ምርምረዝ ችጝሸው ላው ክትቫት እጝቅ እቘ፣ ግፈዝመ ላውጥውጥሸተ ፅውዘንጥ ማኽተነው ቸለው አቐነውድ ምሁረን ጋልፅⶔ።

ላው እስጝዝ ትንዝሽተው ክትቫት እጝቅ እቘ፣ ግፈዝመ ኢንፍሉዌንዛ እንዝጘም ባክቴሪየ ሲብዙ ኢንፌክሽነንድ ማኽተነው ቸለው አቓንድ አለርጂየንድ እዳቒጝቀት ማኽተነው ቸለው አቐነውድ አሜሪከቱ ማርምርሸጥድ ዊግትⶔ።

ሮይተርስቱ ዘገቨይዝጘድ ስታንፎርድ ዩኒቨርሲቲዙ ጓነድ እንሰሲል “እጝቅቱነይዙ ክትቫት” ሚኩርጝኩⶔ። ነንም እጅር ኹርዙ ክሊኒክዙ ሚኩረን ፃቨነው ጥውሸው አቐነውድ ሚሪሽኲ።

ዚርፊዝ ውላቐቁ ሙየጒጥዙ ጽንኸድ ገነ ኪርመነ ተጊል ችጝሸው አቕሽም “እቀጘዝ እምጥጝዘው” ፈን ቓሊሰው

እንዝጘም ተረዊዝ በዊዝጎ ተግረው አቐነውድ ዊግትጝኩⶔ።

ነን ፅበቁ ክትቫትዙ አይንተንድ ላው ኢንፌክሽንዙ አይንት ማኽታንስ ሳልጥንዝጘኲ። ተክዘ ሸልሜዙ ክትቫት ሽልሜዙ ፅውዘይስ ቢዘ ላጥ ፅውዘንጥዝ አቓውም።

ኤድዋርድ ጄነር 18ትረ አድለ ዚምንዙ አሰነይዝ ክትቫተንድ ኪርምጘው ኰሪስ ነኳን አሽ ላው ጒደነዝ ዊኑ።

እኔን ክትቫትድ ቈሽ ፅውዘንጥ ማኽተነ ሴሌንድ ጛይስ ጛይ ቲስመምጘው ጒደነ ሚሪየው አቐነውድ ጉይሽትኩ።

ክትቫትድ እስጝዝ ትንዝሽተው አቓንድ ሲብ አቒል ማክሮፋጅስ ይሽተቁ ፃረው ብርዙ ሴለንድ ነቃዘነውዝ ውርም አይንት ኢንፌክሽን እትልሽም ተግረ ፊሰናንስ አስልሸቁ ጛይ።

እንሰስዙ ሚኩረንዙ ፈንድ ሻቘ እርፈንዝ ዊንኲ።

ፅንኸ ፃቨጥድ ቺተዝ ቈሽ ሲብ አቒል ጥወቁ ቫይረሰንድ ላይስ ኪርም ሽኽል አሽ ቃፅቭጝጠ ቸለቁ ጛይ።

ጓነድ ክትቫትድ ሊጘ ባክቴሪየዙ አይንተን የነትም፦ ስቴፕሎኮከስ ኦውሬስስመ አሲኔቶባክተር ባውማኒ ማኽተነው ቸለው አቐነውድ ቓሊስኲ።

እን ክትቫትድ ሰራሸው ቃወነድ ነኳን አሽ ዊነቁ እጝቅ ክትቫተንድ ሰራሽጘቁ ቃዉኒስቅ ኽየውዝ ቺተው አቐነውድ ሚሪሽኲ።

እንዝም “እጝቅቱነይዙ ክትቫት” ይሽት ጭጝሸው፣ ኢንፍሉዌንዛ ቫይረሲዝ፣ ኮቪድ ቫይረሲዝ፣ ዲዝጝሸው ግፈዙ ቫይረሲዝ ጭቑ አቒጝቀት እጝቅ ቫይረሰኒዝ ሚኩርጘቁ ቺተቺተቁ ባክቴሪየንዝመ አለርጂየንድ ቆሽ, ማኽተነው ቸለው ኽየው ፈን ነሰነውድ ጋልፅሽትኩ።

እን እምጥጝዘተ ምርምረዙ ክፍል አቓንድ ፈንጥድ እጅር ኹርዝ ደድሽትጘት እግርገ ዜገን እቘ፣ ግፈዝመ ላጥ ላውጥውጥሸተ ቲንፍሰነ አካለንዙ ኢንፌክሽነን አወየው አቕንትዝ ማኽተነው ቸልሸው አቐነውድ ላውጠነው ቸለው አቐነውድም ሚሪሽኲ።

‎ሳምራዊት ግርማይ

የካቲት 15/2018