ኩየንጣንዙ ዊንዘነ አግልግለድ ትኽነ ጣቪየይል ኪርምሸነውድ እኹርንዝ ምላሰን ኩየንጣንዙ ሩሔ ዲቋየጘ ፃቭኩ ይጛንድ ሲልዳ ቀቨሊዙ ኩየንጣን ዊግትጙ።
ይነ ኻግርሸንትል ጊዙርን ዝመ እኹርን ጅቅ ፃየፃይሽት 14 ሽኽዝ ንየ ኩየንጣን ጝታሩሔድ ዲቆው አቐነውድ ፃቭሽተቁ ፅንኸጥ ሚሪጘኩ።
ደርሰተ ዊሰ ተምዘው ኩየንጣን ዝመ እፈር መልቁዙ ክርጘድ ችብሰናንስ ኩየንጣን ጊዙርንዝ ኮር ቲክንክነ ፃቭንጠጘ ልብትን ፋጥርንዙ ሰቭ ሰራሸነዊስ ኪርም ትኽነዝቁ ችብረንጥድ ፈራዘነውዙ ሰቭ ሰራሽታጙ ችጝሸኩ።
2016 ዓ.ስ እቀኽቭርዙ ኢንስቲትዩትድ ፃቨው ፅንኸዝ ኢትዮጵየትል 71 ላይስ አቐቁ ኩየንጣን ኽክምነዝ እዳዘነው ቸልሸው ችግሰዝ ጝታሩሔድ ብጛጙ አቐጘ ቓሊሰኩ።
እኹርንዝ ምላሰን አምደወርቅ ትጐ አግልግለ ችጘናንስ ዋጥርጥራጙ ዊኑን የቁድ ሲልዳ ቀቨሊዙ ፅበተ ዝመ አግልግለዙ አሩሸተ ዊ/ር ሀብታም የሰፊው ሲልዳ ትኽነ ጣቭየድ እኹረጥ ኩየንጣንዝ ኽሪን ኻክመነውዙ አግልግለድ ይውሽተነው ኪርማንድ ነንቱ ሰቲዝ አግልግለድ ችጛጙ የጝ ይጛንድ ዊግትጝ እኒስ ሚቅ ዊነው አግልግለ ይወይውንድ ጊዙርንዙ አግልግለ ይውን ጽብሽም አረት እጀው አቐነዊዝ ኽሪን ኻክምሸነው ቸላይንም ዊኑን ነን አቓንድ እንቅ ገቨድቅ ሚቸ ሚቸው አቕንትል ኻክምሽናጙ ችጝሽነኩን የነውዝ ዊግትጝኩጙ።
ላየ እኹርንዙ አግልግለ ችጘናንስ ሲልዳ ትኽነ ጣቢየይል ችጝሽረይ ዊዝር ዞማ አዛናው ጝታ ጋቢዝ ትኽነ ጣቪየድ ይዋጙ ችጝሸው አግልግለይስ አሩሸተ አቐነው ቸልጘጘዝመ ነንቱ ሰቲዝም ጝታጭስ ጻቭሽታጙ ችጝሸው ታኽንኽነይዝ ሚዜነ አልሰነውዝ ኩየንጣን ትኽነ ጣቪየይዝጐ ፊርን እኹረነውዝ ጝታቕመስመ ጝታኹርስ አርወው አቐነውድም ዊግትጝኩጙ።
ሲልዳ ቀቨሊዙ ትኽነ ኤክስቴንሽንዙ ሙየ ጉርየ ዊ/ር መሠረት ገዜ እኹረጥ ኩየንጣን እኹርንዙ ቲክንክነ ፃቭጛንስ ልብትን ፋጥርንዙ ሰቭ ሰራሽጛጙ አቐጘ ጋልፅጝኩጙ።
ኩየንጣን ኽሪጝ ኻክመነውዙ አግልግለድ ኪርምሸነዊስ በውገ አምደወርቅ ኻትመይዝጐ ሪፈር ይሽትጛንድ አምደወርቅ ስመ ሰቁጠትጎ ፊረናንስ ኩየንጣን ዝመ እፈር መልቁድ ገልታሽጛጙ አየው ችግሰል ሊቭጛጙ ዊነነውድ አስክዝጝኩጙ።
”ኩየንጣን ኽሪጝ ኻክመነውዙ አግልግለ ይውሽተነውድ ጋልፀቁድ ቈሽ ሲልዳ ትኽነ ጣቭየይዙ ዲቈተ አት መንግስቱ ምህረት ኽሪጝ ኻክምሸነውዙ አግልግለድ ኪርምሸት ኪርም ኩየንጣን ዝመ እኹርሸቁ መልቁዙ ሩሔ ዲቋየጘ ፃቨነውዝ ኽየው እኩሰ እኩሰው አቕሽም ተረቊ አረተንድ ሲዘ ጭቑ አጛንስቅ አጡ አየቊም” ይጝኩጙ።
እፈር መልቊዝመ ጊዙረቊ ኩየንጣኒዙ ክርጘድ እክሰ ጽየው ጒደነዝ ቓጽቨናንስ ስነ-እኹርንዙ ትኽነ አግልግለ ቺዘቺዝ ይጠ ማጥን ትኽነ ሙየ ጒይጢዙ አቅምድ እቻይጝጥጘ ጻቨነውዝ አልቨ እቓሰነ ማሽን፣አረት አንሶልጥዝመ ኮበርተን፣ቴሌቭዥን፣ኹረዙ ግዘን፣ ዘይት፣ኹረ ጂሰነ ጐዘ መዛን ጻቭሽተቊ ከቭኒስ ማኽል ችጝሽጘኩ፡፡ የቊድ ቈሽ ድሃነ ወረደ ትኽነ ፅ/ጝንዙ ቲክነተ ዲቈተ አት ምግባሩ አማረ ጛይ።
አት ምግባሩ ቈሸነውዝም ጥቅለ ወረደይል ችጝሸቊ ሲልዳስመ ጭላ ትኽነ ጣቢየጢል ኩየንጣኒዙ ዊንዘነዝመ ፈወነ ጝንጥድ ዚምንሰናንስ ግሬው 2 ሚሊየንስ ንየ ፈን ጻቭሽተቊ ጐዘ መዛን ከቨ ጻቭሽትኩ ይጝኩጙ።እኒን ጻቭሽተነዊዝም ትኽነ ጣቭየይስ ሪፈር ይሽትጝ ድሃነስመ ሰቁጠትጐ በርሰናንስ ጉግዙ እክልቲዝ ምላሰን እኹረጥ ኩየንጣንዙ ሩሔ ዲቋየጘ ጻቨው አቐነውድ ጋልፅጝኩጙ።
ኽሪን ኻክምሸነውዙ አግልግለ ይውሽተነው ኪርመት ኩየንጣን ዝመ እኹርሸቁ መልቁዙ ክርጘድ እዳዘናንስ ሰራሽነኩን የቊድ ዲቈተድ ኩየንጣኒዙ ክርጘይዝመ እፈር መልቊዙ ክርጘድ ቃጽቨናንስ አትርንዝ ሰራሽነኩንም ይጝኩጙ።
አመልማል ተድላ
ጥር 30 /2018
