ታዝቱ እጅር ሰራሸተ ኪዝድ ጉይሽታንድ ቃውስ ይነ አይምሮይል ተረውድ ኻዘዙ ፃጀድ የጝ። 18ስ ንየ ኻዘዙ አይንት ችጝሸው፣ ንቕፀቁ ውሸብሊዝም ሰቭዙ አገነ ፋጥረው የጝ።
ታዝ 9 ነቁጠ 3 ቢሊዮን ሜትር ኩብ አቑ ፃየነው ቸለው፣ አምረዝ 10 ሽኽ ቶኒስ ንየ ኻዘዙ ጊቭርት ጊቭርዘነው ቸለው ኽየው ኪዝ የጝ።
አቓንስቅም ኻዘዙ ጊቭርቲስ ከስጘ ባኽር ሸሽ ለሊል ( እየይዝ አቑድ ስፍረ ሊቀው ዝቨይል ስውርጠ፣ ቲማቲም፣ ቃሪየ እፍርዘነውዙ ዲዝጝትድ ጅውነይዙ እቀኽቭርድ አትርዛጙ ተርኲ።
ዲቈቁ እምተንዝ ታዝቱ ቅብረድ ዊንም ባኽር ሸሽድ ቲክነነውዝ ስውርጠ ተከቁ አትክልትዝመ ፍረምረ እፍርዝጝ ጝተ ፅብንድ ቺዘቺዝሰቁ ጒዝጝ ጨጥ ንቕፀቁድ ጛይ።
ጝዝ ቢዘም 2017 ዓ.ስ ወይትል ቓልሽት ወይሽት አርቓው ታዝቱ ኪዚል እየይዝ እፍርደው ጣቨዝመ መይለዙ ጊቭርትድ ወይቱ ቀሰው ጋፅድ ኻግርዝ ቓሊሰነው ቸልሽኲ።
ወይቱ ጅውነድ እንሰስዙ ፍርዝንዝ ጭቑ አቒጝቀት አውማው ኽወዙ አይንትዝ ምቸው አቐነውድ ቓሊሰነው ቸለው የጝ ታዝቱ ኪዝድ።
ታዝቱ ለሊል 2013 ዓ.ስ ኪርም አትክልትዝመ ፍረምረ እፍርቲል ውላቐው ውሸብለ ሽሞት አወጣ አምረዝ ጊቭርዝጘው ስውርጠዙ ጊቭርቲስ ጭቑ 400 ሽኽዝ ንየ ቁርሽ ችጝጛጙ ተርጘጘድ ዊግትጘኲ።
ኻዘ ፃውረነውም አነ አቑድ ሚንወዝ አርውሸነውዝ ታዝቱ ኪዝድ ንቕፀው እቀኽቭርድ ድኽቲስ ፊሳጙ ፅበው ፃጀ አቐነውድም ጉይኲ።
ውሸብለ ሽሞት አወጣ ታዝቱ ኪዝድ ጄኔሬተር ፃየውዝመ እጅርዙ ኻይል ፃየቁ ጝነቁዝ አጉረው ፈን ችጚሳጙ ፅበነውድ ልብስ ጘጝም አምረ ጨቨቅ ፅቃ (10) ውሸብል ቃፅረነውዝ ሚንወዙ ሰቭድ እፍርዘቁ አቐነውድ ጋልፀኩ።
ነኳን አሽም ጝግል ቃፅርሸቁ ውሸብልድ ላው አምረዝ ጝጅቅ ሰቭትጝ ዲዝጝት ፊስጘት እግርገ ጝታቕምቱ ጄኔሬተር ጅቭጝ ጝታቕምቱ ሚንወ እፍርዝጘንስ አጉረው እኩሰ እኩሰነውድ ዊግትኩ። ጛይም ቺዝየው ፈን ቓሊስጛጙ አቐጘም ጋልፅኲ።
እን አምረይዝም 2.5 ሄክታር ስውርጠ፣ ላው ሄክታር ቃሪየ፣ ላው ሄክታር ቲማቲም፣ ላው ፅምር ሀብሃብ እፍርዝጛጙ አቐነውድ ጋልፅጝ እኔን ቈሽ ላውድ ዘትልሽ ላዊዝ ጎናንስ ከቭሰው ሰራሽን አቐነውድ ሚሪኲ።
ነንም 200 ኩንታል ስውርጠዙ ጊቭርትድ ችጘነውዝ አርየይዝጎ አልሳጙ አቐነውድ ጉይ ጣቨዝመ መይለ ጣቅዝ ፊዘነውዝ እፍርዛጙ አቐነውድ ጋልጽኲ።
ሰቭዙ ፍልውልወዝመ ሰራሸነውዙ አቅም ፅየው እጅርዝ ወይት ላውጠነው ቸለው ፃጀ ፅበነውድም የጝ ውሸብለድ ጋልፀውድ።
ላየ ታዝቱ ኪዚል ጣቨዝመ መይለዝ ፍራትዝ እፍርዝጛጙ ችጝሸቁድ አት ልጃለም አሰፋው ታዝቱ ቅብረድ “እየዝ ስውርጠ፣ ጣቭ፣ መይለ ፊዘነውዝ ይነ ኹረዙ ወይትነይድ ደድስነው ፃጀ አኩ”ይጝኩⶔ።
ነን ፅበው ኻውየተዙ አልስንድ ምነነ ቀቭሰው አቕሽም እጝቅ ልቕርድ ሰራሸነውዝ ታዝቱ ኪዚስ ቀሰው ጊቭርት ችጝጛጙ አቐነውድ የጝ ጋልፅጘውድ።
ታዝትል ስውርጠዙ እፍርትል ሲትፍሸነውድ ንቕፀቁ እምተን እጊትሽም ጣቨዝመ መይለዙ ጊቭርትዝ ምቸው አቐነውድም ዲቈው እምትዝ ቺዝየው ጊቭርት ጊቭርዝጝ ደድስጘጘ ዊግትጘኲ።
አት ልጃለም እን አምረይዝ ሻቘ ፅምር ስውርጠ፣ ሰውጠ ፅምር መይለዝመ ጣቨዝ ፊዘቁ አቐነውድ ሚሪጝ ኽወይስ ጭቑ 80 ኩንታልዝ ንየ ችጝጥጘ ቸለቁ አቐነውድ ዊግትጝኩⶔ።
እንዝም ሚሪሸው አካልድ ኻውየተዙ አልስንዝመ ሙየዙ ከቨድ አትርዘነው ጥውሸው አቐነውድ ኻስቭዝጝኩⶔ።
ነንቱ ኰሪዝ ታዝቱ ዚወድ ሻቘ ሰቭዙ አይንትዝ አርውሽጛጙ አቓንድ ኻዘ፣ ስውርጠ፣ ቢርብረ፣ ቲማቲም፣ሐብሐብ፣ ተከቁ አትክልትዝመ ፍረምረዝ እንዝጘም ጣቭዝመ መይለ ኽወዙ አይንተንድ እቀኽቭሪዙ አምሩ ኹረዙ ደድሰነ አቕጝኩⶔ።
እፍርዝጘው ኽወዙ አይንትድ አምሩ ኹረዙ ወይትነይድ ደድሰነዊስ ከስጘ ጝተ ቅምዝ አቐው ግልባነድም ጥውሸውዝ ችጘነው ቸልጛጙ የጝ።
አት አለሙ ገብሬ ሰሃለ ሰየምት ወረደ አርሽነይ ጽ/ጝንዙ ቲክነተ ዲቈተ አጘንድ ታዝቱ ዚወድ አኰ ቀበሊየንዙ እቀኽቭርድ ሚንወዝመ ኽወዙ እፍርትዝ ሲትፍዛጙ አቐነውድ ሚሪጝኩⶔ።
ቺተዝ ቈሽ ስለዝጊስመ ጥርሽማን ቀበሊዙ እቀኽቭርድ እቻቐውዝ አምሩ ኹረዙ ወይትነይድ ደድሳጙ አቐነውድ ጋልፅጝኩⶔ።
በጀትዙ አምረይዝም 1ሽኽዝ441 ጒዝጝጨጥ ሲትፍሸነውዝ 378 ሄክታር ዝቨ ሚንወዝመ ኽወዙ አይንትዝ እፍርዳጙ ችጝሸው አቐነውድ ሚሪጝኩⶔ።
ቲክነተ ዲቈተድ ወረደይል ጄኔሬተርዙ እጅጝት እጀው አቐነውድ ጉይጝ 300 ጄኔሬተር ሳስየው ወየዝ ጒዝጨተይዝ ትንዘነው ቸልሸነውድ ጋልፅጝኩⶔ።
ሚንወዙ ሰቭዝ ኽየው ችግሰ አቐው ኻውየተዙ ጝጭር አርየድ ችብሰነውዝ ጒዝጨተድ ኻውየተዙ ችግሰዝ አጋልሽታየጘ ወረደዙ ኒግርንዝመ አርየዙ እፍርት ጽ/ጝንጅቅ አቭርድጝ ሰቭትጛጙ አቕሽም ብሔረ እቅ ጭሰጭሰንድም ኻውየተዙ አልስኒል ትኩርት ፃቭ ሰራሸነው ጥውሸው አቐነውድ ኻስቭዝጝኩⶔ።
ሳምራዊት ግርማይ
የካቲት 15/2018
