ሚንወይስ ችጝነው አርወድ ነንም ኽይሰነው  ጡሸኲ!

ይና ኻግር ኢትዮጵየ አጉረቍ አብቅዙ ጒርየ፤ ጫረ እየድ ይዛቍ ብጭቕ ዋርብዙ ወነም ጚ። አነጚ አብቅድ ‘አገሬ ኢትዮጵያ ጋራሽ  ሸንተሩ ቡቃያሽ ማመሩ ‘የዉ ጅመይስ ዲቍ ቱሪዝምዙ አርወል ግሪሰነው ቸልሽየውም። ጫረ እየ ቅብረቍ ዋርብድም ላይ አትክልትት ቲክለነዊስ ሽጙ፣ ጉረይስ ዲቁ ጊዙ እፍሰው ሰቭ ዚምናንዝ ሠራሸነው ቸልሽየውም።

ኢትዮጵየትል 6 ነቍጠ 8 ሚሊዮን ሄክታር  ሚንወዝ እፍርደው ዝቨ እኲ። አነጚ እቍመ አሽ እኔን ፈራቐው አገነይስ አሩሸነው ቸልሸውድ 1 ነቍጠ 3 ሚሊዮን ሄክታር ዝቨድ ጭቍ የጝ።

ኻዝንሰው ገቨድ እኒስም 70 ናን አቐውድ ባኽሉ ተግዝ እፍርደው የጝ። እኔን የነት ባኽሉ ተግዝ ሚንወ ሠራሸነው ግርቭ አብዘኲ፤ ማሽንዝ ሠራሸነው አየው አቓንስቅ ጥቅለ  40 ኪርም 50 ናን አቑዙ ችጝሽትንድ ቃጽቨኲ፤ ሳልጥ ችጘው አየው አቓንስቅ ጊዝ አብዘኲ፤ ዚምኑ ተግዝ ጊቭርሽተዊስ 73 ናን ቺተን ጻይኲ። ጊቭርትሸው ገቨድም ዊርተ ጻየው አቐነው ተግዝ ጝወንቱ ቢተ ጻየው አቓንስቅ አርወይስ ሽጙ በክነውድ ንቕጸኲ። አነጚ ልኲ ቓርን ከረነው ዚምኒስ ነንቱ ኪርምንድ ቀሰው ጎነ የጝ።

ጣቅ እምታኒዝ እንጎ ይና ኻግር ኢትዮጵየም አነ ወይ ኽምረትጘ ሚንወዝ ይውሽተው ትኲርትድ ባኽሉ ሠራሽኒስ ፈናንስ አርወድ ዊትረው ተከኲ። ዊርተዝመ ጊቭርት ይውንዝ ቺዘቺዝሽተቍ ዚረ አሩሸነው፤ ሚንወዙ ዝቨዝ ብጥዙ ጊቭርዘነ አሩሸነው፣ ጀነሬተረን አርጪዝ አልሰነው፤ ኽዝቪዙ አርየዙ በንድ ኽየነው ዚምንዙ ጻጝቲዝ ሠራሽንድ ልውጠ ነሳንስ ግድ የውኲ።

አነ ጚ ነን አሽ ኢትዮጵየትልም አነ ወይ ኽምረትል ጻይነቍ አቑ ጻየቍ ዋርብድቅ ጥቅልን አሩሸናንስ አርቕት ፋጥርሽየውም። ጽበውድም አቑድ ተነው፣ ጊቭርዘው አገነድ ኽይሰው ተግዝ ሠራሸነው ቸልሽየውም። እቍመቲስ ነን ቺዛጙ ተረው ገቨ ጽብሽም አርወድ ሲርየ ጻቨውዝ ሠራሽን ፈጣሽየው አቐጘ እግዛን ቓሊስጘኲ።

ሚንወይስ ችጝሽተው አርወድ ጨርስን አሩሸናንስ አቅምድ ቺዘው ጽንኸ ጻቨነው ጡሸኲ። ጻጀይዝ ቍጠ ጭቅቱ ሠራሸተ ኻይልዙ ኻሰቭድ ሊጊሰነው ጡሸኲ። ጋብዝ ጋብ አርሽነይ ጽንኸ ማኸላን እጅጝ ጊዝዝ፣ ማርጽሽተቍ፣ ጣምተቍ፣ ጊቭርትነይዝ ንቕጸ ችጚስጥጘ ቸለቍ ዚረ ፊሰነውዝመ አርወል ግሪሰነው ጡሸኲ። አይንትነትነይዝ ቈሽ ነን ጊቭርትሸው 70 ናን ባኽሉ ሚንወ ሠራሽንድ ቈሽ 5 ነቍጠ 5 ሚሊዮን ሄክታር ጊቭርትሽትየው ዝቨድ ትውጽውጸው አሩሽኒዝጎ ላውጠነው ጡሸኲ።

እንዙ ጥቅለ አርወድ ጊቭርትነይ ቈሸኲ፤ ጊቭርዘቍዙ እግዘድም ቈሸነዊስ ላዘ አርየዙ በንድ ዊሰነውዝ ኻግርየቱ ምጽነ ጻጀድ ሊግሰኲ። እኔን ተራንስ አርሽነይዙ ዚርፍድ ጝወንት ሊጊሰነው፤ ዚርፊል ጽበቍ እቅም ዓምር ኻልየው፤ ጻጀይዝመ አርወይዙ በንዝነይድ ሲርየ ጻቨው ሰቭ ሠራሸነው ጡሻንትጘ ልብተነው ጡሸኲ።

እንዝ ሲርየ ነን ሚንወይዝ ችጝኑን ይን ኲረነዊስ ላዘ ሠራሺነውድ 85 ናኒስ ንየ አቓንስቅ ልብትን ሠራሸነው ጡሸኲ። ገነ እሩዚነውድ ኻሊን ሠራሸነው ዓምርስ ዊንም ላዘይስ ሊምደነው አቒንቀ ንጭ ይናይ ኪርምነ የው ኻሰቭ ግርቭድ ፍጠ ጡሸኲ።

ግርማ ተጫነ

ጥቅምት 30/2018