ኹራረ የነት ኢትዮጵየት ገጠርዙ ጅውንጥል እቀኽቭርድ አቭርድንዝመ ላውንትዝ ሰራሽጘው ሰቭዙ አይንት የጝ።
እኔንም ጒዘነው፣ አርመነው፣ አይረነውዝመ ጣበነው አጠ ቸለኩ።
ንቕፀዝ አክንውሸውድ ጫረይዝ አቕሽም አርሽነይዙ ሰቪስ ቢዘም ጝን ኲንንዝ፣ ቅየንዝ፣ ኽዝንዝመ ላጥ እቀኽቭሪዙ ገረዱ ፍልውልወይል ቲግቭርሸው ስረት የጝ።
አርሽነይ እጅር ኹርዙ ፅብንዙ ኻለይ የጝ። እኔን ቈሽ ጒዝ ጨተይል ሊቨው ኽየው ዲቁትነይ አቓንስቅ ፊዘነ ሰቲስ ኪርም አርመዝመ አይርንዝ ቃዚ ችጘውድ ጥቅለናንስ ኹራረ ፃቭሽተኲ።
አርሽነይ ዚርፊል ንቕፀው ኻይልዝመ ልቕረ ተምዘው አቓንስቅ እቀኽቭርድም ኹራረ ላብጠቱ ጝታ ቲስመምን የጝ።ኹራረ እቀኽቭሪል ፅበው ገረዱ ዲምቅሽንድም አትርዘው የጝ።
አቭርድንዝ ሰራሽተው ሰቪል ችዝጝዙ ወነ ጋብዝ ጝ አቅሚዝጘ ምዘት አስልሽ፣ ሽላ ድቑሽት ሰቭተጥድ ዝቛንዳይጘጘ ግድርዳይጘጘ አልተኲ።
እንዝጘም ኹራረል ተረቁድ ዝላቓይጘጘ፣ ፃይጘው ጝታ አቅምድ አርውሽጝ ሰራሽጛንስ አስጘዝመ ጅመዙ ቸልት ፃየው እጅር ወረወርዘኲ።
አየው ላው እጅሪዝ ከስር ቓልተቅ ሲዝውሰው አርመድ እጅጝ ጊዝዝ አርምሽ አቢታንድ ቓልድረኲ።
ወይትጘ ሻቘ አይንት ኹራረዙ ሰቭ ፅበነውድ ጉየቁድ አበርገሌ ወረደዙ ፅበተ ዊዝር ኪሮሱ አብርሃ “ልቭነዝ፣ አቅም እጀቁድ ከቭሰነው፣ አስንጥ አዝንዝመ ጨውንዙ ኹራረ እኩ” ይጘኲ።
ዊዝር ኪሮሱቱ ጋልፅኒዝጘድ ልቭነ ይሽታንድ አኰዝ ንዬ አቕጝ ቃውስ ችጘው አርመድ ቲረዝ አርመነው የጝ፤ ጨውንዙ ዊንም አስንዙ ኹራረ አቐውዜ ቈሽ ጨውሸውድ 50 እጅሪል አሽ አጠ ቸለኩ።
ላው እጅር ጝለ አርም አብዛው አቐውዜ ኹራረ ጨው አርምሰኩ የነት የጝ። እን ኰርዝ አቘ አረ ጥውሸውዝ አስለነው ችዝጝዙ ወነይስ ኻይሽተኲ።
አሰነ ኹራረዙ አይንትድ ቈሽ እውነም አተ ቸለች ሽሚርም አጥጘ ቸልጘኩ አቑ አር (ድግስ) ፃቨናንስ አቅም እጀቁ፣ ኹለን እጀቁ ጝታ ችዝጝድ ፃም ጭጠ አቐውዜ ጅውነይዙ እቀኽቭርድ ማኽርሽጝ ጝታቕምቱ ምዘት ፃይጝ ፊረነውዝ አርምጝ ግሪጘኲ።
“ኹራረ ኽፅምቱ ይና አቅሊስ ፃይን ተርነው ሰቭዙ ባኽል የጝ” የቁድ ዊዝር ኪሮሱ ነንም ጝተ ጅውነይል አክንውሸው አቐነውድ ጋልፅጘኲ።
ግቭርድ ዊትቁ አጘውዜም ጊዝ ተነናንስ ላው እጅሪዙ ኻር፣ ላው እጅሪዙድ ጊርቀ ኹራረዝ አርምሽጠ ቸለኩ።
እጅርጅቅ አኽቭሽን አርመነዊስ ከስጘ ኹራረይል ኻስቨ ኻስቭሽትንዝመ ዘናሸነም ፃየው የጝ።
“ኻይል ፃየውድ ኹራረ ፃቨኩ አቅም እጀዊዝ ቈሽ ላው ላው እፈር በርሰነውዝ ከቭሽተኲ፣ ይና አቅልውድ በሪነቅም አቭርድን ሰራሽናጙ የጝ” ይጝኩⶔ ዊዝር ኪሮሱ።
ላየ ወረደይዙ ፅበተ አት ገብረ ፃዲቅ ሀበኖም “ጅውነይል ክትወርተ ክት ወርተ ይሽት ግሬ ፃየነውዝ ልቭነዝም አነ ተገተግሽትን አቅም እጀውድ ከቭስናጙ የጝ”ይጝኩⶔ።
ጅውነይል ኹራረ ጨውሽተውዜ አምርም እጝቂል ችጝጠ ቸለው አቓንስቅ አውም እዳቓው አቐነውድ ጒዝጨተድ ጒይጝኩⶔ።
ኹራረ በውግ ይና አቅልድ አምረዝ አምረ ሰራሽጘው ሰቭዙ ፍልውልወይዝ ሰቭ ቃልጥፍዘነ ጝተ መሰሪየ ዊነጘድ አርቕሽተው የጝ።
ነንም ስረትድ ድዝየው አቕሽም ሲዘ እምተኒስ እጝጎ ተረው አንጸ ኬሚካል ትንዝንድ ኹራረዝ ሰቭተነውዙ ዲዝጝትድ እግርሳጙ ዊነጘድም አት ገብረ ፃዲቅ አርቒስጝኩⶔ።
“እን አምረይዝ ጒዝጨተድ ኬሚካሊስ ናንዝ አርምሾድ ቺዝየው ጊቭርት ይወው አቐጘ ልብትናንስቅ ኹራረይዝጎ ዋጥርንኩኑን” የጝ ይጘውድ።
አበርገሌ ወረደይዝጘ 17 ሽኽዝ 9 ላዝ ንዬ ሄክታር ዝቨ ኽወዝ ሽፍንሽኲ። እኒስም ለወትረዝመ ሊጘትረ ጅልወዝ 8 ሽኽዝ ንየ ሄክታርድ አርምሸነውድ አርሽነይ ጽ/ጝኒል ኽወ እፍርትዙ ጓነ ቃወተ አት አግኝቸው አያና ዊግትጝኩⶔ።
“እቀኽቭርድ ፃየው ጝችዝጝድ ናንዝ ደግምግም አርማንስ የጝ ማኽርነውድ። ተር ፅበው አንፀ አርመ ኬሚካል ትንዝንድ ኻይልዝመ ጊዝ ቃፅቨው አቐነውድ ጚ ጊቭርትነይድም አነ ችዝጝዙ ዳኽንነይድ ቢሳጙ የጝ” ይጝኩጙ።
ነንቱ ሰቲዝ ይውሽተው ሙየዙ ከቨዝ እቀ ኽቭርድ ኬሚካልድ በር ጝነቁድ አኽቨነውዝ፣ ግፅጅቅ ልቭነ ፊሰነውዝመ ኹራረዝ አርማጙ አቐነውድ ሚሪሽኲ።
ኹራረ ጒዝጨተይዝ ቺተዝ ቈሽ ጫረይዝ ውር ቑጠ ከቨተ መሰሪ አቐነውድ፣ ኻሊሸው ሰቭድ ኰሪዝ ችጝዘነውዝ ጊዝዝመ ኻይል ቃፅቨነው ጋብዝም አውም ጝግል ችጘው እጀውም።
እንዝጘም ከቨከቭሽትንዝ፣ ኪብረኪብርሽትንዝመ ቀንትዝ ተረው ሰቭዙ ባኽል አቓንድ ሰቭ ማኽሊልም ዘናሸነቁ ጅመ፣ አስጘ፣ አቭርድን ዀነው ዝየነውድ ጥቅልዘው የጝ።
አቓንስቅም ገጠርዙ ጅውነይል እቀኽቭሪዝ ቀንሽተተ ሰቭዙ ስረት አቐነውድ ይና ገረዱ ዲቪየይዝ ደመደምስኑን ጭሩ አጥን።
ሳምራዊት ግርማይ
ንኻሽ 30/2017
