አካልዙ ቈይሸጥ እጝቅነይዙ ሲትፍሽንዝመ ጝተ አርውሸትነይድ!!

አልሚዙ ኽዝቪዙ እግዘይስ ፅጭ አኰ(15%)ናን ላይስ አካልዙ ቘይሸጥ አጛንድ ይነ ኻግሪዝጘድ ቈሽ ፅጭ ሰውጠ(18%)ናን ላይዝ አቐነውድ አልምቱ ትኽነዙ ድርጅትዝመ አልም ባንክቱ ፅንኸዙ ሚዝረድ ሚሪየኲ።

እንቑጠ እግዘ ፃየው አካል ቘይሸተ እቀኽቭርድ ሲትፍዝየው እፍርትም አነ ቀሰው ጭሰጭሰንዙ ሰቭ ፈን ፃየው የጝ ይሽት ፊሰነው ቸልሻውም።

ኻግሪዝጘም አቑ ወይትጘ እቀኽቭሪዙ ክፍልድ አካል ቘይሸጥዝ ይውሽተው ትኩርትድ ሳስ የው የጝ።

እንዝም ፖለቲኩዝ፣ ገረዱዝመ ኢኮኖሚዝ ጥቒርጝ ፅብጛንስ ፃቭኲ።

ላው ላው ቸለኩንቱ ሚንፍስዝመ አምርቱ ምነነ ፃይጝ ሰቭዝጎ ጥወቁ አካልዙ ቘይሸጥ ግነ ኢኮኖሚዝ ጝታቕመት አትርዝጝ ጝተ ጝነቁድ ከቭሰቁ  እኲⶔ።

ፅጎነ ውድነሽ ገሰሰ ሳቁጠ ኻትመዙ ፅበተ ጚ። አካልዙ ቘጨድ እግርሲጝቀት ጝር ክንድጝድ ኹትርኩች።

አውማው ውሸብለድቅ ትክቭ ጥዋንድ ቓልሽታው ጝሉ ሰቭድ ጝርቕምቱ ጎነጎንዝ ጭቑ 2017 ዓ.ስ እቁንዙ ፅቭቀ ጝን ብዝር ኢኮኖሚዙ ጝር አርውሸትነይድ ደድስረጘ ዊግትርኩች።

ነንቱ ሰቲዝም ግሬዝ 3  ላ እቁብ ማለች፤ አርፈይዝ ቈሽ ሊጘ ሽኽዝ ንየ ጝር አካውንትዝ ተነች። ጝር ጝንዝመ ሰቭዝ ፊስረው ፈኒስ ቢዘ 2 ላ ሽኽዝ ንየ ቁርሸን ተንረጘ አርቒስርኩች።

“አካልዙ ቘይሸጥ ኢኮኖሚዙ አርውሸተ አቐናንስ ቃውሰትነይዝ አካልዙ ቘይሸተ አቐነውድ አምነነው ጥውሸኩ” የቁድ ክንሰተ ሀብቱ ካሕሳይ እኔንም እቀ ኽቭሪል ፅበው ቀርሸው ቓለዝመ አካልዙ ቘጨይዝ ምላሰን ተረቁ ችግሰንጥድ ችበችብርጝ ጝተ ክንድጝድ ክንድጛንስ ከቭሰጘ ዊግትጝኩⶔ።

ጝተ ክንድጝድ ዩኒቨርሲቲ ጥውጝ ሊጘትረ ዲግሪል አሽ ክንደናንስ አካልዙ ቘጨድ ውርም ፅጋ ፋጥርየጘ ጉይጝ እጅርጅቅ ጥወጥውሽተነውዝመ አምርቱ ምነነ እቑረነው አካል ቘይሽጥዝ ኽየው ሊቈ አቐነውድ ጋልፅጝኩⶔ።

እንዝም “አካል ቘይሸጥዝ ምቸው አቕንት ፋጥረነው ቸልሸውዜ ክሰቭዝ አቕር ችጝሸነው ጥውሸኩ” የቁድ ክንሰተ ሀብቱ ቺተቺተቁ ዚርፈኒዝ ውላቕጝ አውማው አካሊዝጘድቅ ጝታ ሰቭድ ቸልትዝ ሰራሸቁ አቐነውድ ዊግትግኩⶔ።

አካልዙ ቘጨ ማኽሊስ ቓለ ነየቁድ ውድነሽስመ ክንሰተ ሀብቱ ወይትጘ አካል ቘይሸጥዝ ይውሽተው ትኩርትድ ሳስየው አቕሽም ንቕፀቁ አካል ቘይሸጥ ሰራሽጝ ፈኑ አቐነው ቸልሸው አቐነውድ ቓሊሰቁ ፅብጘጘድ የጝ ጋልፅጘውድ።

አካል ቘይሸነው አውማው ሰቪስ ጊግቭጠ ቸላው አቐነውድም ጉይጝ አውማው ከቨተ ድርጅትዝም አነ ሚሪሸው አካልድቅ አካል ቘይሸቁ እቀኽቭረን ሰራሽጝ ኢኮኖሚዝ አትርጥጘ ማጥን ጥውሸው ከቨድ ፃቨነው ተሚሰው አቐነውድ የጝ ኻስቭዝጘውድ።

አካልዙ ቘጨ የነት ፍጥሩዝመ እጅር ሰራሸተዝ እቀኽቭሪል ችጘው አካልዙ ኻደገ የጝ።

አካል ቘይሽትነይ ግነ አካልዙ ኻደገዝ አጋልሽተቁ እቅድ ጝተ አካልዙ ቘጨድ አርውሽጝ እቀኽቭሪዙ ክፍልድ ችጝዝጘው ፅጋድ የጝ።

አቓንስቅም አካልዙ ቘጨዝ አጋልሽተው እጅርድ ሰራሸነውዙ ጝቸልትድ ቓለነውዝ ጝቕም ሰራሽ ላውጥሻንስ አገነድ ብዘነው ጥውሸኲ።

“ላው ኻግሪዙ ንየትነይዝ አውማው ዜገድንድቅ እጝቅ እፍርትዙ ዚርፊል ሲትፍዘነው ቸልሻንድ የጝ” የቁድ ሳቁጠ ኻትመ ጭሰጭሰን እቁንዝመ ገረዱ ኻለየን ጽ/ጝንዙ ዲቈተ ዊዝር ምስራቅ ተድላ አካል ቘይሸጥ እቀኽቭርድ ኢኮኖሚዙ አርውሸትነይድ ደድሰናንስ ሰራሽታጙ አቐነውድ ጋልፅጝኩⶔ።

2018 ዓ.ስ በጀት አምረይዝም 200 አልተቁ አካል ቘይሸጥ ቺተቺተቁ ዚርፈንዝ ውላቕጝ ፈኑ ፃቨናንስ ኻሊሸው አቐነውድ ሚሪጝኩⶔ።

ኻለይዙ ሲዝነ አምረይዝም 50 አካልዙ ቘይሸጥ አትክልትዝመ ፍረምረዝ፣ ሻቅጠ ማቅጠዝ፣ ፅቭቀ ጝንዝ፣ ቅም ጥቅዘነዝመ ላጥ ዚርፈኒዝ ውላቕጝ አርውሸጥ ፃቨነው ቸልሸጘ ዊግትጝኩⶔ።

አካልዙ ቘይሸጥ እቀኽቭርድ ጝተ አርቕትድ፣ ጥቨቭዝመ ኻይልድ አርውሽጝ ኢኮኖሚዙ አርውሸትነይድ ደድስጛንስ ከቭሰነው ኻግርሸንቱ እጝቅነይዙ ሊግዝትዝ ፃየው እኩሰድ አጉረው የጝ።

ኽደር 30/2018

ሳምራዊት ግርማይ