እጝግርነዙ አትክልት ኲየንጣንዙ ኢኮኖሚዙ አርውሸትነይድ ሊጊሳጙ የጝ።

እጝግርነዙ አትክልት ጊቭርትድ ኲየንጣን ጝተጝነቁድ ማፅንፅንሸው ኹረ ዀሰነዊስ ከስጘ አርየዙ እርጋዝንዝመ ኢኮኖሚዙ ጝተ አርውሸትነይድ ሊጊሳጙ አቐነውድ ዊግትጙ።

ወይ ኽምረ ብሔረ እቅ ጨሰጭሰኒል ንቕፀቁ አቑዙ ፍልፍለንዝመ ዋርብዙ ፃጀጉሪየ አረጘድ አርቕሽተው የጝ። እቀኽቭርድም እን ፃጀድ አልቨ እቓሰነይዝመ ዝየነይዝ ቢዘ ፃጀድ አርውሽ ጝ ፅብንድ ላውጠነው ቸልሸው አቐነውድ ልብቲጝቀት ንቕፀቁ ዚምነንዝ ፅብኩ።

ኻግሪዝጘ ፅቃ እምት እቻቓው ጊዝዝ አርሽነይዝመ ሚንወዙ ሰቭዝ ይውሽተው ትኩርትዝ ግነ ወይትጘድ ፅበው አቑዙ ፃጀድ ኢኮኖሚዙ ፍልፍለ ፃቨነውዙ ዲዝጝትድ አትራጙ ተርኲ።

ቺተዝ ቈሽ ውሸብልዝመ ኲየንጣን ጝተ ግርቭድ ሲቭርቭሪጝቀት ሚንወዙ ሰቭድ ሰራሽጝ ጝተ ፅብንድ ላውጥጛጙ ችጝሽጘኲ።

ወይ ኽምረ ብሔረ እቅ ጭሰጭሰን አርሽነይ ቃወነይዙ ሚዝረድ ቓሊሰዊዝጘድ

ስረተ ኹረዙ ችግሰድ ሩዘናንስ 16 ሽኽዝ 6 ላዝጎ አልተቁ ኲየንጣን እጝግርነዙ አትክልትመ ፍረምረዙ እፍርት እፍርዝጛጙ ችጝሽጘኩ።

‎ጋዝጊብለ ወረደ ዛሮታ 018 ቀበሊዙ ፅበተ ዊዝር ትውረስ ደሴ ጋልፅጘንድ ጝተ እጝግርነይል ድንች፣ ቃሪየ፣ ቲማቲም፣ ኻምረ፣ ሰረውዝመ ፃረው ስውርጠ እንዝጘም ችብረተ አትክልትዝ ቈሽ ቃዚየውዝ ችጘቁ ፓፓየ፣ ማጝጎስመ አቮካዶ እፍርዝጛጙ ችጝሽጘኲ።

‎ዲቈው አምረይዝም ሊጘ ኩንታል ፃረው ስውርጠይስ ጭቑ 28 ሽኽ ንየ ቅየቁድ ዊዝር ትውረስ እጝግርነይል ጊቭርዝጘው አትክልትዝ ጝተቑርድ ማፅንፅንሸው ኹረ ዀሰነዊስ ከስጘ አርየይዝጎ አልስጝ ቈሺተተ ጥወር ችጝጛጙ አቐነውድ ልብስጝኩⶔ።

“ሻቘ እምት አቒዝ ይጝኒል ማፅንፅንሸው ኹረ አስለነዊስ ከስጘ አርየይዝጎ ፊስ ቅየው አትክልትዝ ይጝንዙ ቢተድ ሽፍናጙ ችጝሸኲን። ዲቈቁ እምተኒስም እን አምረይዝ ቺዝየው ጥወር ችጝጭር የርኩን”ይጝኩⶔ።

ላየ እን ቀበሊዙ ፅበተ ዊዝር አረጋሽ አሰፋ ጝተ ጅውነይል ኲንሸው ዚምኑ ሚንወዙ ካናልድ እጝግርነይል ኻምረ፣ ቃሪየ፣ ቲማቲም፣ ቈስጠ፣ ሰላጠ፣ ስውርጠ፣ ግሽ ተከቁ አትክልተን ቲክለናንስ ከቨጘ ጋልፅጝኩⶔ።

ዊዝር አረጋሽ ካናልድ ሰራሽተነዊስ በውግም ጝተ ጅውሪዝ ሲግስየይዝ መውርጝ ዚስጘው እጝግርነይዙ አትክልትዝ ሊጘ ጝተቑርድ ማፅንፅንሸው ኹረ ዀስጛጙ ዊነጘድ ዊግትጝኩⶔ።

ካናልድ ጥወት እጝጎም ብጭቕ አትክልትዙ አይንተንድ ፈራዝጝ እፍርዘነውዝ ቺዘችዝሽተው ዀነዀንዙ ስረትድ አትርዘነዊስ ከስጘ አትክልት ቅይጝ ችጘው ቁርሽድ ጝተ ፅብንድ ላውጣጙ አቐነውድ አርቒስጝኩⶔ።

እጝግርነዙ እፍርት ሰቭዙ ባኽልድ አትርዘነውዝ ኢኮኖሚዙ ችግሰንጥድ እክሰናንስ ቸልሰው ዚርፍ አቓንስቅ ላጥም ሰራሽጛን ፈን ፃየው አቐነውድ ቓልጥጘ ጥውሸኩ” ይጝኩⶔ።

ሲዝውረነዊስ ሰራሸነው ኲርዘው አቐነውድ እጝግርነ አትክልትዙ ሰቪዝ ልብተቁድ ኲየንጣንድ ሰቭድ ፈራዝጝ ሰራሸናንስ ሚሪሸው አካልዝመ ከቨጥ ድርጅተን ቢቁለነው ቸለቁ ቺተቺተቁ አትክልትዙ ዚረ አልስጛንስ ዋቕርጝኩⶔ።

018 ቀበሌ አትክልትዝመ ፍረምረዙ ሙየጉሪየ አት መኮነን ካሳ ጝተ ጋብዝ ቀበሊዝጘ 2018 በጀት አምረ 1ትረ ጅልወ ሚንወዙ ሰቭዝ ሽፍነናንስ ኻሊሸው 18 ሄክታርዝ ንየ ዝቨይስ 6 ሄክታር ዝቨ እጝግርነይዙ አትክልትዙ እፍርት 60 ኲየንጣን እፍርዝጛጙ አቐነውድ ሚሪጝኩⶔ።

አት መኮነን ሙየዙ ከቨ ፃቭሽታጙ አቐነውድ ቈሽ ” አቑ አውን ዚሰነው አቐጘዝመ አወሽን ዚሰነው ጥውሸው አቐነውድ፣ እንዝጘም ዛረ ስብሰነው ጥውሸው አቐነውድ ግሬ ጨቨቅ ማኽርናጙ የጝ” ይጝኩⶔ።

ጋዝጊቭለ ወረደይል ፅበው አቑዙ ፃጀድ ሚንወዙ እፍርትዝ ግሪሰነውዝ ባሕር ዳርስመ ደሴቲስ ተራጙ ዊነው አትክልትዝመ ፍረምረዙ ጊቭርትድ ችብሰነው ቸልሸጘድ ዊግተቁድ ቈሽ አርሽነይ ጽ/ጝኒል አትክልትዝመ ፍረምረዙ ጓነ ቃወተ አት ብርሃን ተፈራ ጛይ።

እቀኽቭርድ ጝጅውነይዙ አትክልትዙ ጊቭርትድ አርውሻንስ ፃቨነውዝም አርየይል ጥውሸው አትክልትዙ ጊቭርት ችጝሻጙ  አቐነውድ ሚሪጝኲⶔ።

እንዝጘም 625 ኲየንጣን እጝግርነዙ አትክልት እፍርቲል ሲትፍዘነውዝ ኮስየነውድ ቓቭዝጝ ጝተ ኹረዙ ስረትድ ቺዘቺዝስጛንስ ትኽነዝመ ክንድጝዙ ችብረንጢጅቅ አቭርድንዝ ሰራሽታጙ አቐነውድ ዊግትጝኩⶔ።

“እን አምረይዝ ላይ አቑዙ ጥርቕ ስቚር ቅብራይም” የቁድ ጓነ ቃወተድ 223 ንየ ኪሎግራም ዊርተ ፃየው ቺተቺተቁ አይንተንዙ ዚረ አልሰናንስ አቭርደቁ አካለኒስ ዋቕርጛጙ አቐነውድ አርቒስጝኩⶔ።

‎ሳምራዊት ግርማይ

ኽደር 15/2018