አቲነ ሚንፍስ አይርሰው ንቕፀው እጅርዙ አቒድ አርቐው የጝ ተከውድ።
ላውድ አስክዘዝ፣ላውድ በንትዝ ፊሰነውዝ ኒቭስሸን አካሊስ ሊቅር ፊትረይ ተክጥዊል አሽ እስክዘዝ ፊሰኲ።
አቲነ ዋስን ወይቱ ምቕዝመ ውሸብሊዝ ፍራትዝ ዋርሻንድ ቓልሽተው የጝ።
አቲነዙ ዋርደ ጝ ሽⶔዝጘ አቲነስ ሰራሽተው ሙዚቀዙ መሰሪ አቓንድ ሻቘዝመ አኰ ባቑነ ፊሰነውዝ ተሚተው ድመዝመ ዜመ ፊስን ዋርደነውዙ ባኽሉ መሰሪ የጝ።
ምቕ ጝተ ምቓነይዝ ዝላቓይጘጘ፣ ሲዝውራይጘጘ፣ ሲለታይጘጘ ጝተ ወይሰድ ድምሰናንስ አቲነ ዋሰነውዝ ጝታ ቕመት ዘናስጘኲ።
ምቕ ፅብጘው ጅውነይልቅ አቲነዙ ድመድ እጝጎዝመ እጝጎዝ ወይሽታንድ በረኸይዙ አብድ ቀርዝ ፊስጝ ድምሰቁ ተክጘኩ፣ ጋዝመ ጋዝ ምቸ ብዝጝ ዊሰ ዊስሽተቁም ተክጘኲ።
ይነ አቅልድ ኩኑ በረኸይል አቲነ ዋሳይነውም ይጝ ድቑጘው ሲነ ሲነድም እንዝ ተከኩ።
ምላሰንድም አቲነ እጅር ኹሪስ ዲቁ እንሰስዙ ጊዝውድም ባርባርሸነዙ ኻይል ፃየው አቓንስቅ የጝ።
በጅወ አቲነ ወሸውዜ ጭቅተ አቲነዙ ድመይዝጎ ተረኩ፣ ተር በር ግነ ጅመድ ድምሰኩ ጚ እጅር ኹጠ ተምዛውም ይሽተኩ።
ምቕድ ምቓነይስ ከስጘም ጝተ አቅልዝመ ጝነቁድ ዘናስጘንድ ቓለነው ወይትል ዲዝጝሸው የጝ።
አቲነዙ ዋሰተይስ ከስጘ ድምሰተይዝም ጊዙ ጊዙ ዀው አስክዘዝ እግርገትጎ ዊሰው፣ ቀንድረቁ እቅድ በንተጘ ፃቨው፣ አቒል ፅበው ኽዝንድ ሊን ፊስ እምጥጘይዝጎ ከሰው አይር ሚንፍስ ነየው የጝ።
በረኸዙ እንሰስድ እዳቒጝቀት ጝተጊዝዊስ ዋርደድ ማርፅጘውድ አቲነዙ ዋርደ ውርቑጠ እዘንል ጥወው፣ አይር ሚንፍስ ነየው አቐነውድ የጝ አጀነው ቸልሸውድ።
ንቕፀቁድ ወይሰይስ ጎው እርⶓድ ጝተ ጋፂስ ጊማንድ እኰ ልብተነ ብጝጥዊል አሽ አቲነዙ ድመይጅቅ ላብጠ ቲክንጝ ኪንፍጘኲ።
ነንቱ ሰቲዝ ቈሽ አቲነ ዋርደ ክቕመትም አቑ ጝነቁ ዘናሰነዊስ ከስጘ ውሸብል ዋርደድ ሊጊሰነውዝ ጝተ ሚድ ጅሰነም ፃቭጝኩጙ።
ውሸብለ መኳንንት ንጉስ ወይ ኽምረ ብሔረ እቅ ጭሰጭሰን ሳቁጠ ወረደይል እኹርሸው አቓንድ ላጥ ወይትቑሪዝጘድቅ ቅም ፍጭር ኻይ ሊግዘው የጝ።
ምቕነይዝም ላጥ ጝ ፃምጢዝጘ አቲነ ዋርደድ ዲዝጝዝጘነውዝ ቺተቺተቁ ወይቱ ጅውነይዙ ጅምድ ላውጥውጣጙ አቲነዝ ዋሰነው ኪርሙ።
ውሸብለድ ላጥ ጅውነይዙ ውሸብሊስ ቺትየውድ አቲነድ ጝንዝመ ምቕነይል ጭቑ ዋሰነዊስ ፍ ወይቱ እቀኽቭሪዙ ክፍለንድ ጋልፀቁ ዜመዝመ ጅምድ ዋርደነውዝ ጅውነይዝ ጅውነ አርቐ አርቒሰነውድ የጝ።
ውሸብለ መኳንንት ጝምቕነይስ ፍ ኻትመይዝጎ ጥዋንድ ጝቕመትም አቑ ላጢዝ ዘናስረይ አቲነዙ ቃነየትም ፃይ የጝ ጥወውድ።
አቲነዙ ዋርደድ ጝ አቅሊስ ችጘው ዲዝጝትዝ ጚ አውም ሳልጥንዛንስቅ አየውም እንጎ ውላቐውድ።
ኰሪጅቅ ፃየፃይሰነውዝም ኻግሪዝጘድ ቲክርክርሸተ አቐናንስም ውቅር መስቀለ ክርስቶስ ባኽልዙ ጓነይል ጥው ዲዝጝዝጘነው ኪርሙ።
እንዝም አቲነየን ተምዘው ቅኝተንድቅ ዋርዝራንስ ዲዝጝትዙ ልውጥውጠ ተሚሰው አቐነውድ ልብት ቆቦ መረዋ ባኽል ጓነይል ጥው ሰራሸነውድ ቃፅሉ።
ነንቱ ሰቲዝም ጝቸልትድ ሊጊሰነውዝ ወይትቁ ቺተቺተቁ ቅኝተንዝ ወይቱ ባኽልዝመ ዜመንዝ ሊጊሰናንስ ትኩርት ፃቨነውዝ አቲነዙ ዋርደድ አትርዝኲ።
ወይቱ ባኽልድ ቓሊሰነዊስ ከስጘ ላዊስ ላዊዝጎ ፍልውልው ጝ ኢኮኖሚዙ አርውሸነም ፃቭኲ።
ውሸብለ መኳንንት ንጉስ አንቺ ሆየ፣ ትዝታ፣ ባቲ፣ አምባሰል የነቁ ሲዘ ቅኝተንዝም ወይቱ ጅመዙ አይንተንድ ሊግዝጝጠ ፃቨነው ጋብዝም ላጝጠ(7) እምት ቑጠ አጉረው እኩሰ እኩሳⶔ ችጝሸኲ።
ወይትል ንቕፀቁ አቲነ ዋሰቁ እፈር ፅብጝሽም ኽይጛጙ ፊርጘው ጨቨቅ በረነውዙ ዲዝጝትድ አቲነዙ ባኽሉ ዋርደድ ድዝጠጘ ምላሰን አቓጙ የጝ።
ውሸብለድ አቲነ ላጥ ባኽሉ ሙዚቀዙ መሰሪጢስ ቺዝየው አቕንትዝ ባኽልድ አርቒሰናንስ እጅርዙ ወይሰድ ፃየነው ቸለው አቐነውድ ዊግትኩ።
“ጅመዙ አርየይዝም ቓልናንድ ዚምኑ መሰሪስ ንየ አቲነ እቀጘዝ ተሚታጙ ተረነዊዝ ውሸብሊዙ ሰቭዙ አገነ ፋጥረው አቐነውድም እቀኽቭርድ ልብተነው ጥውሸኩ” የውኲ።
አቲነ ወይቱ ባኽሉዝመ እሴተንድ ሊጊሰነዊስ ከስጘ ሰቭዙ አገነ አቐነውድም ውሸብለ መኳንንት ንጉስቲስ ዲዝጝት ፊሰነው ቸልሸኲ።
ወይትጘድም እን ባኽሉ ፃጀድ ሊጊሰናንስ እጝቅ ወረጢል ባኽል ጓነ ችበችብስጝ ሰራሽጛጙ አቐነውድ ባኽልዝመ ቱሪዝም ቃወነይል ባኽልዙ እሴተንዝመ ኢንዱስትሪ እፍርትዙ ጓነ ቃወተ አት ጣምተው ገላስ ዊግትጝኩⶔ።
እኒስ በውግ ባኽል ጓነዝ ዲዝጝዝጝጝ ነን ክልሊል የውም ኻግርሸንቱ ጅውንጢል ወይቱ አቲነዙ ዋርደድ አርቐ አርቒሰነውዝ ላጢዝ ተከ አቐቁ ውሸብል ችጝዘነው ቸልሸጘድም ሚሪጝኩⶔ።
አት ጣምተው አቲነ ነንቱ ሰቲዝ እቀጘዝ ተሚሳጙ ተረነዊዝ እጝቅ ጅሚል ጥዋጙ ችጝሸኩ” ይጝኩⶔ።
እኔንት ፈራዝን ባኽልድ ሊጊሰነውዝመ ዚርፊዝ ውላቐቁ ውሽብልድ አርውሸጥ ፃቨናንስም ላጝጠ(7) ባኽል ጓንጥ ችበችብሰነውዝ ዲዝጝዝጝሻጙ አቐጘድም አርቒስጝኩⶔ።
እቀኽቭርድም አቲነዙ ዋርደ ላው ሰቭዙ አገነ አቐነውድ ልብትጝ ቸልት ፃየቁ ጝተቑርድ ባኽል ጓነይዝጎ በርስጛንስ አርቕት ፋጥርንዙ ሰቭ ሰራሽታጙ አቐነውድም ጋልፅጝኩⶔ።
እን ሙየዝ ፅንኸ ፃቨቁ ሙየጒይጥዙ እጅጝት ፅበነዊዝ ጝዝ ልክ ባኽሉ ዋርደድ ሊጊሰነው ቸልሽየውም።
አቓንስቅም ዲዝጝትዝ ሊግዝጛጙ ተረቁ ቺተቺተቁ ጅውንጢል ፅበው አቲነ ዋርደቁ ወይትቑርድ ዲዝጝትዙ ልውጥውጠ ፅበው ኹሪዝ ይውጘንስ ምቸምችዝጘጙ አቐነውድ ሚሪጝኩⶔ።
አቲነዙ ዋርደ ባኽል ጭቑ አቒጝቀት ሩሔም የጝ። ጣቂል ጎይር እክል ኻግር ችጝዝ ዋጥርዘው፣ ጒሰጒሰው፣ አትርዘነው፣ ሰቭዙ አገነ ፋጥረው፣ ጅውነድ ሊጊስጠ ቸለው ፃጀ አቓንስቅ ቀለውዝ ቓልነ ጥውሻውም።
እን ሰቭዝ ውላቐቁድ አትርዘነውዝም ጅውነድ ጭጝሰው ኹር ፋጥረነው ጥውሸኲ።
ሳምራዊት ግርማይ
15/02/2018
