እቊኒዙ እንቅቱነይ ሲትፍሽንድ ደድሰነው የነት ኻግርሸንቱ አቒል ጽበቊ ፖለቲኩ፣ ኢኮኖሚው እኒዝጘም ገረዱ ኻለየን እቊኒስ ውርም ቺትን እጀውዝ ግልቊጅቅ እርወ ኻሰቭ እኩሰነውዝመ ድምሽተነዊስ ኪርም ውሳኒ ይወነዊል አጢስ እክሰ ጽየው ጒደነዝ ሲትፍሽጝጥጘ ጻቨነው የነት የጝ።
እቊኒል ጻቭሽተው አዊንም አድልውንድ እግልሰናንስ ጻቭሽተው አልም አቕቨ ቲስመምን የጝ ።እቊንድ አሩሸተ ጻቨናንስም ጋዝጊቭለ ወረደይዝጘ እክሰቊ ሰበን አክንውሽጛጙ እክሰቊድ አሩሸተ ጻቨነው ቸልሸው አቓንድ እንዛጊስ ማኽል ዊዝር ሰላም ሞላ ጋዝጊብለ ወረደ አስከተመ ኻትመ 01 ቀቨሊዙ ጽበተ ጚ። እንዝ በውግ ቺተቺተቊ ሰባንዝ ፍልውልውርሽም አጋልዛጙ ችጝሸው ጽብንዙ ኪብርንድ ጝር ጽብንድ ቃወናንስ ጽጋ አቕ ፈኑ አቐነው ቸሊረይም፤ ነን ግነ ወረደይዙ ኻዘዝመ እንሰስዙ ፃጀ ፅፈሽ ጝኒዝ ፃቭሽተው ከቨይዝ አሩሸተ አቐነውዝ ቺዘው ፈን ሚዝግቭስራጙ አቐነውድ ዊግትርኩች።
ሄልቫተስ ይሽተው ከቨተ ድርጅትድ ይወቊ 50 ጅርቁድ ፍርዘነውዝ ጝር ጝነቊድ ቀሰው አቕንትዝ ጭሰጭስራጙም ችጝሸች ።
”ይጅርቁድ ግሬዝ 30 ቕሉን ማልጘኩ” ይረይሸን ዊዝር ሰላም” ነንቱ ሰቲዝ ሰራሸው ሰቪዝ ስየዙ ጅርቊ ፍርዝኒዝጐ ላውጥ ሰራሸነውዝ 25 ሺኽ ቊርሽ ቅየነውዝ ጝግዝ ፍልውልው ነንቱ ሰቲዝ እጉ ጝንዙ ወነ አቕ ይዊነው ጽብኒስ ቺዝ የር አቕ ይቚርድም ጡውሸውዝ ክንሳጙ የጝ”ይረንድም ውላረው ጝር ሰቪዝ አውግረው አርወ ችጝራጙ አረጘ ዊግትርኩች።
ላየ ዊግስነይ ጋዝጊቭለ ወረደ 01 ቀቨሊል ጅርቊ ፍርዝንዝ ጭሰጭሽትራጙ ችጝሽረይ ዊዝር ለምለም ካሴ ጝር ጋቢዝ ከቨዝ ችጝረው ጅርቊድ ቀሰው አቕንትዝ ታኽንኽንድር ጻየነውዝ ችግሰ አቒል ዊነው ጝርጽብንድ ቺዝሸነው ቸልደጘ ዊግትርኩች።
”ይጽብንድ ቃወናንስ እቀጘዝ ችግርሽ ዊናንስቅ ነንቱ ሰቲዝ ከቨዝ ችጘቊ ጅርቊድ ይጽብንድ ላውጥጝ ይቚርት ቀሰው አቕንትዝ ክንስጨጘ ከቭኩ”ይርኩች።
ላጥ ኩየንጣንድም ይናጘ ሰራሽጝ ላውጥሽጛንሥ ምጝግስት ይናግስ ጻቨው ከቨድቅ አትርዝ ቃጽልስጠ ጡውሸኩ ይራንድም ዊግትርኩች።
ሄልቫተስ ይሽተው ድርጅቲስ ጅርቊዙ ኹረዝ ግርየው ከቨ ችጝረጘዝመ፣ ስልጠነዝ ከቭሽትረጘ፤ ወረደድም ጣቅ እክልትዝ አቕ ቲክንክነ ጻቫⶖ አቐጘም ጋልጽርኩች ።
ጋዝጊቭለ ወረደዝ እንሰስ ጻጀ እፍርት ጭጝሸተ ጽ/ጝንዝ እንሰስዙ ጻጀ ጓነ ቃወተ አት ወንድ ይፍራው አበበ አስከተመ ኻትመ 01 ቀቨሌይዝ 12 እቁን ጅርወ ፍርዝንዝ ውላጘጘ ጋልጽጝኩጙ። ሸወጭ ጨቨቅም ጅርቁዙ ትኽነዝመ ዊርተድ ታኽንኽነኩን የነውዝ የጝ ጋልጽጘውድ፡፡
አት ወንድይፍራው አበበ ወረደይዝጘ ሳቁጠቱ ቃል ኪዳን ድርጅትዝመ ሄልቨተስ ይሽተው ጭሩዘተ ድርጅትዙ ከቨዝ 40 እቁን ጅርቊዙ ፍርዝንዝ ውላቕጝጠጘ ፃቭሽተነውድ ዊግትጝኩጙ። “ኹረዝመ ቕሉነዝ አግልግለቁ ጅርቁድም ግሬ ጨቨቅ ቕሉን ማለቊ አጛንስቅ ጅርቊድ ፍርዝን ላጥ ቀቨሊያኒል ተገተግስነቁ ኲየንጣንዝ አድልነኩን” ይጝኩጙ።
ቕሉነዙ ጊቭርትድ ቈሸውዜ አሬዙ እፅቁፅቈ ኹረዙ ጝንዝመ ንየጢጅቅ ተገተግስጝ ሰብተናንስ አስልሸቊ አቐነውድ ጋልፀቊ ጓነ ቃወተድ። “ተረቲዝም ቀሰው ፈን ቓሊሰቊ አቫላኒዙ ሚኩርሽንድ ፈራዝን ላጥ ቀቨሊያኒል ፅበቊ ኩየንጣን ጅርቊዙ ፍርዝንዝ አሩሸጥ ጻቨናንስ ሰብትናጙ የጝ” ይጝኩጙ።
ሐመልማል ተድላ
ታህሳስ 30/2018
