አውሮፕቊዙ እግዝግዝኒዝጘ 1908 ዓምረ ስቑርትዝ ኪርምሸው እቊንዙ ሚቭት ደድሽታንስ ፃቭሽተው ፍልውልወድ 1910ዝ ቆሽ ጀርመንትወ እኹርሸተዝመ ሶሻሊስት ፓርቲዙ አቫል አረይ ክላራ ዜትኪን ዓልም አቅቨ እቊንዙ ግሬ ኪብርሻንስ ኻሰቭ አልስች፡፡ አቭርደቊ ምጝግስተንዙ ድርጅትም 1975 አውሮፕቊዙ እግዝግዝኒዝጘ አምረ ጨቨቅ እቊንዙ ግሬ (ማርች 8) አቕ ግሪጠጘ ዊስኑ፡፡
ኢትዮጵየትልም እን ግሬድ ቺተዝም እቊንዙ ሚቭት፣ እርውነይዝመ ሲትፍሽኒል ትኩርት ፃቨነውዝ ሰልፍዝ፣ አቭላይተዝመ ቺተቺተቊ አፅቭጥዝ ኪብርሸኩ፡፡ አፍሪከዝመ ኢትዮጵየ አቒዝ ፅበው አቕንትድ ጥቅለዝ ላው ጋቢዝ ምነነ ይወው ሊግዝትዝመ ላዬ ጋቢዝ ቈሽ ፅገወው ችግሰ አቐው ገቨም ፅበነውድ ቓለነው ቸልሸኩ፡፡ ንቕፀቊ አፍሪክቊ ኻግረን ጝታ ኽግድ እርውዝጝኩጙ፣ ፓርላማ አቒዝ እቊንዙ ደርግቭሽነይድ ንየስ ይጠ ፃቭጝኩጙ፣ እቊንዙ ክንድጝዙ ምፅነድ ቈሽጠጘድ ፃቭጝኩጙ፡፡ ላዬ ጋብዝ ቈሽ ጣይትን ፅበው ጅውነይዝ ፆተዙ ጠቃሽን እትልጠጘ፣ እድም ችጚጝቀ ጨነ ፃቭጥጘ ፃቫጙ ችጝሸኩ፡፡
ኢትዮጵየቱ ኽገ ምጝግስቲዝ ሲርዬ አንቀፅ 35 እቊንድ ከቨነውዝመ ጝታ ሚቭትድ ደድሰው ኽግ ፅብሽም ቲግቭሩ አቐነዊዙ ገቨድ እቀጘዝ ሳስ የው የጝ፡፡ ቺተዝም ፅልዬ፣ ብላ ክልልዝመ ላጥ ጅውንጢል እትለቊ ገጫሽነኒዝ ምላሰን ፆተዙ ጠቃሽን፣ እኹረነውዙ ችግሰ፣ ክንድጝዙ ቀቭንዝመ ኢኮኖሚዙ ቘጨ አውግረው አቕንትዝ ቈሻጙ ተረነውድ ቺተቺተቊ ሚዝረንጥድ ቓሊስጘኩ፡፡
ብላ ክልሊልም አቑ ይና ብሔረ እቅ ጭሰጭሰኒዝጘ እቊንዙ ሚቭትድ ደድሰነው ጋቢዝ ፃቭሽትጥጘ ጥውሸቊ ጥንቅቀን እኩጙ፡፡ ቺተዝም ፆተዙ ጠቃሽንዝመ ጣይትንዙ ጥቕዘድ ፅልዬ፣ ብላ፣ ኦሮሚያ ክልለኒል ንቕፀዝ እትላጙ አቐነዊዝ እኒስ ሚቅ ሰራሽናጙ ዊነው ቀሰው ሰቭድ ዋጥር የነውዝ አስክዘነውዝመ ኽግድ ኪብርዘነው ተሚሰኵ፡፡ እቊንል ችጘው ገረዱ፣ ፖለቲኩዝመ ኢኮኖሚዙ ጥቕዘድ ዊስ ቖጨ ቲክንዘውድ ጅውነይዝጘ የውም ኻግሪዝጘ አቓንድ እቊንል ችጝዘው ስነ እዘኑ ኪልድሽንድ ንየስ የው አቐነዊዝ ጥንቅቀ ፃቨነው ተሚሰኵ፡፡
ወይ ኽምረ ብሔረ እቅ ጭሰጭሰኒዝጘ 2013 ዓ.ስቲስ ኪርም ሰሜኑ ጣይትንዝ ምላሰን እትለው እቊንዙ ጠቃሽንድ አውግረው አቐነውድ ቺተቺተቊ ኰሪዝ አልስነቊ ሚዝረንጥድ ቓሊሰነ ጛይ፡፡ አቐነዊዝም ዲቈው ኮሪዝ እትለው ችግሰይስ ዲዝጝት ፊሰነውዝ እቊንል ችጘው ጥቕዘዝመ ጠቃሽንድ አቐኩ የነው ተሚሰኩ፡፡
ወንድሙ ቸኮለ
ለካቲት 30/2018
