ዲግ አውማው ገቨይዝቅ ሲሪየ የጝ።
እጅርኹር ኾነው ዝየነውዝመ አየር በንዘዊዝጘን ዲግም አውማው ፍጥሪዝቅ ሩሄዝ ጭን ግሬናንስ በንዘው አውግረው ገቨ የጝ። ዲግ እጀው ብጣይል ሩሄ ጻየቊ አውማው ገባንድቅ በንሽተው ጽብንዙ ተጊል ጽበነው ቸላቊም።
ዲግ ጽባንድ አራሳውም ብሽታንድም ቀለውዝ ችጘናንስ ጽገወኩ። ፍጥር ንቕጸቊ ገባንዝ ጝር ዲግድ ብተ ቸልደይ አርሽም ፍጥርት ዲግ ቢሰነውዝ እጅር ኹርዙ ችጘርድ አውግረው አቐነውድ የጝ ድቚሽተውድ።
እጅር ኹር ጝወንቱ በንትድ እቻዘናንስ ፍጥርት ጝር ዲግድ ቢሰኩ። እኔን አቐነዊዝም ንቕጸው ኽዝቭዙ ዲግድ ኻይሰነንስ ምጝግስተን ጽይጘው ችጘርድ አውግረው የጝ። ይንም ንጭቱ ጽፈሽዝ ጝታ ጅውነይዙ ዲግድ ኻይሰናንስ ጻግቭጂ ወረደይል ሰራሽታጙ ችጝሸው ፍልውልወድ አንቭቭስነ ቀኑን።
ነንትል ይነ ኻግር ኢትዮጵየትል ጽበው ጛስ ጛይቱ ኽምዘድም እቀ ኽቭርድ ችግሰል ማላጙ ኻግሩ ሊግዝትዝም ጽጋ አቓጙ የጝ ችጝሸውድ። አቓንስቅም እን ኽምዘድ ችብርጠ ማጥን ኽምዘድ በውዝ በው አቕጝ ቃወቁ እቅድ ጝታቕም አርቕጝ ዋጥርጛን እኔን አቐነው ቸልሽይሽ ምጝግስት በንዘው ተግረድቅ ፊስ ኽግዙ ንየትነይድ ኪብርዝ ኻግሪዙ ዲግድም ኻይስጠ ጥውሸኩ ይጘኩ፡፡
ወይ ኽምረ ብሄረ እቅ ጭሰጭሰን ጻግቭጂ ወረደ ጻተ ኻትመዙ ጽበተ አት መሰለ ገብሩ”ይን በንነውድ ይና ዊግናኒጅቅ በንነጘ ዲምቀ ዲምቅሽን ጽበናንስ ዲግ በንነኩ ምጝግስት ይና ኻግርት ዲግ ጻቨነው ጡውሸኩ። ዲግ በናው አካሊስ ቆሽ ተግረ ፊሰነውዝ ኽዝቭድ ነን ጽበው ተሩ ተሩ ይሽተው ጭንቅቲስ ፊስጠ ጡውሸኩ” ይጝኩጙ።
እፍርት ኽምዘዝ ተራውም ኽምዘ እፍርትዙ ድሰነ ጎነ ምላሰንም የጝ ምጝግስት ሩዝየቊ ገባንድቅ ኽምዘ ፋጥረነውዝ እቻዘነው ቸልሻውም እፍርዲነቅም የነውዝም ኽምዘ ፋጥረው በንሽተው አቓን ወይቲስ ቢዘ እፍርድየዉ ጅውነ እጀውም።አቕም ግነ እጀው ገቨድ እቻቓንስ ዲጉ ጉጉዝ ዋቅረነዉ ጚ ኽምዘ ፋጥረነው በንዛው አቐነውድጉየቊድ ጽበተድ”ነን ጽበው ኽምዘድ ወይት ቈሽ ጥቅለ ኢትዮጵየት እፍርቲስ እግርገ ዳዛጙ አቓንስቅ ከምሸቊ ኻይለንድ ጝታ አጭነድ ማልጝ ጝታ ዋቕረድ ዲግዝ ዋቕረነው በንዘኩ” ይጛንድ ኻስቭዝጘኩ።
ላየ ቓለ ነየተድ ውሸብለ ተስፋየ ደባሽ እጅጉ ይሽተው አቓንድ ጝፅብንድም ጻተ ኻትመይል የጝ። ነን ድቍሽታጙ ፅበው ሲጘድ እማንቱ ብሄሩ ሲጘ አቒጝቀት ጛልቍ እቅ ጝታ ብሄርዙ ፖለቲከ በንድ ሩዘናንስ ፋጥርጘው ቀርሸው ሲጘ አቐነውድ ጋልፅጝ “እኔን ቀርሸው ሲጘ ሲጝዝንድ ነንትውድ ጭቑ አቒጝቀ እገረ ኹርድቅ ጨቀው የጝ” የነውዝ ጝታ ጎውትድ እቑርጝኩጙ።
ውሸብለድ ፃየፃይሰነውዝም ” አምርስ ነን ዲቍትነይ ፊስነ ጡሸኩ” የው አቓንድ ንጭቱ በንድ እጅጝዝ እሩዘናንስ ይሽት ዊነውድ ዊንየዊዝ ቲኪን ዊግተነው ፈንድ ኻደገ አቐነውድ ዘስክረነው ጡሻውም የነውዝ ኻስቭዝጝኩጙ።
ጅውነይል ዲግ ዊንጠ ይሽት ጉይሽተቊ መድረኻኒልቅ እቀ ኽቭርድ ጉየውድ ጣይትን እጅርዙ እሩሄልም አነ ጥፍትል ድዘር ችጝዘነውዝ ቈይዘነዊስ ቢዘ ላየ እክሰ እጀው አቐነውድ ድቊሽተው አቐነዊዝ ወረደይዙ ኽዝቭድም”ዲግዙ አርወድ ጡውሸውዝ ልብተው አቐነዊስ ከስጘ ዲግ ተርጠ ማጥን ጝችጘርድ ፈው ኽዝቭ አቓንስቅ ኽዝቢል ጽበውድ ምጝስቲዝ ምጝግስቲል ጽበውድ ኽዝቪል ችጝዘነዊዝም አነ አምነ አምንሽትን ፋጥርሽጠጘ አቕኩ” ይጛንድም ጋልጽጝኩጙ።
ወረደይዙ ኽዝቭድ ጻውተዙ አካሊጅቅ አቐነዊዝ ኽግዝ ቢዘትቁ ከምሸጥድም አጝነ ጛው አየው ጥፍትድ ስጞነዊል ውላቐቁ እቅድ ኽግዝ ዋቕርሽጛንስ ሚዝረ ይወነዊስ ኪርምጝ ቺተቺተዉ ጒደነዝ ከቨ ጻቭጛጙ ችጝሽጘጘ የጝ ዊግትጘውድ።
”ጻለትዙ ፍልውልወዝመ ስጙኒል ቺተቺተው ጒደነዝ ጥወው አቐነውድ አርቕናንድ ኽዝቭድም ይናግስ ከቨ ነያጙ የጝ። ቺተዝም ይና ወረደይል ችጝሸቊ ቀበሊዙ ኽዝቭድ ቺዘው አቕንትዝ ሚዝረ ነየነውዝ ከቨነውዙ ሰራሻጙ የጝ”ይጛንድ ዊግትጝኩጙ።
ዲግ አውማው ትኽኑ ገቨይዝቅ ሲሪየ የጝ የቊድ ቈሽ ጻግቭዲ ወረደ ጻውተዝመ ዳኽንነይ ጽ/ጝኒዙ ዲቈተ አት ሕሉፍ ሰለሞን እን እጅር ኹርዝ ሲርዩ አቐው ገቨድ ድርቑታንስ ጻቨቊ ኻይለንድ ንቕጸዉዝ ቓልሽትጛንድ ጝታ በንትድ ኻሠቭዙ ንየትነይዝ ኪብርዘነዉ ቸልየቊ እቅድ ቀለውዝ ምጝግስትዙ ኻይልዝ ማልጝ ስልጣን ፅይንቅ ዊንም ይና እልቱ በንትድ ኽምዘዝ እሩዝንቅ የቊ ዲግነይዙ ወይሰ እጀቊ ኻይለንዝ ፋጥርሸው የጝ የቊ አጛንድ”ነንቱ ሰቲዝ ጅውነይል እትላጙ ጽበው ጻውተዙ ችግሰድ ክልሊል ችጝሸቊ ጅውንጢስ አንጻሩ ዳግ ጽባንስቅ ወረደይዙ ኽዝቭድ ነን ጽብነው አድለ ዚምኒዝ ጛስ ጛስቱ ጣይትኒስ ኻሚተነዉ በናውም” ይጛንድም ዊግትጝኩጙ።
ወረደይዙ ኽዝቪዝመ ዉሸቭሊዝ ጻዉተዙ ጽረይስ ጻቭጘዉ ከቨድ እኒዝጘም ጝታ ጅውነድ ዲግ አቓንስ ጻቭጘዉ ልቕረድ ሚዜንሽተው የጝ። ይነ አቅል ሲጝዝጛንድ “ክት ዳኽነ አተጘ ክግዘድ ዳኽነ አነ ይጘኩ”። እን የነት ክት ክለ ዳኽነ አቐነዉ ቸላር አቐነዊዝመ ዲግ እንቅቱ አቭርትድ በነዉ አቐነዉድ ደድሰነ የጝ” ይጘኩ።
እንዝ ተክዘ አቐዉድ ቈሽ ብሄረ እቅ ጭሰጭሰንድ የጝ። ቺተቺተቁ ኮራኒዝ ችጝሰንጥ እትልጛንድ ወይቱ ኽዝቭድ ዲግ ቀነተ ዲግ ተምዘተ ዲግ ኪቭርዘተ ጝአቐነውድ ታትነቱ ጝአቅሊስ ቐዳሸው አቐነውድ ሚዝርሳጙ ችጝሸኩ።
ይነ ኻግር ኢትዮጵየትል ዲግ ሲፍን በንሽተው እፍርትድቅ ተር ዜገንዝ ሚችረይ አተ ማጥን እንቅም ዲግ ተርጠ ማጥን ሊቨሊቭን ጻቨነዉ በንዘኩ ይነ እጻ የጝ።
አምልማል ተድላ
ኽዳር 15/2018
