2018 ክንድጝዙ ዚምንዝ ፈኑ አቐው ክንደነ ክንሰነዙ ፃጝት ፋጥርሻንስ እጝቅም ጝችጝርድ ፈነው ጥውሸው አቐነው ጋዝጊቭለ ወረደ ክንድጝ ጽ/ጝንድ አርቒሱ።
ብላ ክልሊዝጘ ፋጥርሸው ፃውተይዙ ችግሰድ ሻቘ እምተንዝ ንየ ክንድጝዙ ዚርፊል ችጝዘው ጥቕዝትድ ዊትው አየውም።
2017 ዓ.ስ ክንድጝዙ ዚምኒዝም 4.5 ሚሊዮን ክንደጥ ፃውተይዙ ችግሰዝ ምላሰን ክንድጝዝ ቢዘ አቕጝ ዲቁጝኩⶔ።
2018 ዓ.ስ ክንድጝዙ ዚምኒዝም 7.4 ሚሊዮንዝ ንየ ክንደጥ ሚዝግቨናንስ ኻሊሽት ነንትል አሽ 3 ሚሊዮን ክንደተ ክንድጝ ጝኒዝጎ ተረነውድ ክንድጝ ቢሮይዙ ሚዝረድ ሚሪየኩ።
ክልሊዙ ፃውተይዙ ችግሰይዝ አጋልሽተቁ ወይ ኽምረ ብሔረ እቅ ጭሰጭሰንዙ ጅውንጢስም ጋዝጊቭለ ወረደ ላውድ የጝ።
ጋዝጊቭለ ወረደይል 40 1ትረዝመ ሊጘትረ ተግ ክንድጝ ጝንጥ ችጝሽጘኲ።
እንዛጊስ ንቕፀቁድቅ ክልሊል ፋጥርሸው ፃውተይዙ ችግሰይስ አጋልሸተ አቕጝ ጥው ፍን ይሽታጙ ክንድጝድ ይውሽታጙ ተርኲ።
ፃውተይዙ ችግሰይዝ አጋልሸጢስ ቃውሰተድ አቐው ላልኪው 1ትረዝመ ማኽልኘ ተግ ክንድጝ ጝንድ 2017 ዓ.ስዝ ንቕፀቁ ችግሰንጥ ችበችብርም 628 ክንደጥዝ ክንድጝዙ አግልግለ ይዋጙ ተርኲ።
ክንድጝ ጝንል ችጝሸቁ ክንደጥዝመ ክንሰጥድም ዲቈው አምረይዝ ንቕፀቁ ችግሰንጥ ዲቁስጘጘ ጋልፅጝ።
2018 ዓ.ስ ክንድጝዙ ዚምኒዝም ዲቈው አምረይስ ቺዝ የው አቕንትዝ ክንድጝ ኪርምጘጘ ዊግትጝኩⶔ።
ላልኪው ለወትረዝመ ማኽልኘ ተግ ክንድጝ ጝንዙ ክንደተ ወርቅ ቸኮለ ስመ ክንደተ ዳዊት ከበረ 8ትረ ክፍልዙ ክንደጥ አጘንድ 2018 ክንድጝዙ ስረትድ ዲቈው አምረይስ ቺዝየው አቕንትዝ ቲክንክንጛጙ አቐነውድ ጉይጝ እኔን ቈሽ ተረው ክልል አቅቨ ፈተነዝ ከቨው አቐነውድ ጉይጘኲ።
ክንደተ ወርቅ ቸኮለ ዲቈው 2017 ዓ.ስ ክንድጝ ዚምንድ አስክዝራንድ” አጭነዙ ድመ ወሽናጙ የጝ ክንድናጙ ዊነውድ፤ ላው ግሬ ተርንሽ ላው ግሬ ቈሽ ክንድጚስ እዳናጙ የጝ ዲቁስነውድ”ይርኩች።
ክንደተ ዳዊት ጝጋብዝ ጅውነይዙ ክንደጥ ክንድጝዝ ይጝ ንቕፀቁ ችግሰንጥ ችበችብርጝ ዲቁጘጘድ ጉይ 2018 ዓ.ስ ክንድጝዙ ዚምንድ ኪርምሸት ዲግድ ቺዝየው አቐነውድ ዊግትኲ።
ዊርተ ፃየው ክንድጝዝ ጅውነይዙ ዲግድ አጉረው አቐነውድ ጉየቁድ ክንደጥድ ፃውተይዙ ችግሰይዝም አነ አቅልዙ አቅምዙ እጅጝትዝ ክንደጥ እግርታይጘጘ ሚሪሸው አካልድቅ ቲኩርት ይዋንስም ዋቕርጝኩⶔ።
ላልኪው ለወትረዝመ ማኽልኘ ተግ ክንድጝኒል ክንሰተ ጎዳዳ ለጋስ 2018 ክንድጝዙ ዚምን ቃውስ ኪርምሸነውድ ክንደጥዝ ቺዝየው አርቕትዝመ ክንድጝ ይወናንስ ቀሰው ምርፀ አቐነው ጉይጝ
መፅሐፍዙ እጅጝት ጽበነዊዝ ግነ ሽውትጝ ክንስጛጙ አቐነውድ ጋልፅጝኩⶔ።
ቺዝየውዝመ ዊርተ ፃየው ክንድጝ ይወናንስ እቻቐው መፅሀፍ ደብተርዙ ከቨ አልሰነውዝ ክንደጥ ቲክንክንጥጘ ፃቨነው ጥውሸኲ ይጝኩጙ።
2018 ክንድጝዙ ዚምኒዝ ክንድጝ ጝኒል ሚዝግቭሸቁ 623 ክንደጢስ 537 ክንደጥ ጝታ ክንድጝ ቲክንክንጛጙ አቐነውድም ክንድጝኒዙ አውር ክንሰተ ደሳለኝ ዝናቤ አርቒስጝኩⶔ።
ጅውነይዙ እቀኽቭርድም ጝታቑር ክንድጚስ ቢዘ አቓይጘጘ ፃይጝ ፅበው ተምዝትድ አጉረው አቐነዊዝ አውም ጒሰጒሲጝቀት እን አምረይዝ ክንደጥ ጝታ ክንድጝድ ኪርምጘጘድም ሚሪጝኩⶔ።
አቕሽም “እቀኽቭሪዙ አቅምዙ እጅጝትዝ ጝተ ደብተርዝመ ክንድጝዙ ጥውር እቻይስጝ ጥወቁ ክንደጥድ ዊትቁድ ጛይ” የቁድ አውር ክንሰተድ ሚሪሸው አካልድ ክንድጝዙ ጥወር አልሰነዊል ትኩርት ፃቭጠ ጥውሸው አቐነውድ ሚሪጝኩⶔ።
ወረደይዝጘ 40 ክንድጝ ጝንጢል 21 ሽኽዝ 154 ክንደጥ ሚዝግቭሸቁ ክንደጢስ 12 ሽኽ 888 ክንድጝ ኪርምጝኩⶔ።
ጋዝጊቭለ ወረደ ክንድጝ ጽ/ጝንዙ ዲቈተ አት አዳነ ሙሉ ክንደጥዝ ዊርተ ፃየው ክንድጝ ይወናንስ ምዝገቨይስ ኪርም ኰሪዝ ሚዝግቨነውዝ ክንድጝዝጎ ጥውሽተነውድ ጋልፅጝኩⶔ።
ክንድጝዙ መፅሐፈን ኰሪዝ ችጝዘነውዝ ክንደጥ ኰሪዝ ክንድጝ ኪርምጛንስ ፃቭሽተው ፍልውልወ ፅበነውድ አት አዳነ ሚሪጝ” ክንድጝዙ ዚምንዝ ፈኑ አቐው ክንደነ ክንሰነዙ ፃጝት ፋጥርሻንስም እጝቅ ጝችጝርድ ፈነው ጥውሸኩ” የጝ ይጘውድ።
አቅምዙ ችግሰዝ ምላሰን ክንደጥ እግርታይጘጘ ሚሪሸው አካልድቅ ደብተርዙ ከቨድ አትርዝ ቃፅላንስ ጭጝን አልስጝኩⶔ።
ወይ ኽምረ ብሔረ እቅ ጭሰጭሰን ክንድጝ ቃወነይዙ ዲቈተ አት ሰይፉ ሞገስ ጝተ ጋብዝ ብሔረ እቅ ጭሰጭሰኒዝጘ ብልቓጘዙ መፅሐፊስ ቢዘ ላጥ መፅሐፍዙ አይንተን እጝቂዝቅ ችጘው አቕንትዝ ትንዝሽተነውድ ሚሪይጝኩጙ።
መፅሐፍድ ጝተ ናኒል ፃይጝ ጎየቁ ክንድጝዙ ችብረንጥ ፅብጝሽም ቃዝየውዝ ክንደጢዝጎ ትንዝሰነው ጥውሸው አቐነውድም ኻስቭዝጝኩⶔ።
እኒስ ከስጘም ጭሰጭሰኒዝጘድ ደብተር ክንደጥዙ ኻለይ አቓየጘድ ሰራሽታጙ ፅበው ሰቭ ፅብሽም አውማው ወረደይዙ ክንድጝ ጽ/ጝንድ ወረደይዙ እቀኽቭሪዝመ ከቨጥ ድርጅተኒጅቅ አቭርደነውዝ ክንደጢዙ ዋቕረድ እክሰነው ጝ ዲቁትነይ አቐነውድ ልብተነው ጥውሸኩ ይጝኩⶔ።
ክንደጥ ክንድጚስ ቢዘ ፃቨነው ተረዊዝ ኻግር ለምረተ ኹርድ ድሰነው የጝ።
ጝተ ዳኽንነይድ ኻይሽተው ክንድጝ ጝኒል ክንድጛንስ ዲግዝ እሩድረይ ኻግርት ኲነነው ተሚሰኲ። እጝቅም ዲግዝ ማጥን ጝችጘርድ ፈነውዝ ክንደጥ ዊርተ ፃየው ክንድጝዝ ኻግሪዙ ቲክርክርሸጥ አጛንስ ይና እጝቅም ልቕርድነ ጥውሸኲ
ሳምራዊት ግርማይ
ሚስኲሩም 15/2018