ሲብዙ ምች አልምቱ ጅሉዘይዝ ሚሊዮንዝ እጊተቁ እቅ ቘይዘው ዲዝጝሸው ፅውዘ አቓንድ ኽየው ቲንፍሰነዙ ኢንፌክሽን የጝ። ቀለው ፅውዘይስ ሩሔ ድሰነዊል አሽ ችጝጠ ቸለው ፅውዘዙ አይንትም የጝ።
እኔን ቆሽ ምልክትድ፣ ፅውዘይዙ ጎነ ምላሰንጥድ፣ ኽክምነዙ ምርፀንጥድ ልብተናንስም ሲብዙ ምች ወረጘ የጝ የውዴት ቓልነኩን።
ሲብዙ ምች ሲብ አቒል ችጝሸቁ አልቪዮሊ ይሽተቁ እጥልቃን አየርዙ ከረጢተንል ጥቕዘ ጭሰው ፅውዘ የጝ። አየርዙ ከረጢተን ቅብረው ገቨዝ ዊንም ጣዝጘዝ እቻቕጝጠ ቸልጘኩ።
እኔንም ግፈይዝጘ፣ ብርትዝመ ቲንፍሰነውዙ ችግሰዝ አጋልዘው አቓንድ ቺተቺተቁ እጥልቃን ተሕዋስያንዝ፣ ባክቴሪየዝ፣ ቫይረሰንዝመ ፈንገሰንዝ ፋጥርሽጠ ቸለው የጝ።
አልምቱ ትኽነ ድርጅትዙ ሚዝረይዝጘ ሲብዙ ምች ፅውዘ እፈርዝ ክርጘዙ ምላሰን አቐቁ ዲቈዲቁሽተቁ ፅውዘንጥ ማኽሊስ ቃውሰትነይዝ ጉይሽተው አቓንድ ቺተዝ ቈሽ እስየስመ ሰሃራት ሳ ችጝሸቁ ኻግራኒል ፍራትዝ እን ፅውዘይዝ ክረቁ እፈርዙ እግዘድ ቈሸኩ።
ድድምዝመ ጝተ እድምዝ ኽየቁ እቂል እትለው አቓንድ ሲብዙ ምች አምረዝ 90 ሽኽ ንየ ድድምዙ ሩሔድ ዲቈኲ።
ኢትዮጵየትልም አምረዝ 3 ሚሊዮንስ ንየ ዜገን ሲብዙ ምችዙ ፅውዘ አጋልሽተቁ አጛንድ እኒስም አምረዝ 40 ሽኽዝ ንየድ 5 እምትዝ ሳ እፈር ፅውዘይዝ ጝተ ሩሔ ዲቈው አቐነውድ ትኽነ ሚኒስቴርዙ ሚዝረድ ቓሊሰኲ።
እን ፅውዘይዝ አውማው እጅርድቅ አጋልሽተነውዙ አገነ ፃየው አቕሽም ጝተ እድሚድ 5 እምትዝ ሳ ፅበቁ እፈርዝመ ላየ ፅውዘዝ አጋልሽተቁ እቀኽቭሪዙ ክፍለን አጉረውዝ እትለኲ።
ጽውዘድ ማኽተናንስ ፊሰሽታጙ ፅበው ተግረይዝ ነንቱ ኰሪዝ ፅውዘይዝ አጋልሽተቁ እፈርዙ ክርጘድ 67 ናን ላይስ ቃፅቨነውድ ሚሪሽትሽም ነንም ፅውዘይዝ ገልታሸቊ ድድም እፈርዝመ እቀኽቭሪዙ ክፍልድ ብጭቕ ጛይ።
ወይኽምረ ብሔረ እቅ ጭሰጭሰኒዝጘድ እን ፅውዘድ ፍራትዝ እትለው ጅውንጢስ ላውድ ዝቛለ ወረደይል ቓልናንድም ጝተቑርድ እን ፅውዘይዝ አጋልሽትጙዝ ገልታሸቁ ንቕፀቁ ኲየንጣን እኲⶔ።
አሚኮ ኽምጣጘ አስለ ክፍልጅቅ ስልክዝ ዊንተ ፃቨቁድ ዊዝር ሙሉ ታረቀ ሲዘ እርፉ ጝተ ኹር ሲብዙ ምች ፅውዘይዝ አጋልሽት ዊነጘድ ዊግትጝኩⶔ።
ዊዝር ሙሉ ድድመድ ፅዊታንድ ትኽነዙ ችብረንጢዝጎ ፊስን ኻክምሰነውድ ደይጛንስቅ ጝተ ኹርት ሊጘ እርፍዝ ቑጠ ፅውዘይዝ ቘይሽ ዊንጠጘድ ፃቭጝ ዊንጝኩⶔ።
አቕሽም ጝተ ኹርቱ ትኽነድ ዋጥርዘናንስ ኻስቭዘው ተጊል ችጘነዊዝ ትኽነ ጣቭየይዝጎ ፊስጝ ድድመይዙ ሩሔድ ቲርፍዘነው ቸልጘጘድም ጋልፅጝኲⶔ።
ተከተከዊዝ ዊዝር ጣምትሩ እነተም ዝቛለ ወረደ 01 ቀበሊዙ ፅበተ አጘንድ ጝተ ኹርት ፅዊተነውድ ልብትጝ ቃዚጝ ኽክምነ ጣቭየይዝጎ ፊሰነውዝ ጝትኽነድ ዋጥረነውድ ዊግትጘኲ።
ቺተዝ ቈሽ ቀበሊዙ ትኽነ ኤክስቴንሽንዙ ሙየጒይጥድ ሸወጭዝ፣ አርፈዝ ጅልውጛጙ ይውጘው አርቕትድ ትኽነ ችብረንጢዝጎ ፊረነውዙ ዲዝጝትድ ክንድጛንስ ከቨነውድ ሚሪጝኩⶔ።
ዝቛለ ወረደይዝጘድ 2018 ዓ.ስ መዝየ አርፈይል አሽ ቓልናንድ 4 ሽኽዝ 400 ንየ እቀኽቭሪዙ ክፍለን ሲብዙ ምች ፅውዘይዝ አጋልሽትጝ ኽክምነዙ አግልግለድ ችጘቁ አቐነውድ የጝ ትኽነ ጽ/ጝኒዙ ዲቈዲቁሽተቁ ፅውዘንጢዙ አስልሽት ሙየጉሪየ አት በሩ አባይ አርቒስጘውድ።
እን አቒስም 2 ሽኽዝ 300ድ 5 እምትዝ ሳዝ ፅበቁ እፈርድ ሲብዙ ምች ፅውዘዝ አጋልሽተቁ ጛይ።
አት ብሩ ጅውነድ ቈለ አቐነዊጅቅ ፃየፃይሽት ንቕፀቁ ዲቈዲቁሽተቁ ከረከረቁ/ ፅውዘንጥዝ አጋልሽተነውዙ አገነድ ፈራቐው አቐነውድ ጋልፅጝኲጙ።
እቀኽቭርድም ቺተቺተቁ ሽወዝመ ጽውዘዙ አይንተንዝ አጋልሽትጛንድም አቑ ትኽነዙ ችብረንጢዝጎ ፊርጝ ትኽነዙ አግልግለ ችጝጛንስ አርቕት ፋጥርሻጙ ችጝሸው አቐነውድ ሚሪጝኩⶔ።
ወይ ኽምረ ብሔረ እቅ ጭሰጭሰን ተፈራ ሀይሉ ሚጉርሰነ ሆስፒታል አቒቱ ደዌ ኽክምነዙ ሙየጉሪየ ዶክተር ባየ አስናቀ “ሲብዙ ምች ሲብ ባክተሪየዝመ ቫይረስዝ ቘይዘው ፅውዘ አቐነውድ ሚሪጝ ቃዝየውዝ ኽክምነ ችጚየውዜ እጅርዙ ሩሔ ዲቁሰው የጝ” ይጝኩⶔ።
ዶክተርድ እን ፅውዘድ ሊጘ ሸወጭዝ ቑጠ እቑሰው፣ ብርሰነውዝ፣ ቲንፍሰነውዙ አካልድ ጨንቅዘነውዝ ኦክስጅንዙ እጅጝትዝ አጋልዘው አቐነውድም ጉይጝኩⶔ።
እቀ ኽቭርድም እን ፅውዘዝ አጋልሽተነውዙ አጋል ዊናየጝ ዊርተድ ኻየነው፣ ናን እቓረነውዝመ ቲንፍሰነውዙ ዊርተድ ዲዝጝዝጘነውዝ፣ ፅዊተው እጅሪስ ዳቐዳቕሽትኒስ ጊግቭሸነውዝ ትንዝንድ ቃፅቨናንስም አቑ ፅውዘድ ቃውስን ማኽተናንስ ከቭሰው አቐነውድ ልብስጝኩⶔ።
ጽውዘዝ አጋልሽተቁ አካለንድም አቕሽ ክትቫትድ ቃዚን ፊሰነው ጥውሸው አቐነውድ ጉይጝ ሲብዙ ምችድ ቈሽ ሲብዙ ምችዝ አጋልዘቁ ባክተሪየንዝመ ቫይረሰንዝ ክትቫት ፅበነውድም አርቒስጝኩⶔ።
እጅር ኹር ቺተቺተቁ ዲቈዲቁሽተቁ ፅውዘንጥዝ አጋልሽተነውዙ አገነድ ፈራቐው የጝ። አቕሽም ቃውስን ማኽተነቁ ገባንድ ዊርተ ኻየነውዝ፣ ሲጋረ ጥይሰነዊስ ጊግቭሸነው እቀኽቭሪስ ኻይሽተው አቓንድ ፅውዘይዝ አጋልሽትነው ኰሪዝ ቈሽ ቃዚን ትኽነዙ ችብረንጢዝጎ ፊርን ክትቫትድ ፊሰነውዝ እፈሪዝመ ጝቕምቱ ሩሔድ ቓዘነው ጥውሸኩ።
ሳምራዊት ግርማይ
መጋቪት 30/2018
