፀቊ አገንጥ እኩጙ፡፡ እንዝም ማጥን ተሚሳው ገቨዝ በክነው ፃጀዝመ ጊዝድ ሰቭል ግሪያንስ ፃቨነው አይንተ ኻለይ አጠ ጥውሸኩ፡፡

ኢትዮጵየቱ ዝቨይስ ኒቅልሽ ድዝጠ ጥውሸው ገቨይስ ላውድ ኽጉ አቕየው ገቨድ ንቕጽነይድ የጝ፡፡ እኒን ገቨድ ምጝግስቱ አግልግለድ እግርገ እዳቐው አቓንስ፣ ሰቭዝመ ሰራሸተዝ ዲምቅሻየጘድ፣ ጊቭርዘተ አቒጝቀስ ሰቭ በተ ውሸብለ ፈራቓንስዝመ ኻግርዝ አርዋቊ ንቕፀቊ ችግሰንጥ ፋጥርሽጛንስ ፃቫጙ የጝ፡፡ ላዬ ገቨድ ቈሽ ነንቱ ሰትዝ ኽዝቭዙ ፅብንድ ችግሰል ማላጙ ፅበውድ ፅብንዙ ኪብርንድ የጝ፡፡ ምጝግስት ቲክንክነዝ ወዬዙ ቈሽንድ ጊምዘነውዝ ፅብንዙ ኪብርንድ ቀልዘናንስ ቺተቺተቊ ገበንዝ ጋልፀቊ ገበን እኩጙ፡፡ አቕሽም ግነ ቲግቭርዝ ልውጠ ነሰነው አቒጝቀስ ጊዝ ጨቨቅ ቈሻጙ ተረንድ ቓሊሽታጙ የጝ፡፡

ጥቅለዝ ኻግር አቅቨ ተግዝም አቑ ብሔረ እቅ ጭሰጭሰን ተግዝ ቃውሰ ቲክነዝ ሰራሽትጥጘ ጥውሸቊ ገበንድ ቃውሰነውዝ ኽዝቭዙ ዋቕረድ ዊሰናንስ እማንትዝ ሰራሽነ ጥውሸኩ፡፡ እኒን አጠ ቸለውድ ቈሽ ዲግ ተራንስ ሚንውትዝ ሰራሸነው፣ ዊትርቅትቊ ዋቕርጥ አቐቊድ ቺዘነውዝ ዊሰ ይወነው ቸልሻንድ እማንትዝ ቲግቭሪል ግሪሰነው አቐነውድ ደድሰነው ቸልሸኩ፡፡ አምረ ጨቨቅ ጫረድ ዲቊ ሚስኩርም ቅሻንድ ኻለይ ኻልየነው ጭቑ አቒጝቀስ ውር ቑጠድ ቲግቭርዝ አክንውኑን ይን ዋቕረነውዝመ አኑሽን እማንትዝ ሰራሸነው ይና ባኽል አጠ ጥውሸኩ፡፡

ወንድሙ ቸኮለ

ኻምል 30/2017