ኢትዮጵየ አርሽነይዙ ጊቭርትድ ሊጊሰናንስመ ኻግርሸንቱ ኹረዙ ወይትነይድ ደድሰናንስ ሚንወዙ ዚርፊል ቲኩርት ጻቭር ሰራሽራጙ ችጝሸች።ብላ ክልሊል 260 ሽኽ ሄክታር ዝቨ ሚንወዝ እፍርዘናንስ ኻሊሽት ሰቭ ኪርምሸነውድ አርሽነይ ቢሮይስ ችጝነው ሚዝረድ ቓሊሰኩ።
ክልሊል ችጝሸው አቑዙ ፃጀድ አሩሸነውዝ ኹረዙ ወይትነይድ ደድሰናንስ ሰራሽታጙ አቓንድ ፃይሸው እየዙ ኮሪዝ 872 ሽኽ ጒዝጝ ጨጥ ሲትፍዘነውዝ 260 ሽኽ ሄክታር ዝቨ እፍርዘናንስ ኻሊሽኩ።
ሚንወዙ ሰቭድ ስወዙ እጅጝት ጻየቊ ወይትጘ አቐቊ ጅወንጢል ፍራትዝ ሰራሽተኩ። ወይትል ሚንወዙ ሰቭዝ አጉረተ አቅም ጻየቊ ጅወንጢስ አቨርገሌ ወረደድ ላውድ አቓንድ አትክልትዝመ ፍረምረዙ ሰቭ ፍራትዝ ሰራሽታጙ ችጝሸኩ።
ወረደይዙ ጒዝጝ ጨጥድም ሚንወዙ ሰቪዝ ፈኑ አጛጙ አቕሽም ጥወርዙ እጅጝትድ ምጝግስት ጋቢዝ እኪርጠጘዝመ አሬዙ እፅቁፅቈ እቊን ፋጥርሽጠጘ ጡዉሸው አቐጘ ዋርዘ ጒዝጝ ጨጢስ ማኽል ጒዝ ጨተ ኪሮስ ገላዉ ላውድ አጛንድ ጛይም ለወትረ ሚንወዙ ሰቭድ ኻትጝ ሊጘትረ ሚንወዙ ሰቢዝጐ ጥወናንስ አስልሽጛጙ አቓንድ ኪርምሸቁ ፕሮጀክተንድ አስሽትጛንስመ አሬዙ እጽቈ እጽቁፅቈ ፋጥርሽጠ ጡውሸኩ ይጛንድ ዊግትጝኩጙ።
”ያን ለወትረ ሚንወዙ ሰቢዝ ውላቕ ዊነውድ 3.5 ሄክታር ዝቨል የጝ።ነን ሊጘትረይዝ ቈሽ 6 ሄክታር ጒዘናንስ አስልሽኩን ሰቭድ ቀሰው የጝ።ይና ችጝሰድ አቑ የጝ ይና ጅውነይል ጽበዉ አቑድ አምረድቅ ሰራሰዉ አቓንስቅ ምጝግስት አቑድ ይና ቺዝጚል ጥዋንስ ጻቭ ሰራሻን ቀሰዉ ዊኑ ወረደይል ጽበው ኒግርን ጽ /ጝንድ አርየ ተምዝምዝጠ ጡውሸኩ”
”ጒዝ ጨተ ረዳይ ኻገዞ ጝታ ጋቢዝ እፍርዘነዝመ ኻውየተዙ አልስን እጅጝት ጽበጘ ጉይጝ ጊቭርትድ ወየ ፊሳንስ ኮርድ ኻየነው ይናግስ ሰራሽተኩም” ይጝኩጙ። “ምጝግስት ኻውየተዙ ከቨዝመ እፍርዘነዙ ከቨ ጻቫንስ በንነኩን። ጊቭርዝነውድ ቲማቲም፣ ቖበ (ቃርየ)፣ ስውርጠ አቓንድ ችብረተ አትክልት ቲክላይነጘ አቑድ ጥወነው ቸላውም ሰቭድ ሰራሽናንድ ግነ አውን ሰራጫንድ የጝ ፈኑ አጨ ቸለውድ? የው ገበድ አርቕን ሰራሸነው ይናግስ ኻይሽተኩ”ይጝኩጙ።
ወረደይዝጘ 2017/18 ጊቭርትዙ ዚምኒዝ 884.45 ሄክታር አይር ሚንወዙ ዝቨ እፍርዘናስ ኻሊሽተዊዝ ሲሪየ ለወትረ ጅልወይዝ 225 ሄክታር ቺዝጝ ጒትኩ ሙየዙ ከቨዝመ 200 ላዝ ንየ ሞተረን ቲኒተነው ቸልሸነውድ ወረደይዙ አትክልትዝመ ፍረምረ ጓነ ቃወተ አት ክብረት አወጣ ጋልጽጝኩጙ።
ወረደ ተግዝ ሚንወዙ ሰቭዝ ሲትፍዘናስ 5335 ጒዝጝጨጥ ሲትፍዘናንስ ኻሊን ነን ሰቪል ችጝሸቊድ 533 ጒዝጝ ጨጥ ጛይ። 250 ሄክታር ዝቨል ሰቢል ጥውሽትኩ” ነንቱ ሰቲዝ ጒዝ ጨተድ አቑድ ችጝጠ ማጥን ዞኒስ ችጝሸው 200 ሞተራን አድልድለነው ቸልሸው አቓንድ ጥወሪዙ እጅጝትድ ቓጽቨናንስም ሰራሽታጙየጝ” ይጛንድ ጓነ ቃወተድ ጋልጽጝኩጙ።
ሚንወዙ ሰቪዝ ተሚሰው ቃውሰ አስልሽትድ ኻትሽ ሰቭ ኪርምሽኩ።እቀ ኽቭሪዙ ኹረዙ ወይትነይድ ደድሰናንስ ማጽወዙ ጊቭርቲስ ከስጘ አቑዙ ፃጀድ ጥውሸውዝ አሩሸነውዝ እቀ ኽቭሪዙ ኢኮኖሚድ ሊጊሰናንስ ኽየው ትኩርት ይውሽት ሰራሽታጙ ችጝሸኩ፡፡
አርሽነይ ፅፈሽ ጝንድ እጅር ሰራሸተ እፍርዘነድ ሚንወዙ አሩሸጢዝ አልሰነውድ ጋልፀቁድ ሙየ ጉሬድ አርጭድ እጝቅም ሚንወዙ አሩሸጥ ጕዝ ጨጥድ ሚንወዙ ሰቭድ ቃዝየውዝ ሰቭ ኪርመናንስ አቑዙ ካናልድ አስለነውዝመ ፍል ፍልዘነውዙ ሰቭድ ሰራሽጛጙ አቐነውድ ዊግትጝኩጙ፡፡
እጅር ተስር እፍርዘነዝመ አትክልትዝመ ፍረምረዙ ዚረ አልሰነውዝመ እንዝጘም ቀቨቀቭሽተቁ ሚንወዝቁ ካናለንድ ሰራሽጝጥጘ ጻቨነውዙ ሰቭድ ሰራሽታጙ አቐጘም ሙየ ጉሬድ ዊግትጝኩጙ::
አመልማል ተድላ
ኽዳር 15/03/2018
