ትኽነ ድርጅት ፊሰዉ ሚዝረይዝጘ እጅር ኹርዝ ኽየዉ ኻደገ ነሠቁ ጽዉዝጢስ ላዉድ መቈዙ ጽዉዘ አቐጘ ደድሰኩ።አዉሮፕቁዙ እግዝግዘይዝጘ 2003 ዓ.ስዝ ጻቨዉ ጽንኸይዝ 2.2 ቢሊየን እቅ እን ጽዉዘይስዝ ጻይሸነዉዝ 12.7ሚሊዮን አልምቱ እቀ ኽቭርዙ አድለን ክርጘጘ አርቒስኩ።2024ዝ ፈዉ ሪፖርቲዝም 44 ኻግረን መቈዙ ጽዉዘይስ ናጸ አቐነዉ ቸልጘጘ አርቒሰነዉ ቸልኩ።
ጽዉዘይስ ናጸ አቐቑ ኻግረኒዙ ዲዝጝትድ ጝታ ትኽነዙ ፖሊሲድ ኽዝቪል ችጝጠ ማጥን ጻቨነዉ ጋቢዝ ኽየዉዝ አርወዉ አቐነዉድ ላዉድ የጝ።
መቈዙ ጽዉዘዝ ንቕጸዉዝ አጋልሽተቁ ኻግራኒስ ናጄሪያ ስመ ዲሞክራቲክ ኮንጎ ዳቕሽትጘኩ።ስሃራስ ሳ ንቅጸቁ እጅርዙ እግዘ ጽይጝ ጽዉዘይዝ አጋልሽተቁ ኻግረኒስ ቆሽ ይነ ኻግር ኢትዮጵየ ዳቕሽተች። ቺተዝም2030ዝ ጽዉዘድ ናጸ ጻቨናንሥ ሰራሽጛጙ ችጝሸቁ ኻግረኒስ ላይሸን ጚ። ቃዉሰ ጽዉዘድ ማኽተነዉ ፖሊሲድ ጽረነዉዝ አርቕሽተች።
120 ሚሊዮን ኽዝቪስ ሰዉጥርጝን ሚሊዮንድ እን ጽዉዘይስዝ ጋልሽተተ አቕጝኩጙ። ኮቪድ 19 ስመ ኻግር ሸንትል አጋልዘቁ ኽምዘጥድ ጽዉዘድ እትልጠ ማጥን ጻቭሰቁ ምላሠንጥ ጛይ።2017 ዓ.ስ ትዝ 200 ንየ አቐቁ ኻግርሸንትቁ ስፍሊል መቈዙ ጽዉዘድ እትልኩ። ኻግር ሸንስ ንቅጸዉዝ እትለቁ ክልለኒስ ላዉድ ብላ ክልል አቓንድ ክልሊዝጘም 2017ዓ.ስ መቈዙ ሺወ ሚልክዝ እትል 2.5 ሚሊየን እቅ ጽዉዘይዝ አጋልሽተነዉድ ትኽነ ቢሮይስ ችጝሸዉ ሚዝረድ ቓሊሰኩ።
ወይ ኽምረ ብሄረ እቅ ጭሰጭሰን ስሃለ ሠየምት ወረደል ክልል አቅቨ መቈዙ ሽወድ ማኽተነ ቃወ ግቭርድ ጻጝሽታጙ ችጝሸኩ።
ኒንቅንድ”አርቭትቁ አትረቁ ናንጣንዝ መቈዙ ሺወድ ማኽጥን”የዉ ቃወይዝ ሰሀለ ሠየምትወረደ መሸኻ ኻትመይል ቺተቺተቁ ተገተገሽትንዝ ፊሰፊስሽተቁ ዉሸቭል ላጥ ኻትመዙ እቀ ኽቭሪዙ አድለንም መቈዙ ትንዝሽትንዝ ሚቸቁ ጛይ ይሽተቁ ስፍልድ ዊርሽጛጙ ችጝሽጘኩ።
ዝምረይል ሲትፍሽጛጙ ችጝሸቁ እቀኽቭር ማኽሊስ ዊ/ር ሙሉ መኮነን ላይሸን ጚ። ኻትመሸንንትል ጽበዉ መቈዙ ትንዝሽትንድ ማኽተናንሥ ቸልሰዉ ሰቭ አክንወነዉዝ ጝር ወንቱ እኩሰድ እኩስራጙ አቐነዉድ ዊግትርኩች።
” መቈዙ ጽዉዘ እትልጠጘ ጻቭሰቁ ምላሠንጢስ ላዉድ አቑልሸዉ አቑ የጝ ይረይሸን ዊ/ር ሙሉ ቅብረንጥድ ቀለዉዝ ዊርሸነዉዝመ አቑርሸዉ አቑድ ዊርሸነዉዝመ አቑርሸዉ አቑድ ቅብሰነዉዝ ትንዝሽትንድ ማኽተነዉ ቸልሸኩ ” ይርኩች።
“ላዉ እጅር ጝጅዉነድ ዊር ሸነዉዝ ኻትመድ ዊር ሸኩ፤ጝትኽነድም ኻየኩ ” የጝይረዉድ።
አቐነዊዝም እንቅም ዉሸቭለድ ጝጅውነይል መቈዙ ትንዝሽተነ ስፍልድ ዊርሻን መቈድ ቀለዉዝ ማኽተነዉ ቸልሸኩ ይርኩች።
ላየ ዊግስነይ ዉሸቭለ የሻለም ታየ ዲቆዉ አምረይዝ አክንዉሸዉ ተከተከዉ ቃወ ግቭሪዝም ሲትፍሸተ ዊንድረጘን ዉንስርኩች።
ኮሪዝም አቑ አቑለቁ ስፍልድ ቅብሰነዉዝ ጅውነ ጨበቅ አርወ ይዋዉ ኻጸማጸድ አይረነዉዝ መቈድ ማኽተናንስ ጝር ጋብቱ እኩሰድ እኩስረጘ ዊግትርኩች።ዲቆዉ አምረይዝ ሰራሽተዉ ሰቪዝም ፈን ችጝሸነዊዝ ንጭም ሲትፍሽራጙ አቐጘ የጝ ዊግትረዉድ።”ዉሸቭል ቺተቺተዉ ተገተግሽትኒል አቐነዉዝ መቈዙ ትነረ ፍርዘነ ስፍልድ ይሰነዉ ሰባንድ አክንዉንጠ ጡዉሸኩ “ይርኩች።
ስሀለሠየምት ወረደ ትኽነ ኻይን ጽ/ጝንዝ መቖዙ ትንዝሽትንዝመ ማኽትን ኦፊሰር ዊዝር ፍቅርተ አሰፋ መቈድ ማኽተነ መለይስ ላዉድ ጅዉነይዙ እግዝግዝን ስረት አቐነዉድ ዊግትጝኩጙ።
ጫረዙ ተርንድ ቲክንም ታኽሰስ አሰነይል አጢስ መቈ አጉረዉ ተግዝ ትንዝሽተች የቁድ ዲቆተሸን ኽክምነይስ ከስጘ አቑረዉ አቑድ ቅብሰነዉዝመ ይሰነዉዝ መቈድ ማኽተነዉ በንዘዉ የጝ ይጝኩጙ።
ወረደይዝጘ መቈዙ ትንዝሽትንድ እቑመ ትዊስ እግዘድ ቓልሽታንድ ምርመረ ጻቭሽተቁ 4 ሺኽዝ 939 እቂስ1ሺኽዝ 372 አጥጘ እቅ ጽዉዘይዝ አጋልሸተጥ አቐነዉ ቸልጝኩጙ ይረይ ሙየ ጉሬሸን ንጭቱ አምረይዝ መቈድ ማኽተናንስ አቐዉ ዉርም አይንት ጥላ አልተነዉ ቸልየዉ አቐነዉድም ጋልጽጝኩጙ።
ወይ ኽምረ ብሔረ እቅ ጭሰጭሰን ትኽነ ቃወነይዙ መቈዝመ ላጥ እኹረጥ ጽዉዘንጥዙ ማኽተነዝመ እግዝግዘነ ኦፊሰር አቐቁድ አት አበበ በለጠ መቈዙ ሽወይዝ ዞኒዝ 8 ሺኽ 970 አጥጘ እቅ ጽዉዘይዝ አጋልሽተነዉድ አስክዝጝኩጙ። “አርቭትቁ አትረቁ ናንጣን መቈዙ ትንዝሽትንድ ማኽትጘኩ” የዉ ቃወ ኻለይዝ ሊቨሊቭንዝ ማኽተነዉዙ ሰቭድ ሰራሽተነዊዝ ሺወድ እግልሰነዉ ቸልሸዉ አቐነዉድ ዊግትጝኩጙ።
”ዞኒዝጘ ጻቭሽተዉ ኬሚካልዙ ትንዝሽትንድ ንጭቱ አምረይዝ አቨርገሌትል 14 ቀቨሊጥል ትኒትኩ። አቨርገሌስ ቢዘ ዉርም አይንት ጥላዙ ትንዝሽትን ፊቅድሽየዉም አቐነዊዝ እጅርዙ ኻይልዝ ጅዉነይዙ እግዝግዘ ሰራሸነዉዝ ጽዉዘድ ማኽተናንሥ ሰራሽታጙ ችጝሸኩ” ይጝኩጙ።
መቈዙ ትንዝሽትንድ ዲቈዉ አምረይጅቅ ቲክርክርሻንድ ነኳን አጢስ እግዘድ ቆሽየዉ አቕሽም ሚስኩርም ጥወት ኪርም ሸወጭ ሸወጭዝ ጝእግዘድ ቆሻጙ ተርኩ የቁድ አት አበበ”መቈዙ ሺወድ ቃጽቨቁ ናንጣን ዝላቓቁም”የዉ ቃወ ኻሰቭዝ እንቅ ዞኒል ችጝሸቁ ጅወንጢል ሰራሽታጙ አቓንድ ስሃለ ሰየምት ወረደይልም ሰቭድ አትርንዝ አክንዉሻጙ ችጝሸኩ ።
“አቨርገሌ ትጘ ጥላዙ አልስን ጻቨነዉ ቸልሽየዉ ምላሰንድ ዲቖዉ አምረይዝ ይዉሽታንስቅ አቃንስቅ አይነተዝም ሙስየ 3እምቲስ ኪርም6 እምት አጢስ አግልግለዉ አቓንስቅ አርወ አሩሽንድ ጡዉሸዉ አቐንትዝ አሩሸነዉዝ ጽዉዘይስ ጝታወንት ኻይጥጘ ጡዉሸኩ” ይጛንድ ዊግትኩጙ።
አመልማል ተድላ
ሚስኲሩም 30/2018
