አሚኮ ቦርድዙ አኽቨተይስ ጋልፅሽታንድ

ታኽሰስ 7/1987 ዓ.ስ በኩር ጋዜጠዝ 8 ጋጸኒዝ ጝሰቭድ ኪርመዉ አሚኮ ንጭቱ ሰትዝ ኢትዮጵየ ጽይረቁ አጉረጥ ሚዲየዝቁ ችብረኒስ ለወትረይዝመ ቃዉሰተ የጝ።

30 እምት ኢትዮጵየቱ ሚዲየዙ ሲጘይስ አቐይ ጝወንቱ ደፈድ እቑርኩ። ጝሲጘይስም ኹሊዝ ደፈ ማልኩ። ብላ ሚዲያ ኮርፖሬሽን። ንጭቱ ይነ ጽፈሸዝ ብላ ክልሊዙ ብልጽግነ ፓርቲ ጨፈት ጽ/ጝንዙ ዲቈተዝመ ብላ ሚዲየ ኮርፖሬሽን ቦርድዙ አኽቨተ አት ይርጋ ሲሳይጅቅ አሚኮቱ 30 ምትድ ምላሠን ጻቨነዉዝ ጻብነዉ ዊንተድ አንቭቭስነ ቀኑን።

30 እምታን አቒዝ እክሰቁ ሩድን አብኑሰነዉ ቸለዉ አይነተዝመ ቃውሰተድ ክልሊዙ ጥቅለ ሊግዝትድ ኮሪሥ ኮር አትርዘነዉዝ ጋብ እክሰቁ ገባንድቅ ሰራሽኩ። ክልሊዙ ኽዝቭድ ላዉ አቕ ጝሚቭትድ ኪብርሽ እፍርትዝ፣ ዲግዝመ ላጥ ሚስከኒዝም አቕሽ አሩሸተ አቕ ቃጽላንስ አሚኮ ጝወንቱ ደፈድ እቁራጙ ችጝሸዉ ሚዲየ አቐነዉድ ብላ ክልሊዙ ብልጽግነ ፓርቲ ጨፍት ጽ/ጝንዙ ዲቈተዝመ ብላ ሚዲየ ኮርፖሬሽን ቦርድዙ አኽቨተ አት ይርጋ ሲሳይ ዊግትጝ። “ብላ ክልልድ ዲቈቁ 30 እምታን አቒዝ ዲግዙ ብሽትኒጅቅ ጻየ ጻይሽት ኮር ጨቨቅ ችግሰ አጋልዘኩ። እን ችግሰይዙ አይነተ ጎንድ ቆሽ ፖለቲከ የጝ። ኽዝቪዙ እማንቱ፣ ጭቅየዉ ሚዝረ ይወነዉዝ ዲግድ እሩዳንስ ኽዝቪዙ ሚቭትድ ፥ ኽዝቪዙ ናጽነይድ፥ ኽዝቪዙ ለወንትድ ኻይሽት ቃጽላንስ ኽየዉ ሰቭ ሰራሻጙ ችጝሸዉ ሚዲየ የጝ”። የቁድ ቦርድዙ አኽቨተድ አይነትነይዝም እፍርትዝመ ቀሰዉ ጭሰጭሰንዙ ችግሰንጥድ ቺትጛጙ እኪርጥጘ ጻቨነዉዝ  ሚዝረንጥድ አኽቭ አጀንደ ጻቨነዉዝ ችግሰንጥድ እኪርጥጘ ማጥን ወንነይዙ ወይሰድ ሊጊሠነዉዝጋብ ብላ ኽዝቪዝ ቀሰዉ ሰቭ ሰራሸነዉ ቸለዉ ሚዲየ የጝ። ይጛንድም ጋልጸነዉቸልጝኩጙ።

ዲቈቁ እምታኒስ ኪርም ክልልድ ቀሰዉ ጭሰጭሰንዙ ችግሰይዝ ምላሠን ኻሚታጙ ችጝሸኩ። አሚኮ ኽዝቭዙ ድመ አቐነዉዝ ጝችጘርድ ፈነዉዝ ጋብ አይነተዝም እጅር ኹር ጝእርጙድ ጂዘዉ አካል ደምዘዉ ኮሪዝ ቃዉስ ጽንኸ ጻቨነዉዝ አጀንደ ቃርጸነዉዝ አደቫቫይዝ ሚሪሸዉ እቀ ኽቭሪዙ ክፍልድ አቭላይሰነዉዝመ ጝችግሰንጢዝ እማንቱ ዊሰ ችጝጠ ሹሹድን ጻቨነዉዝ አሚኮቱ እኩሰድ አጉረዉ የጝ።

“ክልልድ ኽየዉ አቐነዊጅቅ ጻየ ጻይሽት እክሰቁ እፍርትዝቁ ሚስከኒዝ አይነተዝም ኢኮኖሚጅቅ ጻየ ጻይሽት ኮር ጨቨቅ ጝሊግዝትድም ጝችግሰንጥድም ሚዝን ኽዝቭዝ ችጝዘነዉዝ ጋብ ጝእኩሰድ እቀጘዝ ንየስ የዉ የጝ”። የቁድ አት ይርጋ እርጋቕየዉ እቀ ኽቭር ፋጥርሻንድ፣ እርጋቕየዉ ፖለቲከ ፋጥርሻንድ፣ እረጋቕየዉ ዲግ ዊናንድ አሚኮ ጝኻይልድ አኽቭነዉዝ በዉዝ በዉ ሹሹደነዉዝ ኽዝብዙ እንቅ ገቨይዝቅ ቃዉሰ ይወነዉዝ ኪፍለዉ መሥዋትነይድ ሚርሻዉ አቐነዉድ ጉይጝኩጙ። “አሚኮቱ ሰብተጥድ በዉዝ በዉ ችግሰ ጽበዉ ጅውነይል አጢስ ፊርጝ በዉዝ በዉ ኽዝቭዝ መስዋትነይ ኪፍልጋጙ ኮሪዝ ኽዝቭዝ አርወዉ ሚዝረድ ችጝዝጥጘ ማጥን ሰራሽጛጙ ችጝሽጘዉ ሰብድ ሚርሽተዉ አየዉም”።

ጥቅለዝ ለወንትዝ አዉነይ ኲንሽጠጘ ጻቨነዉዝ ጋብ ኽዝቭ ነቃጠጘን፣ ኽዝቭ ሚዝረ ጽይጠጘን ጻበነዉዝ ጋብ አሚኮ ሰራሸዉ ሰብድ እቀጘዝ አጉረዉ የጝ የቁድ ቦርድዙ አኽቨተድ ችብረይዙ አጉረተነይድ፣ ጥቕዘ ፋጥረተ አቐነዉድ ጝድምሽተተነይዝመ ጝአምንሽተነይድ ቲግቭርዝ ቃልሽትኩ። አሚኮቱ ችብረዙ ኲንንዝም ተክዘዝ ዳቕሽተዉ አጉረዉ ችብረየጝ አትረቁ ችብረጥ አቒስም ላዉድየጝ።

ኻግሪዝጘን ኢትዮጲውነይ ይሽተዉ አዉነይድ ለወንትዙ አዉነይ ኲንንዝ ብሄሩ ለወንት ኳንን ጋቢዝ ብላ ሚዲየ ኮርፖሬሽን ሰራሸዉ ሰቭድ እቐጘን ሊግዘዉ የጝ። ብላ ክልሊዝ ጭቑ አይቀስ ኢትዮጲውነይዝ፣ ለወንትዙ አዉ ይዙ እሴት ኲንንዝ ኻግርዙ ሊግዝትዝ ሰራሸዉ ችብረ የጝ። እን ቆሽ ብላ ክልሊዙ አይነተ ኽየዉ ጋልጽሽተነ የጝ። ብላ ክልሊዙ ኽዝቭድ ኢትዮጲውነይዝ ኽየዉ መሥዋትነይ ኪፍልኩ ብላ ክልሊዙ ሚቭትዝመ አርወድ ኪብርዝኩ እኒስ አይነተ ጋልጽሽተነድ ንቕፀቁ ቈንቁጥዝ ሰራሻጙ  ችጝሸዉ አቐነዊዝ እኔንቈሽ ብጭቕነይድ ቲግቭሪዝ ደድሰዉ የጝ ይጘኩ።

ጝንየትነይዝ ጭጝሽጠ ኒቪ ሊቁሰቁ ኒቪ ጉሬ አማራ ቴሌቭዥን፣ ኤፍኤምቱ ጣቪጥድ ቸበችብሰዉ አጉረዉ ችብረ የጝ። አሚኮ ሲጘይዝ አጉረዉ ችጘር ጽይጠጘን ክልሊዙ ምጝስቲዝመ ኽዝቭድ ሚዲየዝ ጽይጘዉ በንትድ አይነተድ ዊኑ የጝ ይጘዉድ።

1987 ዝ ላዉ ጋዜጠዝ ኪርመዉ አሚኮ እክሰቁ ፍን ጊምንዝመ ፈተጥንድ ችበችብር ፋጽመነዉዝ ክልሊዙ ኽዝቭ እንቅቱነይ ጌጸድ አርቐ አርቒሰነዉዝ አይጥ አይጥ ልዉጠን ተርጥጘ ቸልሰነዉዝ እጅጝ ጊዝ አቒዝ ልዉጠዙ ሃዋርያ አኩ።

አሚኮ ላዉ ጋዜጠዝ ኪርም ንጭትል 2 ቴሌቭዥንዙ ጣቢየን 7 ራዲዮንዝቁ ጣቢየን 4 ጋዜጠንዝመ እንቅም አይንት ዲጅታል ሚዲየንዝ ሚዝረንጥድ ለምሳጙ ችጝሸዉ ሚዲ የጝ ዲግ አጥን፡፡

አመልማል ተድላ

ንኻሽ 15/2017