ቀሰው ስነ-ሚግቭርዝ ሲሪሸው ኹር ፋጥርሸውድ አቅሊስ፣ ግጺዝ የውም ክንድጝ ጝንጥል እፈርዝ ይውሽተው ትኩርትዝ የጝ። “ኹር ሊጊሰተይዝጘድ” ይሽተዊዝጘድቅ እፈር ቀሰውም አነ ጭቓ ገቨድ ጝኒስ፣ ግዘይስ የውም ክንድጝ ጚኒስ ቓልጘቁ፣ ወሽጘቁ ገባኒዝ ፃይጥጘ ቸልጘኩ።
አቅልዙ ባኽልድ፣ ስነ – ስረትዝመ ቀሰቁ እሴተንድ ፃይጝ ሊግዘናንስ ከቨቊስም ክንድጝ ጝንጢል ሳይንስዙ ክንድጚስ ከስጘ አክንውሸቁ ቲግቭረኒዝ የጝ። እንዛጊስም ላውድ ሚኒ ሚዲየዙ ክቨቭ ጉይሽተው አቓንድ ክንደጥ ቀሰው ስነ ሚግቭርዝ ሊግዝጘንስ ጝ እኩሰድ አጉረው የጝ።
ሚኒ ሚዲየ ይሽታንድ ጝሽⶔዝጘ እጥን ሚዲየ ዊንም ጅውነይዙ ሚዲየ የው እክሰ ፃየው የጝ።
እንዝም ኽየቁ ሚዲየዙ ችብረንጢዝጘድ ጅውነይዙ እቀኽብርዝ ዊርተዝመ እማንትነይ ፃየቁ ሚዝረንጥድ አልሰነውዝ እቀ ገረደዙ አውትነይድ ሊጊሰነውዝመ ጅውነይዙ እሴተንድ አርቐአርቒሰነውዝ፣ ባኽልድ አትርዘነው፣ ኻየነውዝመ ላውጠነው ተግዝ አጉረዉ እኩሰ ዋርደቁ ጛይ።
ፈራቐው አልም አቅቩ ዊንም ተግድ ኻየቁ ባኽልዙ ዝንባሊየንድ ፍልውልውዘው ብጭቕ ዲምቅሸነይስ ቺተው አቕንትዝ ሚኒሚዲየ ጅውነይዙ ባኽለን፣ ዲዝጝተን፣ ሲጘንጥዝመ ኻግሩ ቀሰቁ እሴተንዙ ቺተንጥድ ኻየናንስም ከቨው የጝ።
ዝቛለ ወረደይዝጘም ፅበቁ ሚኒሚዲየዙ ክቨቫኒስ ዊከ ለወትረዝመ ማኽልኘ ተግ ክንድጝ ጝኒል ሚኒ ሚዲየ ክቨቭዙ አቫል አቐቁድ ክንደተ ናርዶስ አምባየስመ ክንደተ አብርሃም ሻምበል ሚኒ ሚዲየዙ ክቨቭዝ ክንደጥዝ ቀሰው ስነ ሚግቭርድ ፃይሰቁ ኻለየንድ ድራመዝ፣ ጅመዝ፣ የውም ጅጘዝ አልሰነውዝ ሰራሽጛጙ ችጝሸቁ አቐነውድ ዊግትጝኩⶔ።
ክንድጝ ጝኒስ ቢዘም አቕሽ እቀ ኽቭርድ እድም ችጚጝቀት ገባሽን፣ እፈርዙ ግርቭ ቢዝብዘነው ተከቁ አቕየቁ ዲዝጝተንድ እዳዘናንስ ሰራሽጘቁ ሰበኒዝም ንቕፀቁ እፈርዙ ሩሔድ እሩዘነው ቸልጘጘድ የጝ ዊግትጘውድ።
ሚኒ ሚዲየዙ ክቨቭዝ ዘናሰነውዝ ኽየቁ ኻለየንድ እቀ ኽቭሪዙ ስነ -እዘኒል እቑረነው የጝ።
ክቨቭዙ አቫለንድም አስጝጥድ፣ ድራመንዝመ ጅጘንጥድ አስለነውዝ አርየይል፣ ክንድጝ ጝንጥል፣ የውም እቀኽቭርድ ንቕፅትዝ አኽቭሸው ጅውነይል ባኽልድ፣ ቈንቈድ፣ ቀሰቁ እሴተንድ አትርዘናንስ ሰራሽጘቁ ሰበንድ ብጭቕ አጘጘድ የጝ ሚሪጘውድ።
ዊከ ክንድጝ ጝኒዙ ሚኒሚዲየ ክቨቭድ ውርም እኮ ማይክዙ፣ ጂፓስዝመ ላጥ ሚኒ ሚዲየ መሰሪዙ እጅጝተን ፅብጝሽም አጉረዉ ፍልውልወ ፃቫጙ አቐነውድ አቫለንድ ዊግትጝኩⶔ።
ዊከ ለወትረዝመ ማኽልኘ ክንድጝ ጝን ሚኒ ሚዲየ ክቨቭዙ ጭጝሸተ አቐቁድ ክንሰተ ደበሳው ላቀው ጝተ ጋብዝ ክንድጝ ጝኒል ሊጘ ላዝ ንየ ክንደጥዝመ ክንሰጥ ሚኒ ሚዲየዙ አቫል ፅብጘጘድ ሚሪጝኩⶔ። እጝቅም ጝተ ቸልቲዝጘ ክንደጥዙ ቀሰው ስነ ሚግቭርድ ኲነነዝዉመ እቀኽቭሪዙ ቀሰው እሴተንድ አትርዘናንስ ሰራሽጛጙ አቐነውድ ጋልፅጝኩⶔ።
አስጘ ቸለውድ፣ ድራመ ቸለውድ፣ ጂጘ ቸለውድ ጝቸልቲዝጘድቅ እቀኽቭርድ ችጝጠ ቸለው አርቕትድቅ ፃይስጛጙ አቐነውድ ሚሪጝ ሲረሲርንድ ጅውነይዙ እቀኽቭርድ ጋልፀውዝመ አስጝጥድም ኽምጣጘዝ አልሰነውዝ ጅውነይዙ ባኽልዝመ እሴትድ ኻየናንስ ክንድጝ ጝኒል ሰራሽተው ሰቭድ አጉረው አቐነውድም አርቒስጝኩⶔ።
ዝቛለ ወረደይዝጘ ፅጭ አኰ (15) ሚኒሚዲየ ክቨቫን ችጝሽጘኩ። እንዛይ ክቨቫንድም እኒስ ሚቅ ክንድጝ ጝንጢል የውም እቀኽቭርድ ዘናሰቁ፣ ክንሰቁ፣ አርቕት ፃይሰቁ እፃንጥድ እቀኽቭሪዝጎ ችጝዘነው ጋብዝ ሰራሽጘቁ ሰበንድ ንቕፀቁ አጘጘ ጋልፀቁድ ቈሽ ወረደይዙ ኮሚኒኬሽን ጽ/ጝንዙ ሚዲየ እፍርትዙ ሙየ ጉሪየ ዊዝር ዘርፍነሽ ላቀው ጛይ።
ጽ/ጝኒዝጘም ሚኒሚዲየዙ ክቨቫንድ አትርዘናንስ አቫላንዝ ስልጠነ ይወነዊስ ኪርም ክቨቭዝ አቐቁ መሰሪጥድ( የነትም፣ ማይክ፣ አልብዝመ ጂፓስ ተከቁ) ጥወረንድ አቭርደቁ አካለኒስ ደምዝምዝጝ አልስጛጙ ተርጘጘድ ሚሪጝኩⶔ።
አቕሽም ወረደይል ችጝሸቁ ሚኒ ሚዲየዙ ክቨቫንዝ እቻቐውዝ ጥወር እቻይሰናንስ ሳይል ጊምጝ ቲክንክነ ፃቨነውዝ መሰሪዙ እጅጝትድ እክሰናንስ ሚሪሸቁ አካለኒጅቅ ዊግሽጛጙ አቐነውድ የጝ አርቒስጘውድ።
ሚኒ ሚዲየ ላጥ ችብረንጥዝጘ( ብጭቕ ዲምቅሸነዙ ችብረይዝጘድ ችጝሽተትነይዙ አፅትዝመ ፍራትዙ ቺተን ጚ ዲቈዲቁስጘው እፃድ ኻግሩ ላውንትነይዝ፣ ቀንትዝ፣ ባኽሉ ሊግዝትዝመ ጅውነይዙ እፍርትዝ እኩስጘው እኩሰድ ተከተከው የጝ የነው ቸልሸኲ።
አቓንስቅም አርቕትዝ፣ ኻስቨኻስቭንዝመ ቸልትዝ ፈው ኹር ፋጥረናንስ ጝ አርወድ ኽየው አቐነውድ ይና እጝቅም ልብትነ ተሚሰኲ።
ስነ ሚግቭርዝ ሲሪሸው ዜገ ፋጥረናንስ፣ ጝ ኻግርት ቀነው፣ ባኽልድ ኪብርዘው ኹር ፍርዘነውዝ ህብረ ብሔሩ ላውንትነይድ አትርዘቁ ሰበንድ ሰራሸናንስ ሚኒ ሚዲየ ክቨቭዙ ችብረንጥድ ከቨነው ጥውሸኩ የውድ ይና ዲቪየዙ እፃ የጝ።
ሳምራዊት ግርማይ
ሚያዚያ 15/2018
