ልድትዙ በል አልምቱ ኻግረንዝ!!

ልድትዙ በል ኢየሱስ ክርስቶስቱ ልድትድ አስክዘነውዝ ኪብርሸው በል የጝ።ልድት ክርስትነ እምንትዙ ቲክነጥዝ ኪብርሸቁ ኽየቁ ኻይማኖትዙ በለን ማኽሊስ ላውድ የጝ።

ታኽሰስ 16 ዊንም ቈሽ ፃረቊዙ እግዝግዘይዝ ታኽሰስ 25 ግሬዝ አልምቱ ጅሉዘዝ ችጝሸቁ ቢሊዮንዝ እጊተቁ ዜገን ኻይማኖትዝመ ባኽሉ በል አቕ እብለውትዝ ኪብርሸኲ። አልምዝጘ 160 አቐቁ ኻግረን ዊትውዝ ኪብርዘቁ አጘንድ ኢትዮጵየ፣ ኤርትረ፣ ሩሲየት ተከቁ ኦርቶዶክስ ምከንዙ ቲክነጥድ ታኽሰስ 29 ኪብርዝጘኲ።

አሜሪካትል፣ እንግሊዝትል፣ ካናዳትል፣ ዩኬ፣ ጃፓን፣ብራዚል፣ አውስትራሊየስመ ላጥ ንቕፀቁ ኻግረኒል ችጝሸቁ እቅድ ታኽሰስ 25/ 2025 ዊንም ታኽሰስ 16 ግሬዝ ኪብርዝጝ ግሪጝኩⶔ።

እኔንም ቓሊሰውድ ኻግራን ጝተ ግሬዙ እግዝግዘይዝጘዝመ ጝተ ባኽልዙ አይንቲዝጘድ ኪብርዘቁ አቐነውድ የጝ።

ኢየሱስ ክርስቶስ እጅር ኹርቱ ቀተድ ዊርሸናንስ የው ጥወው ቃልድ አክንወናንስ ዝቨይዝጎ ጊም እጅር ኹሪስ እኹርሹ።

ቅድስት ድንግል ማሪያምትል እኹርሸውድም ታኽሰስ 29 ግሬዝ አቓንስቅ እጝቅ ክርስትነ እምንትዙ ቲክነጥድ ኻይማኖትዙ አቕንትዝ ኪብርዝጛጙ ችጝሽጘኲ።

እን በልድ ኻይማኖትዙ ፃየይስ ከስጘ ባኽሉ ዋርደንጥዝ ኪብርሸው በል አቐነዊዝም ክርስትነ እምንት ቲክነጥዝመ ላጥ አልምሸንቱ ኽዝቭድ እብለውትዝ ኪብርዝ ግሪየኲ።

ልድትዙ በል ኪብርዘቁ ኻግረን

ጃፓን፣ ህንድ፣ ደቡብ ኮሪያ፣ ፊሊፒንስመ ሲንጋፖርት ተከቁ ኻግረን ልድትዙ በል ኪብርዘቁ ጛይ።

ውርም እኰ በሊዙ ኪብርዝንድ ቺተቺተው አቕሽም ልድትዙ ግሬድ ኪብርዝጛንድ ፅግልውጥ ተከቁ ፋኖሰንዝ፣ገነዙ(ልድት) ዘፈንድ አርውሸነው፣ ባኽሉ ኹረ አስለነው፣ እንዝጘም ኻይማኖትዙ መዝሙረንዝመ ባኽሉ ጅምዝ እብለውዝጝ ኪብርዘነው አልምሸንቱ ኻግረኒል ዲዝጝሸው የጝ።

አውሮፓ ልድትዙ አሪየይዝ አርቕሽትረይ አርሽም ሰሜን አሜሪካ፣ እስያስመ ማኽልኘ  ምስራቅ ክፍለኒልም ችጝሸኲ።

አርየድም ዲዝጝትዝ ናንዝ ሰራሽተቁ ይውንድ፣ ኰሩ ድግስ፣ ገይፀነቁ ገባንድም አልስጘኩ። እኔንም ጅውነይዙ ባኽልዝመ እምጥጘድ እምጥጝጛንስ ከቭሰኩ ይጝ አምነቁ አቐነውድ ቢቢዚ ዚግቭኲ።

ጅቭጘቁ ገይፀንጥድም አቑ ባኽሉ አልብድ፣ ኹረዙ አይንተንድ ቀንጘዊዝ ይወነው ልድትዙ በልዝ አጉረው ትኩርት ይውሽተኲ።

አቓንስቅም 2025 ዓ.ስዝ ዓልምሸንትል ልድትዙ በልድ ኪብርዘቁ 197 ኻግረን ኻይማኖትዝመ ባኽሉ ቲግቭረንዝ ኪብርዝጛጙ ችጝሽጘኲ።

ምዕራቭ ኻግረንዙ አይር ዚምን እግዘነውዙ ጝተ ዚምንድ ላውጥሸነውድ ቲክንም ልድትዙ በልድ ጥምቅት በሊል አሽ ቺተቺተቁ ልድትዙ ዘፈንዝ፣ ባኽሉ ኹረዝ፣ ባኽሉ ሲረሲርንዝመ ኻይማኖትዙ ስረተንድ አክንወነውዝ ኪብርዝጝ በልድ ዲቁስጘኲ።

ሳምራዊት ግርማይ

ታህሳስ 30/2018