ጄነራለንዙ ፍልቀነ አረይ ወይኽምረ ኪነ ጥቨቭዙ ዚርፍዝም ኰርዝ ኰር ጝተ ጅውነድ ጭጝሰቁ እፈር ንቕፅጛጙ ተርጝኲⶔ።
አውማው ቲክርክርሽጘው ሲትፍሽጘው ዚርፊልቅ ጝርቑርድ ጭጝስጛጙ ችጝሽጘኩ።
ሚሊኒየሚስ እጝጎ ቓልናንድ ናፀለ ዜመዝመ አልበምዝ ጝተ ጅውነድ ጭጝሰቁ ንቕፀቁድ አጘንድ ጅመዙ ቲክርክረዝም አይዶል፣ ፋና ላምሮት ሲትፍሽጝ ሊንቱ ያይነው ሻቘን ሲዘን ጝተ አቅሚስ ኻግርት አጝክርሰቁ ብሩክ ሙሉጌታ፣ አክሊሉ አሰፋ፣ በአምላክ ቢያድግልኝት ተከቁ ጝታ ኻግርት ጭጝሰቁ ብጭቕ ውሸብል ፋጥርሽጝኩⶔ።
ወይቱ ጅውነይል ጅመዝመ ፊልም ኢንዱስትሪዙ ሊግዝትድ ሳስ የው አቕሽም ጝር ጊዝዊስ ፈቁ ጝርቑርድ ግነ ፊርጘዊልቅ ጝርት ጭጝስጘኩ ጚ አይቭስጘንድ እትላቊም።
ንጭቱ ባኽልዙ ዲቭየይዝም ነኳን አሽ ወይቱ ጅውነይል ዳቐዳቕሽትየው ፊልምዝመ ትያትርዙ ኢንዱስትሪል ትክቭ ጥወው ጅውነይል ሙየጉሪየም አነ አውም አካል ከቭሰው ዊኒንቀት ውርም ፊልም ሰራሸነውዙ አገነ እጀው ጅውነይል ዝቨይስ ጉ ነንቱ ሰትዝ ምነነ ጉሪየዝመ ላጥ ውሸብሊዝ ተከ አቐው ውሸብለይዙ ፃጘድ አንቭቭስነ ቀኑን።
ጝ እፈርትነይዝ ውርም እኰ ፊልምዝመ ድራመ ቴሌቭዥንዝ ቲክንክናጙ ሊግዝሽም ክንድጝ ጝንጥዙ ክቨቨንዝመ ምከንል ቈሽ ሲንቭትዙ ክንድጝድ ውሸብለድ ጝተምዝትዝመ አለመድ ቺዘንስ ከቭጝኩⶔ።
ውሸብለ አማኑኤል ወርቁ ሳቁጠ ኻትመይል እኹርሽ ሊግዘው የጝ። ላጥ እፈሪዝጘድቅ ጝ ክንድጝድ ቲክንክናጙ ሊግዝሽም ጋብዝ ጋብ ምከንዝ፣ ክንድጝዙ ክቨቭዝመ ቅሸነ ቲያትርዝ ሲትፍሸነውዝ ይውሽተው ጝ ቸልትድ ሊጊሰነው ቸለው ውሸብለ የጝ።
ንቕፀው እጅርዙ እልዝ ላው ሰቭዙ ዚርፍ አቕ እትላው ዊነው ቲያትር ዊንም ኪነ ጥቨቭዙ ሰቭድ አማኑኤል ግነ ዩኒቨርስቲ ጥው ክንደነውዝ ኻልየው ጝ አለመይል ችጝኲ።
አማኑኤል ወርቁ ዩኒቨርስቲ ክንዳጙ ሰራሸቁ ቲያትረን አጉረው ቀንሽተትነይ ችጘቁ ኢትዮጵየትል ኽየቁ ይሽተቁ አርቲስተንዝም አጝክርሰቊ ጝ አቒቱ ቸልትድ ፊስጝ ቓሊሰቁ ጛይ።
ሰራሸቁ ሰበኒስም ኢድፕስ ዘ ኮለንስ ዊንም አንች ግን፣ ኪሊዮፓትራ፣ የስሌት ማሽን፣ ጥቁር ገመድ፣ የሞት ብልት፣ ሴሪያልስቲክ፣ የሀምሌ ጨረቃ ጉዞ፣ አፋጀሽኝ የቁዝመ ላጥ ፊትነቁም እምጥጝዘቁ እጅጝፃን ቲያትረን ሰራሸነውድ ዊግተኲ።
ዩኒቨርስቲዙ ጝ ክንድጝድ ኻት ነንቱ ሰቲዝ ቈሽ ኢትዮጵየቱ ብሔሩ ቲያትርዙ ሙየ ጉሪየ አቕ ሰራሻጙ አቓንድ ይነ አዕምሮድ ለምረናንስ ዝቈወቁ፣ እጅርዙ አዕምሮይስ ሚርሽጥጘ ቸላቁ ኽየቁ ሰበንልም ሲትፍሽኲ።
ውሸብለ አማኑኤል ፊልምዝ፣ ድራመንዝ ሰራሸነውዙ አገነ እጀው ጅውነል ጝቕምቱ ልቕረዝ ጝበነው ሰቪል አውም ችጝየው አገነ ችጘነው ቸልኲ።
ኢትዮጵየቱ ብሔሩ ቲያትር ጝኒል ጥወት እጝጎም አቕሽ አጉረው ዲዝጝት፣ ሙየዙ ቸልትዝመ አቅም ፃየቁ ኢትዮጵየቱ አርቲስተን ሰራሽትየቁ ሰበንድ ሰራሽ ቓሊስኲ።
አማኑኤል ሰራሸቁ ሰበኒስ ዊትቁድ ጒይናንድም ትወነዝመ አስለዙ አቭርዘትነይዝ “ሸምጋይ” የው ፊልም ሰራሸነውድ ጋልፅኩ።
እኒስ ከስጘ ቆሽ መንታ መንገድ፣ አዲያም ሰገድ ኢያሱ፣ ባቡሩ፣ ንጉስ አርማት ተከቁ ኽየው አቅም ዋቕረቁ ፊልመንዝመ ላጥ እምጝዘጥ ቲያትረንድ ሰራሽኲ።
ብሔሩ ቲያትር ጝኒስ ቢዘም ቓልናን አግማስ ቲያትሪል “ልክ” የው ቲያትርዝ ሲትፍሸው አቓንድ እኔንም ጣቅ ኰርዝ ፈኩ ይሽት ኻይሽተው ፊልም የጝ።
ውሸብለ አማኑኤል ቲያትርዙ ዚርፍዝ ብጭቕ እጅር ሰራሸነው ተምዛው አቐነውድ ሚሪያንድ”ይ ጝነቁድ እን ዚርፍድ ቺዝየው ተግል ችጝዘኩ ይጝ አምናቁ ዊንጛንስ ያን ሲትፍሻንስ በንት እጀቁ ዊንጙ” የኲ።
አቕሽም እን ዚርፍዝ ውላቐነው ተምዘቁ ውሸብልድ ጝታ ተምዝትድ ቲክነነው ጥውሸው አቐነውድ ማኽረነውዝ ሙየድ ክቕመት የውም ኻግርት ጭጝሰው ሰቭ አቐነውድም ዊግትኲ።
አማኑኤል ቲያትርዝ ጭቑ አቒጝቀት ፃፈነውዙ ቸልት ፃየው አቓንድ ተረዊዝም ፊልምዙ ሰቪስ ከስጘ መፃፍ ኻትምዘናንስ አስልሸነውድ አርቒስኲ።
ቺተዝ ቈሽ ዳቕሽትየው ወይቱ ቱበ ባኽልዝመ ሲጘድ ፊሰነውዝ ጅውነድ ጭጝሰቁ ሰበንድ ሰራሸናንስ ኻሊ ፍልውልዋጙ አቐነውድ ዊግትኲ።
አማኑኤልቱ ሰበንድ ጥውሸውዝ ቲክንክነቁ ሙየጒጥዝመ ችጘጥ ማኽሊስም አት ጌታቸው ደሳለኝ
”አማኑኤል የነት ትወነዙ አደረ የጝ” ይጝ ሚዝርድጘኲ።
ትወነዝ ጭቑ አቒጝቀት ቲያትርዝመ ፊልምዙ ፅፈሸንድ ፃፈነው ቸለው፣ ጉለሸ አስለተም አቐነውድ ሚሪጝ እጅጝ እዘን አኹረዙ (ልብወለድ) መፃፈን ፃፋጙ ችጝሸው አቐነውድም ልብስጝኩⶔ።
ጝ ሰበንድ እጝቅም ቀንሽተቁ አጘንድ አጉረው ዲዝጝት ፃየቁ ሙየጒይጥ ቺዘነው ቸላቁ ሊጘ አክተር አቕ ሰራሸው “ባቡር” የው ፊልምድ ቈሽ እቀጘዝ አጝክርሰው አቐነውድም ዊግትጝኩⶔ።
ተረዊዝም ኪብርሸቁ ኽየቁ አርቲስተን ማኽሊስ ላውድ አጠ ቸለኩ ይሽት ኻይሽተው ተዋናይ አቐነውድ ሚዝርድጝኩⶔ።
ላየ ቲያትርዙ ሙየ ጉሪየ አት ሀብቱ ተወልደ አማኑኤል ሰራሸቁ ሰበንድ ጝ አቅምድ ፊስጝ ቓሊሰቁ አቐነውድ ሚሪየነውዝ አውማው ሰቭዝ አጉረው ወየ ይወው ዝላቑን ሲለጡን የነው ቀናው ሙየጉሪየ አቐነውድ ጋልፅጝኩⶔ።
አማኑኤል ተረው ጅውነይስ ፊልምዙ ኢንዱስትሪዝ አርቕት ፃየቁ ሙየ ጒይጥ ዊኒጝሽም ጝቕምቱ ልቕረዝመ ሙየዙ ዚርፍዝ ፃየው በንዝ ነንቱ ሰትዝ ሰራሸቁ ሰበንዝ ላጥ ውሸብልዝ ተከ አቐነው ቸለው የጝ።
አት ሀብቱ ዊግትጘውድም አማኑኤል አየው ተረው ኹሪዝ ንቕፀቁ ኽየቁ ይሽተቁ አርቲስተንዝም ተከ አቓጙ ችጝሸው፣ ኽየቁ ሙየ ጒጢስም ክቭርዙ ወረቂት ችጛጙ ፅበው ውሸብለ አቐነውድ ልብስጝኩⶔ።
አማኑኤልቱ ሰበኒስም ዩኒቨርስቲል ፅባጙ ሰራሸቁ ሰበኒስ “ኢፕደስ ዘ ኮሎኖስ” የው ሰቭድ ሜካፕድም፣ አልብዙ ዲዛይንድም ጝቕም ፊሰነውዝ አዕምሮይስ ሊቅጠ ቸላቁ ፊልመኒስ ላውድ አቐነውድ ጉይጝኩⶔ።
አማኑኤልቱ ቸልትድ ላውዝ ጭቑ ጋልፀነው ቸልሻው አቐነውድ ጉይጛንድ ሙየ ጒጥድ “ኪነ ጥቨቭዙ አደረ፣ ሁለገብ” የነውዝ ጋልፅጘኲ።
ተረዊዝም ፊልምዙ ዚርፍዝ ኢትዮጵየት ደርግቨነውዝ ሆሊውድ አዋርድል ሲትፍሸነዊዝ ኻግርት ጭጝሰኩ ይጝ ኻይጘው ሙየጉሪየ አቐነውድ ቓልጘው ጝ ቸልቲስ ሚዝርድጝኩⶔ።
ውሸብለ አማኑኤል ነይሽተው ካራክተርድቅ ዲቁትነይድ ለምር ተከ አቒጝቀት አቕ ሰራሸው ኪነ ጥቨቭዙ ሙየጉሪየ የጝ።
ወይቱ ሲጘድ ፊሰነውዝመ ባኽልዙ ሊግዝትዝ ኪነ ጥቨቭዙ ኢንዱስትሪድ አጉረው ችጘር ፃየው የጝ። እን ሊግዝትድ ተረውድም ውሸብለድ አማኑኤልት ተከቁ ውሸብልድ ጝተ ቸልትድ መድረኺዝጎ ፊሰነው ቸልጘንድ የጝ።
አማኑኤል ወይት ጭቑ አቒጝቀት ኢትዮጵየት ጭጝሰቁ እድሚዝም ሰቭዝም አርቲስተንዝ ንየ ጝ ቀንሽተትነይድ ቆሻጙ ተረውድ ፅበቁ ችግሰንጥድ ችበችብር አገንጥድ ችጘናንስ ፊረው ተግረዝ ልክ የጝ።
አቓንስቅም አውማው ውሸብለድቅ ጝ ቸልትድ ወረጘ አቐነውድ ልብተነውዝ ጝ ቕመት ላውጠነዊስ ከስጘ ኻግርት ጭጝሰነው ቸለው አቐነውድ ልብጠ ጥውሸኩ የውድ ይና ዲቪየዙ እፃ ፃቭኑን።
መጋቪት 30/2018
ሳምራዊት ግርማይ
