ኻግሪዝጘ ኪብርሸቁ ኻይማኖቱ፣ ባኽሉ የውም ምጝግስቱ አምሩ በለንድ፣ እቀ ኽቭርድ ንቕፀዝ ኪብርዘውድ ጝጝኒል ዊንም ቆሽ ኻይማኖትዙ ችብረንጢል የጝ፡፡ ወይትጘድ ፊርናንድም ኻግሪዝጘ ኪብርሸቁ አምሩ በለንድ ጽብጘጘ አቕጝ ጅውነድ ጋልፀቁ፣ ኽዝቭዙ ላውንትነይዝመ ቀንትድ ቓሊሰቁ ወይቱ ጋልፅሽተነ አምሩ በለን እኩጙ፡፡ ዊትዊዝ ቓልናንድም ዋርደ ሆየ፣ ቕየቕየ፣ ሻደይስመ ለውፈረ ለውፈቱ በለን እኩጙ። እንዛይም እቁኒዝመ ግልቊዝ ኪብርሸቁ ጝታቕመቱ ቺተነ ፃየቁ አጘንድ እቁንዙ ናፅነይድ ደድሰነውዝ አልምዝ ተከ አቐው ወይቱ ኽዝቪዙ ባኽልድ፣ ጥቨቭዝመ ሲጘድ ኻግርዝ የውም አልምዝ አርቐ አርቒሰነውዝ አጉረው እኩሰ እኩሰውድ ሻደይቱ በል የጝ፡፡ ሻደይ ንኻሽ 16 ግሬይስ ኪርም ወይቱ እቁንድ ዋለይል አኽቭሽጝ እብለውትዝ ኪብርዝጘው በል የጝ፡፡ ሻደይ ውርም እኰ ኻፀዙ ሽⶔዝ ሽጙዝሽተው አቕሽም ኻይማኖቱዝመ ባኽሉ እፅቁፅቈ ፃየው በል የጝ፡፡ ኽፅምቲስ ኪርም ባኽሉ አልብዝ፣ ጥቨቭዙ ገይፀንጥዝ፣ ጅውነይዙ ቈንሽንዝ እፈር፣ ፅጎንዝመ ኲየንጣን አቘ ፈለፈል ተክጝ ግሪጘኩ፡፡ ብር ፃየው ፍጥሩ ጝተ ሚልኪል ጋሚ ቁንጭ፣ ሳዱለ፣ ግልቭጭድ፣ አልባስ፣ግጨ ፃቅሽጝ፣ ቀርዝዙ ቃጠ፣ ሽኳር ጻቭጝ እልድ እዳቒጝቀ ችልድ ቺልሽጝ ጝተ ቅምስመ እፅቈነ ዲጊል ሻደይቱ ኻፀድ ከምርጝ ሻደቱ በልዝ ፍጛንድ ላው ጊዝዊስ ፈቁ ተክጘኲ። ላየ ጅውነይስ ሽውቲጝቀት ቈንሽንድ፣ ጥዋሰድ፣ ቺልድ፣ ሚስቅልድ፣ ድሪድ፣ ማርደድ፣ ድኩትድ፣ ቅምስዝመ መልጎምድ፣ እፅቈነድ፣ ጊም ይናንድም ፃብድ ፃቭጝ ጝታቕምቱ ጥቨቭዝ የጝ ሻደይቱ በልድ እብለውዝጝ ግሪጘውድ። ገይፀንጥድም ጝተቕምቱ እክሰ ፃየቁ አቐነውድ ሰሃለ ሰየምት ወረደዙ ሻደይ ዋርደጥ ኲየንጣን ዊዝር ምልወ መንግስቴስመ ዊዝር ሰርኬ በየነ ዊግትጘኲ። ሻደይቱ በሊዝ ፃቭሽተቁ ሲረሲርንዝመ ገይፀንጥ፤ እፈርትነይድ፣ ፅጎንትነይድ፣ ኽይትነይድ፣ ጅውነይዙ ፃጀዝመ ዲግድ እንዝጘም ወግሽተቁዝመ ወግሽትየቁድ ጋልፀቁ አቐነውድም ሚሪጘኲ። “መልቁድ ቈንሽጘው ጋሚ ቁንጭድ፣ ሲርጘውድ ፃረው ቅምስ ዊንም ቲትሮን አልቨድ፣ ጭምርጘው እጥን ሚስቅልድ ጝተ እፈርትነይድ ጋልፀው አቓንድ ማርደ ቈሽጘውዜ ቈሽ ወግሽተቁ አቐነውድ ሚሪየው የጝ”። የነውዝ ዊዝር ሙሉወይ መንግስቴ ዊግትጝኩጝ:: ሻደይስ ጝታ ፅጎንትነይዝመ ነን ኲየን አቕጝ ሲርጘው ቅምስድ ቺተን ፃየው የጝ። ፅጎንትነይዝ ስነዝ ጝጭርዝጘው ሊግዘው ጥልፍዝመ መልጎም ፃየው ቅምስ ድጊል፤ እፅቈነድ ከምርጝ፣ አውርድ ሳዱለ ቈንሽጝ፣ ቕልመይል ኽየው ሚስቅልዝመ ድሪድ ጭምርጝ፣ ሊጘ ናንል ቈሽ ድኩትድ ፃቭጝ ሊንስ አደባባይል ፍጝ ዋርድጘንድ እልድ ጅልውዘቁ ዊንጘጘድ አስክዝጘኲ። “ጽጎንጥዙ ሲረሲርንድም ቅምስድ ጝጭረውድ ፃጀዙ ጋልፅሽተነ አቐነውድ ቓሊሰናንስመ ፅጎንትድ ጋልፀናንስ የጝ”። ነንቱ ሰቲዝም ጝተ አውርድ ድፍን ግልብጭ ቈንሽጝ ጥልፍድ ንቕፅየው ኲየንጣንዙ ፃረው ቅምስ ሲረነውዝ ግልቭጭ ቈንሽጝ ሻደይት ኪብርዝጛጙ አቐነውድ ዊግትጝኩⶔ። ሻደይቱ በልድ ኽፅም ጅውነይዝጘድ ጭቑ ኪብርሻጙ ዊነው በልድ ወይቱ ባኽልዝመ ገይፀድ ኻግርዝ የውም አልምዝ አርቕሽተነውድ ነን ቺት ይጠ ፃቨነውድም የጝ ሻደይቱ ዋርደጥድ ዊግትጘውድ። እቁን ጝተ እድሚዝጘ አውሪስ ኪርም ልኲል አሽ ባኽሉ ገይፀንዝ ስሪ ተክጝ ግሪጘኩ የቁድ ዊዝር ሰርኬ በየነ ቈሽ “ሻደይቱ በልዝ ከምርጘው ሻደይቱ ኻፀድ ዲግዙ እፃ ፃየው አቓንድ ሻቘ እድሚዙ ተግዝ ሲርሸቁ ጥቨቭዙ አይንተንድቅ ወይቱ ኽዝቪዙ ፃጀድ፣ ጥቨቭድ፣ ፅበፅብንድ፣ ዀነዀን፣ ሲረሲርን፣ ኪብረኪብርሽትንድ ቓሊሰቁ ጛይ” ይጝኩⶔ። ወይቱ ጅውነዙ ላውንትነይድ፣ ቀንትድ፣ ከቨከቭሽትንድ፣ ጥቨቭድ፣ ፃጀድ፣ ባኽልዝመ እምንትድ ሻደይቱ ዋርደጥ ሲርጘው አልቨዝመ ገይፀይስ የውም ዋርድጘው ዋርደይስ አንቭቨነው፣ ቓለነው የውም ልብተነው ቸልሸኩ፡፡ ኽፅምቲስ ኪርም ላውንትነይድ፣ ቀንትድ፣ ከቨከቭሽትንድ፣ ጥቨቭድ፣ ፃጀድ፣ ባኽልዝመ እሴትድ ኻየጘ ተረው ሻደይቱ በልድ ተረው ኹርዝ ከሰናንስ ሰራሻጙ አቐነውድም ወይ ኽምረ ብሔረ እቅ ጭሰጭሰን ባኽልዝመ ቱሪዝም ቃወነድ አርቒስኲ። 2017 ዓ.ስትዝም ወይቱ ጋልፅሽተነ አቐው ሻደይቱ በልድ እጝቅ በሊል ችጝሸው አካልድቅ ጅውነይዙ ባኽሉ ሲረሲርንዝ ኪብርዝጠ ማጥን ትኩርት ፃቭጝ ሰቭትጛጙ አቐነውድ ባኽል ቱሪዝም ቃወነይዙ ዲቈተ አት እዮብ ዘውዴ ዊግትጝኩⶔ። ዲቈተይዙ ጋልፀነይዝጘ እብለውትዝ ኪብርዘነዊስ ከስጘም እፈር ኲየንጣኒስ ዲዝጝት ፊሰነውዝ ባኽልድ ፃይን ፃጘናንስ ሰራሽታጙ ፅበው ሰቭድም ኽየው የጝ። ሻደይቱ በል ወይት ኽዝቪዙ ጥቨቭድ፣ ላውንትነይድ፣ ቀንትድ፣ ከቨከቭሽትንድ፣ ፃጀድ፣ ባኽልዝመ እምንትድ ጝ አቒዝ ፃየው በል የጝ። ኽፅምቱ ይና አቅልድ ለምስጘው በልድም ጅውነይዙ ጋልፅሽተነ ጥቨቭዙ ገይፀንጥዝ ኪብርዘነውዝ ተረው ኹሪዝ ዲቈዲቈሰናንስ ይና ዲቁትነይድ ፈነው ይና እጝቂስቅ ኻይሽተው አቐነውድ ይና ዲቪየዙ እፃ የጝ::
ሳምራዊት ግርማይ
ንኻሽ 15/2017
