ጽምር ግሬይስ 30 – 50 ኩንታል አሽ ጊቭርት ችጘናንስ ኻሊጝ ጝታ ችዝጝድ ደግምግመዝ ጒዘነዊል ችጝሽጘጘን ወይ ኽምረ ብሄረ እቅ ጭሰጭሰን ድሃነ ወረደ ጭላ ቀቨሊዙ ጒዝጝጨጥ ዊግትጙ።
ደግምግመዝ ጒዘነው ጊቭርትዝ አውግረው እኩሰ ጽየው አቓንድ ለወትረይዝመ አይነተድ ቺዝጚል ጽበው ቀሪምነድ አቒትጐ ዲቭሽታንድ ኮምፖስቲዝጘ አቕ አግልግለኩ፣ ቺዝጚስ አየርዙ ጅልውልወ ዊንጠጘ ጻቨኩ፣ቀለውዝ ተረው ጥርበዙ ስወድ ቺዝጝ አቒል ጥወነውዝ ኽወጥድ ሚቸው አቕንትል ችጝጥጘ ጻቨነውዝ ፍጥሩ እፍርዘነይዝጘ አቕ አርወኩ።
ቀስ አሰፋ ማሞ 02 ጭላ ቀቨሊዙ ጽበተ ጒዝ ጨተ አጛንድ ጝታ ቺዝጝድ ማጽወይዝ ኪርምጝ ደግምግመዝ ጒዘነውዝ፣ ኪሥክሰነውዝ ብጥድ እፍርድጠ ጻቨው አቓንድ ብጥድ ጂዚት ፊራንድ ጊቭርትድ ሳሥ የው አቐኩ አቐነውዝም እኔን አቓየጘ ኮምፖስት አስልጛጙ፤ዛረድም ጝታቺዝጚል ቅብስጛጙ ዊንጛንስቅ እቑመ 2 ጽምር ግሬይስ 15 ኩንታል ችጝጝ ዊንጘጘ ጋልጽጝ ተረው ጊቭርትዙ ዚምኒዝ አትርጝ ጝታ ቺዝጝድ ታኽንኽነነውዝ “እደረ ቈሺት 30-50 ኩንታል አሽ ችጘኩን”ይጛንድ ዊግትጝኩጙ።
ላየ ጭላ ቀቨሊዙ ጽበተ ጒዝ ጨተ አት አዳነ ጣፋጨ ነንቱ ሰቲዝ ሊጘትረ ጒዝንዙ ሰቪል ችጝሸቊ አጛንድ አርሽነይ ሙየ ጒይጥድ ይውጘው ክንድጚዝ ሲሪየ እየይስ ኪርም ቺተቺተቊ አትክልትዝመ ፍረምረን ሰራሽጛጙ ዊነቊ አቓንድ ነንም ጝታ ቺዝጚል ኮምፖስት ቅብሰነውዝመ ዛረ ቅብሰነውዝ ደግምግመዝ ጒዝጛጙ ዲቈው አምረይስ ጒዝጘው ላው ጽምር ግሬይስ ላጝጠ ኩንታል ችጘቊ አቓንድ ነንቱ አምረይዝ እንቅ ጥወራንድ አሩሸነውዝ 15 ኩንታል ችጘናንስ ኻሊጝ ሰራሽጛጙ ችጝሽጘጘ ዊግትጝኩጙ።
ኽወዙ ጊቭርትነይድ ቈሸናንስ ቀቨሊዝጘ ጽበው ፍልውልወይዝ ጊቭርትድ ሊጊሠቊ መለኒስ ላዊዝመ አይነተድ ደግምግምን ጒዘነውዝ ቺዝጝ ሊጫንስ ሰራሽታጙ ችጝሸው ሰቪዝ ነንቱ ሰቲዝ ለወትረ ችዝጝዙ ሰቭድ ኻትሽ ሊጘትረ ቺዝጝዙ ሰቭድ ኪርምሽኩ።
ቀቨሊል 814 ሄክታር ጒተው ዝቨ ጽባንድ እን አቒስ ለወትረ ቺዝጝዝ 680 ሄክታር ሺፍንሽኩ የነውዝ ዊግተቊድ 02 ጭላ ቀቨሊዙ እፍርት ጣቢየ ጭጝሸተ ፍትህ አለው አበባው ሊጘትረ ቺዝጚስ ቈሽ 250 ሄክታር ጒተው አቓንድ ጝታ ችዝጚል ዛረዝመ ኮምፖስት ቅብስጛጙ ችጝሸቊ እክሰቊ ጒዝጝ ጨጥ ችጝሽጘጘም ሙየ ጉሬድ ቈሽጝ ጋልጽጝኩጙ።
ወይ ኽምረ ብሄረ እቅ ጭሰጭሰን ድሃነ ወረደ አርሽነይ ጽ/ጝኒዙ ዲቈተ አት ዘነበ ማሞ ጅውነይል ትኩርትዝ ሰራሽታጙ ችጝሸው ቺዝጝዙ ቃውሰ አስልሽት ሰቭ ፍልውልወይስ ቺተቺተቊ ጥወርዙ እጅጝትዝ ምላሰን ሰቭድ እግርታየጘ ጻቨናንስ ቴክኖሎጂየንድ አሩሸነውዝመ ማርጽሽተው ዚረ ጒዝጝ ጨጢዝ አጡ አቕንትዝ ችጝዘናንስ እኒስ ሚቅ ጻቭሽተው ጒዝጝ ጨጢጅቅ ጥወጥውሽተነው ሰቪዝ ተገተግሽተቁ ቺተቺተቊ ዚረዝቊ ማርጸንጥድ አኽቨነውዝ 275 ኩንታል ዚረ ጒዝጝ ጨጢዙ ሳልጥንዘነ ጣቢየይል ጥውጠ ጻቨነው ቸልሽኩ፤እን ሰቭድ ነንም አትርንዝ ጻጝዝናጙ ችጝሽነኩን ይጛንድም ዊግትጝኩጙ።
ብጥዙ እጥቲጅቅ ጻየ ጻይሽት ኮምፖስት አስለነው ጋቢዝ 174 ሺኽ ሜትር ኪዩብ አስለናንስ ኻሊሽት ነኳን አሽ 47 ሺኽዝ 500 ሜትር ኪዩብ ጭቑ ኮምፖስት አስልሸው አቐነውድ ጉየቁድ አት ዘነበ እን ኻለይስ ጋብ ቓልሽታንድ ሳስ የው አቐነዊዝ ቺዝጝድ ደግምግመዝ ጒዘነውዝመ ፍጥሩ ዛረ ቅብሰነዊል ቲኩርት ጻቭሽት ሰራሽታጙ ችጝሸኩ ይጝኩጙ።
ቲግቭረንድ አክንወናንስ ቀቨሊያኒዙ ፖቴንሻልድ አጽንኽሽት ኻለይ ይወነውዝ ሰቢዝጐ ጥውሽትኩ።
ቺዝጝድ ደግምግመዝ ጒዘነውዝ ጊቭርትዙ ምጽነድ ሊጊሰነው ቸልሰው ሰቭ ሰራሸነው ጋብዝ ወረደይዝጘ ተከ አጥጘ ቸለቊ ፍጥሩ ጻጀ ኻይን ሰቭ ሰራሽተቊ እክሰቊ ቻፅጝ ጽብጘጘም ዲቈተድ ዳቕስጝኩጘ።
አመልማል ተድላ
መጋቢት 30/2018
