ክንድጝ ጝንጥዙ ቲክርክረ ቲኪሸተ ኹርዝ! 

‎ወይ ኽምረ ብሔረ እቅ ጭሰጭሰን አምደወርቅ ኻትመ ጭሰጭሰኒል ችጝሸው አምደወርቅ ሊጘትረ ተግ ክንድጝ ጝኒል ልኰ ኳስዝመ ናንዙ ኰስ ቲክርክረ ጻቭሽታጙ የጝ።

‎‎ክንድጝ ጝንጢል ጻቭሽተቊ ስፖርትዝቊቲክርክረንጥድ ስፖርትዝ አትረቊ ቲኪሸጥ ስፖርተኝጥ ፋጥረናንስ ኽየው አርወ ጽየው አቐነውድ አምደወርቅ ኻትመ ጭሰጭሰን ውሸብልዝመ ስፖርት ጽ/ጝን ስልጠነዝመ ቲክርክረ ሙየ ጉሬ  አት ተንሳይ ንጉሴ “ክንድጝ ጝንጥል ጻቭሽተቊ ቲክርክረንጥ ስፖርተኝጥ ፍርዘነዊስመ ትኽኑ ዜገ ፋጥርሽጠ ማጥን አውግረው እኩሰ  ጽየው የጝ።

‎‎ክንድጝ ጝን ተግዝ ቲክርክረ ጻቭሽተነውድ ክንደነ ክንሰነዙ ጻጝትድ ሳልጠው አቓንስመ ክንደጥድ ጝታይስ ጝታይ ጽይጘው ዲምቅሽንድ አትርዘናንስ አርወ ጽየው አቐነውድ ዊግተቍድ ቈሽ ክንድጝ ጝኒዝ ስፖርትዙ ክንሰተ ክንሰተ ዳንኤል ሠይድ ጛይ”ስፖርትዙ ቲክርክረድ ይናይስ ይናይ አርቐ አርቕሽትናንስ ኽየው አርወ ጻይኩ”ይጝኩጙ።

‎‎ቲክርክረድ ጻቭሽተነውድ ክንደጥድ አትረቊ አጛንስመ ተረቲዝም ወረደዝ እኒዝጘም ዞን ተጊዝ ጻቭሽተቊ ቲክርክረንጢል ሲትፍሸቊ አጛንስ አርወ ጻየው አቐነውድ ስፖርትዙ ሞየ ጉሬድ ክንሰተ ዳንኤል ሰይድ ቈሽጝ ጋልጽጝኩጙ።

‎‎አቒስ አቒቱ ስፖርትዙ ቲክርክረ ዊናን ቀሰው የጝ የነውዝ ዊግተውድ ቈሽ ክንደተ ዮሃንስ ወልዴ”ስፖርትዙ ቲክርክረድ አርወዉድ ለወትረ ይናስ ይናይ አርቐ አርቕሽትነኩን ሊጘትረ ትኽኑ አቐው ችብረ ጽይነ ጻቨኩ”የውኩ።

‎‎ስፖርትዙ ቲክርክረድ አስልሸነውድ ይና ጻምጢጅቅ አርቕሽትነ ጻቭኩ ይራንድ ዊግትረይሸን ክንደተ ሜላት ተሾመ”ያን ሲትፍሸውድ ናኒዙ ኰስዝ የጝ ላው ጅውነይል ጽብናጙ አርቐ አርቕሽታይን ዊነቅድ ላብጠ ዋርድናንድ አርቐ አርቕሽትንኩኑን”።

ተረቲዝ እን ቲክርክረድ አትር ቃጽላን ቀሰው የጝ። ወረደዝ ወረደ እኒዝጘም ዞን ተግዝ ዋርድናንስ አርወ ጻይኩ የነውዝም ዊግትርኩች።

አመልማል ተድላ

ጥር 15/2018